I Kôrintô 11 - Nau Brah Ndu Ngơi 2023

¹ Tĭng kơt hom gâp, nâm bu gâp nơm tĭng kơt Brah Krist.

IV. Lĕ nau tât ma nau yơk mbah ( 11:2 – 14:40 ) Ndơ nsoh n'gut phung bu ur dôl tâm rƀŭn

² Gâp tâm rnê ma khân may yorlah khân may kah gĭt ma gâp tâm lĕ rngôch ndơ, jêh ri răp jăp djôt prăp lĕ nau vay ơm gâp nti jêh ma khân may.

³ Ƀiălah, gâp ŭch ăn khân may gĭt pô aơ: Brah Krist jêng bôk ma bu klâu, bu klâu jêng bôk ma bu ur, jêh ri Brah Ndu jêng bôk ma Brah Krist.

⁴ Ăp nơm bu klâu mbơh sơm mâu lah ngơi nau mbơh lor ƀiălah nkŭm bôk jêng ƀư bêk bôk păng nơm.

⁵ Ƀiălah, ăp nơm bu ur mbơh sơm mâu lah ngơi nau mbơh lor ƀiălah mâu nkŭm bôk jêng ƀư bêk bôk păng — tâm ban ma păng poih plưn bôk.

⁶ Tơlah bu ur mâu nkŭm bôk păng, ăn păng kreh lơi sŏk. Ƀiălah tơlah bu ur uănh nau kreh sŏk mâu lah poih plưn bôk jêng nau bêk prêng, pôri nkŭm hom bôk!

⁷ Bu klâu jêng rup jêh ri nau chrêk rmah Brah Ndu rĭ dĭng mâu dơi nkŭm bôk; ƀiălah bu ur jêng nau chrêk rmah bu klâu.

⁸ Yorlah bu klâu mâu geh njêng tă bơh bu ur ôh, ƀiălah bu ur luh tă bơh bu klâu.

⁹ Rhăk njêng bu klâu mâu di yor bu ur ôh, ƀiălah bu ur yor ma bu klâu

¹⁰ Ma nau nây, yor phung tông mpăr, ăn bu ur ndô ta klơ bôk nau mbên ma nau dơi păng.

¹¹ Ƀiălah, tâm Kôranh Brah mâu di bu ur êng đah bu klâu, mâu lah bu klâu êng đah bu ur.

¹² Yorlah tâm ban ma bu ur luh tă bơh bu klâu, pôri tâm ban lĕ, bu klâu tă bơh bu ur deh, jêh ri lĕ rngôch luh tă bơh Brah Ndu.

¹³ Ăn khân may sek uănh êng, nau bu ur mbơh sơm ma Brah Ndu ƀiălah mâu nkŭm bôk, tâm di lĕ?

¹⁴ Mâu di hĕ nau ŭch tâm săk jăn nti ma khân may gĭt ma bu klâu om sŏk jong jêng bêk prêng,

¹⁵ ƀiălah bu ur om sŏk jong jêng nau rnê êng ma khân păng? Yorlah sŏk jong ăn ma bu ur tâm ban ma bok nkŭm bôk păng.

¹⁶ Tơlah geh nơm ŭch tâm rlăch, nau nây mâu di jêng nau vay hên ôh; lĕ Phung Ngih Brah Ndu mâu đŏng geh nau vay nây.

Nau nhêt sa tâm rŏng jêh ri Nhêt Sa Tâm Êp

¹⁷ Ma lĕ nau ntăm nti jêh pakơi aơ, gâp mâu dơi tâm rnê ma khân may ôh, yorlah khân may tâm rƀŭn mâu djôt leo nau ueh lơn, ƀiălah jêng mhĭk lơn.

¹⁸ Lor lơn, gâp tăng pô aơ, tơlah khân may tâm rƀŭn tâm Phung Ngih Brah Ndu, geh nau tâm pă tâm phung khân may; gâp chroh nau aơ geh du kô̆ di ngăn.

¹⁹ Nau pă mpôl êng êng tâm phung khân may, n'hêl nanê̆ mâu hôm đing đŏng, ƀiălah geh tâm ban lĕ gay ma gĭt năl mbu nơm jêng bunuyh nanê̆ ngăn.

²⁰ Tơlah khân may tâm rƀŭn mâu di khân may râng Nhêt Sa Tâm Êp Kôranh Brah ôh.

²¹ Yorlah tơlah khân may ntơm sa, ăp nơm sa ndal ndơ êng păng nơm, kŏ tât bunuyh aơ ji ngot, bi bunuyh êng hơm mpay.

²² Khân may mâu geh hĕ ngih êng prăp sông sa nhêt? Mâu lah khân may tâm rmot ma Phung Ngih Brah Ndu, jêh ri ƀư bêk phung pưt kƀah? Moh ndơ gâp lah ma khân may? Tâm rnê ma khân may tâm nau nây ƀơh? Mâu, gâp mâu tâm rnê ôh!

²³ Yorlah gâp geh dơn tă bơh Kôranh Brah nau gâp nti ma khân may: Nây jêng tâm măng bu jao Brah Yêsu ma bu, Păng sŏk piăng let,

²⁴ lah ueh, jêh nkê̆ch piăng let jêh ri lah pô aơ: “Aơ jêng săk jăn Gâp jao ăn ma khân may, ƀư hom nau aơ gay ma kah gĭt ma Gâp.”

²⁵ Tâm ban lĕ, jêh khân păng sa măng, Brah Yêsu sŏk đŏng kachok jêh ri lah: “Kachok aơ jêng nau tâm rnglăp mhe khân may đah Brah Ndu ma mham Gâp. Ƀư pô aơ gay ma khân may kah gĭt ma Gâp tâm ăp tơ̆ khân may nhêt kachok aơ.”

²⁶ Pôri, ăp tơ̆ khân may sa piăng let aơ, nhêt kachok aơ, khân may nkoch nau Kôranh Brah khĭt, tât Păng văch tay.

²⁷ Yor ri, mbu nơm sa piăng let mâu lah nhêt kachok Kôranh Brah mâu tâm gop ma săk Păng, nơm nây jêng tih đah nglay săk jêh ri đah mham Kôranh Brah.

²⁸ Pôri, ăn ăp nơm sek uănh êng păng nơm lor, ri mơ sa piăng let, nhêt kachok nây.

²⁹ Yorlah mbu nơm sa piăng let mâu lah nhêt kachok aơ blă blơ, păng mâu kơp ndơ nây jêng săk jăn Kôranh Brah. Pôri păng dơn nau bu phat dôih dôl păng nhêt sa.

³⁰ Yor nau nây geh âk tâm phung khân may ji kuet, ji rôi, jêh ri ƀaƀă tâm phung khân may hŏ khĭt jêh.

³¹ Lah he sek uănh êng săk he nơm lor, pôri bu mâu hôm phat dôih he ôh.

³² Ƀiălah tơlah Kôranh Brah phat dôih he, Păng nkra he, gay ma he mâu mra dơn ôh nau tâm rmal ndrel ma neh ntu.

³³ Pôri, hơi phung oh nâu, tơlah khân may tâm rƀŭn ma nau nhêt sa tâm êp, tâm kâp hom ndrăng khân may.

³⁴ Tơlah du huê ji ngot, ăn păng sông sa, ta ngih păng nơm, klach lah khân may tâm rƀŭn jêh ri sŏk dơn nau phat dôih. Gâp mra nkra nau êng tơlah gâp tât.