I Kôrintô 10 - Nau Brah Ndu Ngơi 2023

Nti nau rêh jêng tă bơh phung ƀon lan Israel

¹ Hơi oh nâu, gâp ŭch khân may gĭt ma lĕ rngôch phung chô yau he gŭ jêh tâm ndâr tŭk da dê; lĕ rngôch khân păng rgăn jêh dak mƀŭt;

² Lĕ rngôch khân păng dơn jêh nau ƀư ƀaptem tâm ndâr tŭk jêh ri tâm dak mƀŭt gay tĭng Y-Môis;

³ lĕ rngôch khân păng sa ndrel du ntil ndơ sông sa brah;

⁴ lĕ rngôch khân păng nhêt ndrel du ndơ nhêt brah; yorlah khân păng nhêt jêh dak ta lŭ toyh nau brah hăn ndrel ma khân păng; lŭ toyh nây jêng Brah Krist.

⁵ Nđâp lah pônây, âk bunuyh tâm phung khân păng mâu ƀư maak ma Brah Ndu, yor nây khân păng cha lôt khĭt tâm bri rdah.

⁶ Lĕ rngôch nau nây hŏ tât geh nâm bu du nau lah lor ma he, gay ma he mâu hăn tĭng lĕ nau kơnh mhĭk nâm bu phung chô yau.

⁷ Lơi dĭng mbah rup brah nâm bu ƀaƀă tâm phung khân păng, nâm bu nau hŏ nchih jêh: “Phung ƀon lan gŭ sông sa nhêt, Jêh nây dâk pâl ntalơ̆.”

⁸ He lơi văng tĭr ôh nâm bu phung ƀaƀă tâm khân păng, pôri bar jât ma pe rbăn nuyh khĭt tâm du nar.

⁹ Lơi he rlong uănh Kôranh Brah ôh nâm bu phung ƀaƀă tâm khân păng, jêh ri khân păng khĭt đah nau bêh chôk.

¹⁰ Jêh ri lơi ngơi ƀŭk dŭk suyh ôh nâm bu phung ƀaƀă tâm khân păng, jêh ri khân păng khĭt đah ti tông mpăr ƀư rai.

¹¹ Lĕ rngôch nau nây tât geh ma khân păng nâm bu du nau nti, jêh ri bu nchih jêh gay lah lor ma he jêng phung gŭ êp nar dăch lôch.

¹² Pôri, mbu nơm mĭn păng dâk nâp, djôt prăp hom klach prah jŭr.

¹³ Lĕ nau rlong uănh tât ma khân may, mâu geh du ntil nau rlau ir nau dăng kon bunuyh. Brah Ndu jêng Nơm răp jăp, Păng mâu ăn ma khân may geh nau rlong uănh rlau ir ma n'hâm ktang khân may ôh! Ƀiălah tâm nau rlong uănh, Păng mra pơk trong ma khân may luh, gay ma khân may dơi dơn.

Nơng ƀư brah ma Kôranh Brah tâm rdâng đah nơng ƀư brah phung bu năch

¹⁴ Yor ri yơh, hơi phung gâp rŏng ơi, du ngai hom đah nau mbah rup brah.

¹⁵ Gâp ngơi ma khân may tâm ban ma phung blau mĭn; ăn khân may sek uănh êng ma nau gâp lah.

¹⁶ Kachok nau ueh maak he lah ueh, mâu di hĕ păng jêng geh du kô̆ tâm mham Brah Krist? Piăng let he nkê̆ch nây mâu di hĕ jêng du kô̆ tâm săk jăn Brah Krist?

¹⁷ Yorlah geh knŏng du mlâm piăng let, jêh ri lĕ rngôch he tâm pă ndrel piăng let nây, pôri nđâp he jêng âk knŏng jêng du săk jăn dơm.

¹⁸ Uănh hom ma phung Israel tĭng nâm nglay săk: Mâu di hĕ phung sa puăch mpa ƀư brah geh du kô̆ đah nơng ƀư brah?

¹⁹ Moh nau mĭn gâp lah pônây? Moh khlay ndơ ƀư brah ma rup brah, mâu lah rup brah nây geh nau khlay lĕ?

²⁰ Mâu geh khlay ôh! Lĕ ndơ phung bu năch ƀư brah jêng ƀư brah ma phung brah mhĭk, mâu di nhhơr ma Brah Ndu ôh. Pôri, gâp mâu ŭch ôh khân may geh du kô̆ đah phung brah mhĭk.

²¹ Khân may mâu dơi nhêt kachok Kôranh Brah jêh ri nhêt đŏng kachok phung brah mhĭk. Khân may mâu dơi râng nhêt sông Kôranh Brah jêh ri râng nhêt sông phung brah mhĭk.

²² Mâu lah he ŭch ƀư ma Kôranh Brah ntôn lĕ? He ktang lơn ma Păng lĕ?

Nau kơl ma bunuyh rdja

²³ “Lĕ ntil ndơ dơi ƀư,” ƀiălah mâu di lĕ ntil ndơ geh khlay da dê. “Lĕ ntil ndơ ƀư” ƀiălah mâu di lĕ ntil ndơ ndâk njêng da dê.

²⁴ Lơi ăn du huê joi nau maak ma păng nơm ôh ƀiălah joi hom nau ueh ma phung chiau meng păng.

²⁵ Ăn khân may sa ndơ bu tăch ta ngih tăch drăp, mâu geh nau ôp yor nuih n'hâm sŏng ôh.

²⁶ Yorlah: “Neh ntu jêng ndơ Kôranh Brah jêh ri lĕ rngôch ndơ tâm Păng.”

²⁷ Tơlah du huê mâu chroh jă khân may sông sa jêh ri khân may ŭch hăn, sa hom lĕ rngôch ndơ bu mra thai ma khân may mâu geh ôp yor nuih n'hâm sŏng ôh.

²⁸ Ƀiălah, tơlah du huê lah ma khân may: “Aơ jêng ndơ nhhơr jêh ma brah,” lơi ta khân may sa ndơ nây ôh. Yor nơm nây mbơh jêh, jêh ri yor nuih n'hâm sŏng.

²⁹ Gâp mâu ngơi ma nuih n'hâm sŏng khân may ôh, ƀiălah ma nuih n'hâm sŏng bunuyh nây. Mâm ƀư nau kon me gâp geh nau phat dôih tă bơh nuih n'hâm sŏng bunuyh nây?

³⁰ Tơlah gâp hŏ lah ueh jêh nây sa, mâm ƀư gâp bu nduyh gâp ma nau sông sa gâp hŏ lah ueh?

³¹ Pôri, khân may sông sa mâu lah nhêt, mâu lah ƀư moh nau kan êng, ƀư hom lĕ rngôch yor ma nau chrêk rmah Brah Ndu.

³² Lơi ƀư nau chêh prah ma phung Yuđa, mâu lah phung Grek, mâu lah ma Phung Ngih Brah Ndu ôh.

³³ Tâm ban gâp, nsrôih n'hâm suan ƀư ueh nuih n'hâm ma lĕ rngôch bunuyh tâm ăp ntil ndơ, mâu joi kao play êng ma gâp nơm ôh, ƀiălah ma âk bunuyh gay ma khân păng geh nau rklaih.