I Kôrintô 1 - Nau Brah Ndu Ngơi 2023

I. Nau ngơi gleh ( 1:1-9 ) Ntŭk dơn samƀŭt jêh ri nau mbah jô̆ khâl

¹ Y-Pôl, tă bơh nau Brah Ndu ơm mĭn, kuăl păng jêng kôranh oh mon Brah Yêsu Krist, ndrel ma Y-Sôsthen, oh nâu he,

² nchih njuăl ma Phung Ngih Brah Ndu ta ƀon Kôrintô jêh ri ma phung geh nau kloh ueh jêh tâm Brah Yêsu Krist, dơi rnha jêng phung kloh ueh, nđâp ma lĕ rngôch phung gŭ lam ntŭk dôl mbơh sơm ma amoh Kôranh Brah he jêng Brah Yêsu Krist, Kôranh Brah khân păng jêh ri Kôranh Brah he.

³ Mbơh sơm dăn Brah Ndu, Mbơ̆ he, jêh ri Kôranh Brah jêng Brah Yêsu Krist ăn nau yô̆ jêh ri nau đăp mpăn ma khân may.

Nau tâm rnê lah ueh

⁴ Gâp tâm rnê lah ueh ma Brah Ndu mro yor khân may, yorlah Păng ăn nau yô̆ ma khân may tâm Brah Yêsu Krist;

⁵ yorlah tâm Păng, khân may geh nau rmeh ler ma lĕ nau kan, lĕ nau ngơi jêh ri nau gĭt rbăng —

⁶ nâm bu nau mbơh nkoch ma Brah Krist dơi ƀư nâp jêh tâm phung khân may —

⁷ gay ma khân may mâu pưt ôh du ntil nau yô̆ tâm nau rêh huêng, tâm nôk gŭ kâp Kôranh Brah he tâm mpơl jêng Brah Yêsu Krist.

⁸ Brah Ndu mra djôt prăp khân may nâp tât lôch, gay ma mâu geh nau nduyh tâm nar Kôranh Brah he jêng Brah Yêsu Krist.

⁹ Brah Ndu jêng Nơm răp jăp; Nơm hŏ kuăl jêh khân may ma nau tâm rnglăp ndrel đah Kon Păng jêng Brah Yêsu Krist, Kôranh Brah he.

II. Nau tâm pă mpôl jêh ri leo trong mhĭk tâm Phung Ngih Brah Ndu ta Kôrintô ( 1:10 – 6:20 ) Nau tâm rnglăp ndrel tâm Brah Krist

¹⁰ Hơi phung oh nâu, tâm amoh Kôranh Brah he jêng Brah Yêsu Krist, gâp nkah ma lĕ rngôch khân may ăn geh du nau ngơi, gay ma tâm khân may mâu geh nau tâm nkhah, ƀiălah ăn geh nau tâm rnglăp ndrel ndrăng khân may tâm nau mĭn jêh ri du nau ntrâng.

¹¹ Hơi phung oh nâu, bunuyh tâm ngih Y-Klôê mbơh jêh ma gâp gĭt tâm phung khân may geh nau tâm jin.

¹² Nau gâp ŭch ngơi yorlah ăp nơm tâm khân may lah da dê: “Gâp jêng bunuyh Y-Pôl;” mâu lah: “Gâp jêng bunuyh Y-Apôlôs;” mâu lah: “Gâp jêng bunuyh Y-Sêphas,” mâu lah: “Gâp jêng bunuyh Brah Krist.”

¹³ Di lĕ bu hŏ tâm nkhah jêh Brah Krist? Di đŏng Y-Pôl bu pâng kđĭn ta si tâm rkăng yor khân may? Mâu lah di lĕ khân may sŏk amoh Y-Pôl gay ma dơn nau ƀaptem?

¹⁴ Gâp tâm rnê lah ueh ma Brah Ndu yorlah knŏng ma Y-Krispus jêh ri Y-Gaius yơh, gâp mâu mâp ƀư ƀaptem ma du huê tâm phung khân may ôh,

¹⁵ gay ma mâu geh bunuyh dơi lah ma khân may dơn jêh nau ƀaptem ma amoh gâp.

¹⁶ Gâp hŏ ƀư ƀaptem jêh lĕ ma rnăk vâl Y-Stêphanas. Rlau ma nây, gâp mâu kah gĭt ôh gâp hŏ ƀư jêh ƀaptem ma mbu nơm êng.

¹⁷ Yorlah Brah Krist mâu ôh njuăl gâp hăn gay ƀư ƀaptem, ƀiălah gay ma mbơh nkoch Nau Mhe Mhan Ueh, mâu di ma nau blau ngơi ôh, klach lah nau brah si tâm rkăng Brah Krist mra roh nau brah.

Nau blau mĭn neh ntu jêh ri si tâm rkăng

¹⁸ Yorlah nau nti ma si tâm rkăng đah phung bunuyh rai roh jêng brŭt ndrăng; ƀiălah đah he, phung bunuyh geh tâm chuai, nây jêng nau brah Brah Ndu.

¹⁹ Yorlah geh nau nchih: “Gâp mra ƀư rai nau blau mĭn phung blau mĭn, Ngroh lơi nau gĭt rbăng phung gĭt rbăng.”

²⁰ Bunuyh blau mĭn mbah ntŭk? Phung kôranh nchih samƀŭt mbah ntŭk? Nơm blau tâm rlăch nchră tâm rnôk aơ mbah ntŭk? Mâu di hĕ Brah Ndu hŏ ƀư jêh nau blau mĭn tâm neh ntu jêng nau brŭt moih?

²¹ Yor Brah Ndu, tă bơh nau blau mĭn Păng, hŏ ƀư ma neh ntu mâu dơi dŏng nau blau mĭn êng păng nơm gay gĭt vât Păng, yor ri Brah Ndu maak dŏng nau mbơh nkoch bu uănh ma he jêng brŭt ndrăng, gay tâm rklaih phung chroh.

²² Dôl phung Yuđa dăn nau mbên khlay, phung Grek joi nau blau mĭn

²³ bi hên mbơh nkoch ma nau bu pâng Brah Krist ta si tâm rkăng, jêng nau phung Yuđa kơp mâu di, bi phung bu năch kơp jêng nau brŭt ndrăng.

²⁴ Ƀiălah ma phung bunuyh dơi kuăl jêh, lĕ phung Yuđa nđâp phung Grek, Brah Krist jêng nau brah jêh ri nau blau mĭn Brah Ndu.

²⁵ Yorlah nau bu uănh nâm bu nau brŭt ndrăng Brah Ndu jêng nau blau mĭn lơn ma kon bunuyh; nau bu uănh nâm bu nau rdja Brah Ndu jêng ktang lơn ma kon bunuyh.

²⁶ Hơi oh nâu, mĭn rvê hom dôl khân may geh nau kuăl, tâm phung khân may mâu geh âk phung blau mĭn tĭng nau di tâm rnôk aơ, mâu geh âk phung geh nau dơi toyh, mâu đŏng geh âk phung ndrŏng.

²⁷ Ƀiălah Brah Ndu hŏ săch lĕ nau rluk mâl tâm neh ntu gay ƀư bêk prêng phung blau mĭn; Brah Ndu săch jêh lĕ nau rdja tâm neh ntu gay ƀư bêk prêng phung ktang.

²⁸ Brah Ndu săch jêh lĕ nau dêh rhêt, nau bu gơm mưch tâm neh ntu, nđâp ma lĕ nau mâu geh, gay ƀư ma lĕ nau hŏ geh jêng dơm dam,

²⁹ gay lơi ăn du huê bunuyh sưr tanăp măt Brah Ndu nơm.

³⁰ Yor ma Păng khân may gŭ jêh tâm Yêsu Krist, Nơm Brah Ndu hŏ njêng nau blau mĭn, nau sŏng srăng, nau kloh ueh, jêh ri nau tâm chuai ma he;

³¹ yor ri, tâm ban ma nau nchih jêh: “Mbu nơm rnê êng, tâm rnê êng hom tâm Kôranh Brah.”