II Yôhan 1 - Nau Brah Ndu Ngơi 2023

Nau mbah jô̆ khâl

¹ Kôranh bu ranh nchih njuăl ma bu ur, nơm Brah Ndu săch jêh, ndrel ma phung kon ay jêng phung gâp rŏng tâm nau ngăn; mâu di knŏng gâp dơm ôh, ƀiălah lĕ rngôch phung gĭt năl jêh nau ngăn tâm ban lĕ,

² yor nau ngăn gŭ tâm he jêh ri mra gŭ ndrel he n'ho ro.

³ Mbơh sơm dăn nau yô̆, nau yô̆ nđach, jêh ri nau đăp mpăn bơh Brah Ndu jêng Mbơ̆, jêh ri bơh Brah Yêsu Krist, jêng Kon bơh Mbơ̆, gŭ ndrel ma he tâm nau ngăn jêh ri nau rŏng.

Nau nkah ƀư tĭng nau ngăn jêh ri nau rŏng

⁴ Gâp maak hâu ngăn ngên saơ ƀaƀă tâm phung kon ay hăn tĭng nau ngăn, tâm di tĭng nâm nau vay ntăm he sŏk dơn bơh Brah Ndu Mbơ̆.

⁵ Hơi bu ur, aƀaơ aơ gâp vơh vơl ma ay nau aơ, mâu di gâp nchih ma ay nau vay ntăm mhe ôh, ƀiălah jêng nau vay ntăm he hŏ dơn jêh ntơm bơh saơm, nây jêng he rŏng hom ndrăng he nơm.

⁶ Nau rŏng nây jêng he chuat tĭng lĕ nau vay Păng ntăm. Aơ jêng nau vay ntăm khân may hŏ tăng jêh ntơm bơh saơm, gay chuat tĭng nau nĕ.

⁷ Yor âk phung ndơm mƀruh văch jêh tâm neh ntu, jêng phung mâu dơn nanê̆ Brah Yêsu Krist văch jêh tâm nglay săk. Nây jêng nơm ndơm mƀruh jêh ri nơm tâm rdâng đah Brah Krist.

⁸ Njrăng hom, gay ma khân may mâu roh lĕ rngôch ndơ bơh kan khân may ƀư, ƀiălah dơn rĭng nau nkhôm.

⁹ Mbu nơm hăn ngai ir jêh ri mâu gŭ nâp tâm nau nti bơh Brah Krist mâu geh Brah Ndu ôh. Ƀiălah mbu nơm gŭ nâp tâm nau nti aơ, geh Brah Ndu Mbơ̆ jêh ri Brah Ndu Kon.

¹⁰ Tơlah mbu nơm hăn ta khân may, ƀiălah mâu djôt leo nau nti aơ, lơi vơt rom bunuyh nây lăp tâm ngih khân may ôh jêh ri lơi tâm mbah ôp đah păng.

¹¹ Yorlah mbu nơm tâm mbah ôp đah păng jêng geh kô̆ tâm kan djơh mhĭk păng ƀư.

¹² Gâp geh âk nau ŭch nchih ma khân may, ƀiălah gâp mâu ŭch dŏng n'ha rđaih jêh ri dak ôch ôh. Gâp kâp gân hăn chop khâl jêh ri ngơi đah khân may gay ma nau maak he geh nau nŭm rĭng.

¹³ Phung kon ruh ay, nơm Brah Ndu săch jêh, njuăl nau mbah jô̆ khâl đah ay.