II Timôthê 4 - Nau Brah Ndu Ngơi 2023

¹ Tanăp Brah Ndu jêh ri Brah Yêsu Krist, jêng Nơm mra phat dôih phung rêh jêh ri phung khĭt, jêh ri yor nau Păng tâm mpơl tât jêh ri ƀon bri hađăch Păng, gâp mbơh ăn ma may:

² Mbơh nkoch hom nau ngơi Brah Ndu, srôih hom nđâp lah tâm mông găl mâu lah mâu mông găl, sŭk nsôr hom, nduyh, n'hao nuih ma nuih n'hâm srôih jêh ri nau ntĭm nti.

³ Yorlah mra tât du rnôk phung bunuyh mâu hôm ŭch iăt nau nti nau ngăn, ƀiălah tĭng nuih n'hâm ŭch kơnh, khân păng mra tâm rgum phung kôranh nơm nti jŭm khân păng nơm gay iăt lĕ nau ƀư maak ma tôr;

⁴ khân păng nsêt tôr mâu iăt nau ngăn, ƀiălah rle n'gĭl ma lĕ nau nkoch bri tă bơh kăl e.

⁵ Ƀiălah ma kô̆ may, di keh hom tâm lĕ rngôch ndơ, srôih dơn nau hŏt rgănh, pah kan du huê nơm mbơh nkoch Nau Mhe Mhan Ueh jêh ri ƀư rĭng nau kan may nơm.

Y-Pôl dăch khĭt

⁶ Yorlah ma gâp, dôl bu nkhŭt jêh tâm ban ƀư ndơ nhhơr nhêt, nar gâp khĭt dăch jêh.

⁷ Gâp tâm lơh jêh nau tâm lơh ueh, hŏ lôch jêh nau tâm rlong nchuăt, djôt prăp jêh nau chroh.

⁸ Ntơm aƀaơ đon hađăch nau sŏng srăng rơm ndrăp jêh ma gâp; Kôranh Brah jêng kôranh phat dôih sŏng mra ăn đon nây ma gâp tâm nar nây, ƀiălah mâu di knŏng ma gâp ôh ƀiălah nđâp ma phung rŏng ma nau Păng văch.

Nau nti êng êng

⁹ Srôih văch hom ta gâp ăn gơnh;

¹⁰ Yorlah Y-Đêmas, yor păng rŏng ma rnôk aơ, chalơi jêh gâp jêh ri hăn ta ƀon Têsalônik; Y-Kresen hăn ta ƀon Galati, bi Y-Tit hăn ta n'gor Đalmati jêh.

¹¹ Knŏng hôm du huê Y-Luk gŭ ndrel ma gâp. Djôt leo hom Y-Markôs hăn tĭng ndrel ma may, yorlah Y-Markôs jêng khlay ma nau gâp pah kan.

¹² Gâp njuăl jêh Y-Tikikus hăn ta ƀon Êphêsô.

¹³ Lah may văch, kah gĭt djôt ao mbâl gâp ăn tâm ngih Y-Karpus, ta ƀon Trôas, jêh ri ndrom samƀŭt đŏng, khlay rlau lơn jêng lĕ ndrom samƀŭt ƀư ma ntâu.

¹⁴ Y-Aleksandrơ, bunuyh blau chiăr kông, ƀư jêh âk nau mhĭk ma gâp; Kôranh Brah mra mplơ̆ ma păng tĭng nâm kan păng pah.

¹⁵ Nđâp ma may nơm njrăng đŏng ma nơm nây, yorlah păng tâm rdâng hâu ngăn ma nau he mbơh nkoch.

¹⁶ Lah gâp koh dŏng ma gâp nơm tơ̆ tal nguay, mâu geh nơm kơl an gâp ôh; lĕ rngôch chalơi gâp da dê. Dăn Kôranh Brah lơi ndăng mâu lah nduyh ôh nau nây ma khân păng!

¹⁷ Ƀiălah Kôranh Brah dâk êp meng gâp jêh ri ăn nau dơi ma gâp, gay gâp dơi mbơh nkoch Nau Mhe Mhan Ueh tâm nau ƀư rĭng ma lĕ rngôch phung bu năch tăng, jêh ri gâp geh nau rklaih bơh trôm mbung yau mŭr.

¹⁸ Kôranh Brah mra rklaih gâp bơh lĕ nau mhĭk jêh ri djôt leo gâp lăp tâm ƀon bri hađăch Păng klơ trôk. Mbơh sơm dăn nau chrêk rmah jêng ndơ Păng n'ho ro mâu blau lôch ôh! Amen.

¹⁹ Dăn njuăl nau mbah jô̆ khâl ma H'Phrisil jêh ri Y-Akilas, jêh ri rnăk vâl Y-Ônêsiphor.

²⁰ Y-Êrastus hôm gŭ ta ƀon Kôrintô, jêh ri Y-Trôphim dôl geh nau ji, gâp ăn păng gŭ ta ƀon Milêt.

²¹ Ăn may srôih văch lor ta yan puh. Y-Ơƀulus, Y-Puden, Y-Linus, Y-Klôdia jêh ri lĕ rngôch phung oh nâu njuăl nau mbah jô̆ khâl may.

²² Dăn Kôranh Brah gŭ ndrel ma huêng may! Dăn nau yô̆ gŭ ndrel ma khân may!