II Timôthê 3 - Nau Brah Ndu Ngơi 2023

Nau mbơh lor ma nau djơh mhĭk tâm nau rêh

¹ Ăn may gĭt năl tâm lĕ nar nglĕ dŭt, mra geh âk tâm rnôk jêr ngăn.

² Yorlah bunuyh mra jêng mbeh nkrêp, rŏng ma prăk, blau khư êng, sưr rlau, ngơi djơh, mâu tông bâr mê̆ mbơ̆, mâu kah gĭt tôr, mâu kloh ueh,

³ mâu geh nau rŏng ma bu, mâu gĭt yô̆, ngơi nchơt, brŭt ndrăng, janh ngăn, tâm rmot ma nau ueh,

⁴ ƀlăch ƀlêr, gơnh nuih, bêng ma nau sưr, ŭch ma nau pâl maak rlau lơn ma rŏng Brah Ndu,

⁵ tâm mpơl nau klach yơk padih, ƀiălah dun lơi nau brah ma nau klach yơk nây. Ăn may der ngai bơh phung kơt nây.

⁶ Tâm phung khân păng geh ƀaƀă lăp ntŭng tâm ngih bu, ndơm phung bu ur geh nau mĭn tŭp tâm nau tih, geh nau nchâp ăp ntil bơh nau nglay săk ŭch,

⁷ nti ƀaƀơ, ƀiălah mâu mâp gĭt năl ma nau ngăn.

⁸ Kăl e Y-Janes jêh ri Y-Jambrê tâm rdâng đah Y-Môis, tâm ban lĕ phung bunuyh aơ tâm rdâng đah nau ngăn. Nây jêng phung bunuyh geh nau mĭn djơh mhĭk jêh ri nau chroh rdja.

⁹ Ƀiălah khân păng mâu mra hăn ngai lơn ôh, yorlah nâm bu tât jêh ma bar hê nây, nau brŭt rluk khân păng mra tâm mpơl rah vah ma lĕ rngôch bunuyh.

¹⁰ Bi ma may, may tĭng jêh nau ntĭm nti, nau gŭ ngao, nau ŭch gŭ rêh, nau chroh, nau srôih, nau rŏng, nuih n'hâm gâp nâp;

¹¹ tâm ban đŏng tâm lĕ nau bu ƀư mhĭk, nau rêh ni hŏ tât ma gâp ta ƀon Antiôs, Ikôni, jêh ri ta ƀon Listrơ. Gâp dơn jêh lĕ nau bu ƀư mhĭk nây, ƀiălah Kôranh Brah tâm rklaih jêh gâp ƀaƀơ bơh lĕ nau nây.

¹² Nanê̆ ngăn, mbu nơm ŭch gŭ rêh nau rêh klach yơk tâm Brah Yêsu Krist mra dơn nau bu ƀư mhĭk.

¹³ Ƀiălah phung janh ƀai, phung mƀruh mra lơ nar lơ hâu mhĭk lơn đŏng, ndơm mƀruh bu jêh ri bu ndơm mƀruh tay đŏng.

Nau nkah Y-Timôthê ma Nau Brah Ndu Ngơi

¹⁴ Bi ma may, djôt nâp hom lĕ nau may nti jêh jêh ri chroh nanê̆, yorlah may gĭt may hŏ nti jêh tă mbu nơm lĕ nau nây,

¹⁵ jêh ri bơh rnôk may hôm jêng kon se may gĭt jêh Nau Brah Ndu Ngơi ơm geh dơi ƀư ăn may blau mĭn gay geh nau tâm rklaih yor ma nau chroh tâm Brah Yêsu Krist.

¹⁶ Lĕ Nau Brah Ndu Ngơi bơh Brah Ndu nsŭk nsôr, geh khlay ma nau ntĭm nti, nduyh, nkra jêh ri sâm nti bu tâm nau sŏng srăng,

¹⁷ gay ma bunuyh Brah Ndu geh nau gĭt blau jêh ri rơm ndrăp jêh ma lĕ kan ueh.