II Timôthê 2 - Nau Brah Ndu Ngơi 2023

Nau jâk jêr phung pah kan ma Kôranh Brah

¹ Pôri hơi kon, rnơm hom nau yô̆ tâm Brah Yêsu Krist gay ma ƀư ktang ma may nơm.

² Lĕ nau may tăng jêh bơh gâp ta năp âk bunuyh mbơh, jao hom ma phung bunuyh geh nau răp jăp ngăn, jêng phung bunuyh geh nau blau nau ntĭm nti ma phung ƀaƀă.

³ Dơn hom nau rêh ni ndrel ma gâp tâm ban ma du huê tahan janh ktang Brah Yêsu Krist.

⁴ Mâu geh ôh du huê tahan dôl ƀư nau kan ƀiălah hôm văk nau kan tâm nau rêh aơ, yorlah ntŭk ntrâng păng jêng ƀư maak nuih n'hâm ma nơm sŏk dŏng păng nơm.

⁵ Kơt nây đŏng, du huê nơm tâm rlong mâu mra dơn đon hađăch tơlah păng mâu nsrôih rlong di tĭng nâm nau vay.

⁶ Nơm kan mir rgănh pah kan, mra dơn kao play lor lơn.

⁷ Mĭn rvê hom nau gâp lah jêh, yorlah Kôranh Brah mra ăn ma may nau gĭt rbăng tâm lĕ rngôch kan.

⁸ Ăn may kah gĭt ma Brah Yêsu Krist jêng noi deh Y-Đavit, Păng dâk rêh tay jêh tă bơh nau khĭt tĭng nâm Nau Mhe Mhan Ueh gâp hŏ mbơh nkoch.

⁹ Yor ma Nau Mhe Mhan Ueh nây gâp dơn nau rêh ni, kŏ tât nkông rse rvăk nâm bu bunuyh ƀư tih. Ƀiălah nau chroh Brah Ndu mâu geh rse rvăk ôh.

¹⁰ Pôri, yorlah phung bunuyh geh nau săch jêh, gâp srôih dơn lĕ ntil ndơ gay ma khân păng dơn đŏng nau tâm rklaih Brah Yêsu Krist, đah nau chrêk rmah n'ho ro.

¹¹ Nau ngơi aơ jêng nanê̆ ngăn: Tơlah he khĭt jêh ndrel ma Păng, He mra gŭ rêh đŏng ndrel ma Păng;

¹² Tơlah he srôih dơn nau rêh ni, He mra chiă uănh đŏng ndrel ma Păng; Tơlah he dun Păng, Păng mra dun he đŏng;

¹³ Tơlah he mâu gŭ răp jăp, Păng ăt gŭ răp jăp; Yorlah Păng mâu dơi dun ma Păng nơm ôh.

¹⁴ Nkah hom ma khân păng lĕ nau aơ; tanăp Brah Ndu, mbơh hom ma khân păng der ngai nau tâm rlăch ma rplay ngơi, nây jêng nau mâu khlay ôh, knŏng ƀư nau mhĭk tât ma mbu nơm gŭ iăt dơm.

¹⁵ Nsrôih pah kan hom gay ma maak nuih n'hâm Brah Ndu tâm ban bunuyh pah kan mâu mra geh nau đit prêng ôh, ma nau sŏng gay ma nti lah nau ngăn.

¹⁶ Der hom lĕ nau ngơi lă lêng mâu geh nau khlay; yorlah mbu nơm ngơi tâm ban pônây mra lơ hô hăn jru lơn tâm trong mâu blau yơk,

¹⁷ jêh ri nau khân păng ngơi nâm bu nau ôm lơ hô. Tâm phung khân păng geh Y-Himênê jêh ri Y-Philêt,

¹⁸ khân păng hăn teng bơh nau ngăn, lah khân păng ngơi nau dâk rêh tay lĕ rlau jêh. Khân păng ƀư rgâl ma nau chroh bunuyh ƀaƀă.

¹⁹ Ƀiălah, nau mbon lĕ nâp Brah Ndu ăt gŭ nâp, ma nau tâp pŏng pô aơ: “Kôranh Brah gĭt năl phung bunuyh jêng phung Păng;” jêh ri: “Mbu moh kuăl mbơh sơm amoh Kôranh Brah, ăn der ngai bơh nau mâu di.”

²⁰ Tâm du mlâm ngih toyh, mâu knŏng geh ndô ndơ ƀư ma mah, ƀư ma prăk, ƀiălah geh ndô ndơ ƀư ma si jêh ri ƀư ma neh đŏng; geh ndơ bu dŏng tâm kan khlay, geh ndơ bu dŏng ma kan jê̆ lê̆.

²¹ Yor ri, tơlah bu ƀư kloh păng nơm bơh lĕ nau ƀơ̆ ƀơch nây, păng mra plơ̆ jêng ndô ndơ ma nau khlay, geh nau kloh ueh, geh nau khlay ma kôranh păng jêh ri rơm ndrăp jêh ma lĕ kan ueh.

²² May der ngai hom lĕ nau kơnh phung druh ndăm ŭch, jêh ri tĭng joi nau sŏng srăng, nau chroh, nau rŏng, nau đăp mpăn ndrel ma phung kuăl mbơh sơm ma Kôranh Brah ma nuih n'hâm kloh.

²³ Dun hom ma lĕ nau tâm rlăch brŭt rluk jêh ri nau rluk ngăn, yorlah may gĭt jêh, lĕ nau nây ƀư ăn ma nau tâm djrel dơm.

²⁴ Oh mon Kôranh Brah mâu dơi tâm rlăch ôh, ƀiălah ăn geh nau dơh dăch đah lĕ rngôch, geh nau blau nti lah, blau ŭn nuih,

²⁵ nkra nti phung tâm rdâng đah păng nơm ma nau rdơ̆ rbăn, ŭch ma Brah Ndu kơl khân păng rmal nau tih, gĭt năl nau ngăn,

²⁶ jêh ri kah gĭt gay klaih bơh dăk brah mhĭk sân, yorlah brah mhĭk nhŭp kât khân păng gay ƀư tĭng nau păng ŭch.