II Timôthê 1 - Nau Brah Ndu Ngơi 2023

Nau mbah jô̆ khâl

¹ Y-Pôl, kôranh oh mon Brah Yêsu Krist, tĭng nâm nau mĭn Brah Ndu ŭch, tĭng nau ton ăn ma nau rêh tâm Brah Yêsu Krist,

² nchih njuăl samƀŭt ma Y-Timôthê, kon gâp rŏng hâu ngăn ngên: Mbơh sơm dăn Brah Ndu, jêng Mbơ̆, jêh ri Brah Yêsu Krist, Kôranh Brah he, ăn nau yô̆, nau yô̆ nđach jêh ri nau đăp mpăn ma may!

Nau rŏng Y-Pôl đah Y-Timôthê

³ Gâp lah ueh ma Brah Ndu, jêng Nơm gâp pah kan ma nuih n'hâm kloh tâm ban phung chô yau gâp hŏ ƀư jêh, lĕ măng nâm nar, gâp kah gĭt ma may ƀaƀơ dôl gâp mbơh sơm.

⁴ Lah gâp kah gĭt ma dak măt may, gâp ŭch gơnh hăn chop khâl may gay ma nuih n'hâm gâp bêng ler ma nau răm maak.

⁵ Gâp ăt kah gĭt đŏng ma nau chroh may răp jăp ngăn, jêng nau chroh geh lor tâm H'Lôis, u may, jêh ri tâm H'Ơnis, mê̆ may; gâp gĭt ngăn jêh ma nau chroh nây nar aơ gŭ tâm may.

Nau n'hao nuih n'hâm

⁶ Yor ri, gâp nkah may ăn ntrôt tay nau dơi ăn tă bơh Brah Ndu may sŏk dơn jêh tâm nau gâp pah ti;

⁷ yorlah Brah Ndu mâu ăn ôh ma he nuih n'hâm klach, ƀiălah nuih n'hâm janh, geh nau rŏng jêh ri blau mât njrăng săk.

⁸ Pôri, may lơi đit prêng ôh nôk mbơh nkoch Kôranh Brah he, mâu đŏng đit prêng ma gâp, nơm bu nă Păng; ƀiălah nsing hom nau brah Brah Ndu, ndrel ma gâp dơn nau rêh ni yor Nau Mhe Mhan Ueh.

⁹ Brah Ndu tâm rklaih jêh he, kuăl jêh he ma nau kuăl kloh ueh, mâu di ôh yor nau he kan, ƀiălah tĭng nâm nau ŭch êng Păng jêh ri nau yô̆ Păng ăn jêh ma he ntơm bơh lor lĕ rngôch rnôk tâm Brah Yêsu Krist.

¹⁰ Nau yô̆ nây aƀaơ aơ tâm mpơl ma nau Brah Yêsu Krist văch jêh, Nơm Tâm Rklaih he, Nơm ƀư rai jêh nau khĭt, sŏk Nau Mhe Mhan Ueh tâm mpơl jêh nau rêh jêh ri nau mâu blau khĭt.

¹¹ Yorlah Nau Mhe Mhan Ueh aơ yơh, gâp geh nau săch jêng bunuyh mbơh nkoch, kôranh oh mon jêh ri kôranh nti;

¹² nây yơh jêng nau gâp dơn nau rêh ni. Ƀiălah gâp mâu đit prêng ôh, yorlah gâp gĭt ma mbu Nơm gâp chroh, jêh ri gâp gĭt ngăn ma Nơm nây geh nau brah king n'gang ndơ gâp jao jêh kŏ tât nar nây.

¹³ Ma nau chroh jêh ri nau rŏng tâm Brah Yêsu Krist, djôt prăp hom lĕ nau ntĭm nti sŏng may nti jêh tă bơh gâp gay ma ƀư nau bu kơt.

¹⁴ Rnơm hom Brah Huêng Ueh, Nơm dôl gŭ tâm he, gay ma djôt prăp ndơ ueh jao jêh ma may.

¹⁵ May gĭt jêh lĕ phung tâm n'gor Asi chalơi jêh gâp; tâm phung nây geh Y-Phigel jêh ri Y-Hêrmôgen.

¹⁶ Dăn Kôranh Brah yô̆ nđach ma rnăk vâl Y-Ônêsiphor, yorlah păng n'hao nuih jêh gâp âk tơ̆, mâu mâp đit prêng ôh dôl gâp gŭ tâm rse rvăk;

¹⁷ ƀiălah, lah păng tât jêh ta ƀon Rôm, păng joi gâp ma nau ndal, jêh ri joi saơ gâp.

¹⁸ Mbơh sơm dăn Kôranh Brah ăn ma păng geh nau yô̆ nđach tă bơh Kôranh Brah tâm Nar nây! May gĭt ngăn jêh nôk gâp gŭ ta ƀon Êphêsô, păng pah kan ma gâp lĕ nuih n'hâm.