II Têsalônik 3 - Nau Brah Ndu Ngơi 2023

Kuăl tâm kơl mbơh sơm jêh ri pah kan. – Nau mbah jô̆ khâl

¹ Nglĕ dŭt, hơi phung oh nâu, mbơh sơm hom ma hên, gay ma nau ngơi Kôranh Brah mbơh nkoch gơnh ro jêh ri geh nau yơk nâm bu hŏ geh tâm khân may,

² jêh ri gay ma hên geh nau rklaih bơh phung bunuyh ƀai jêh ri djơh mhĭk; yorlah mâu di lĕ rngôch geh nau chroh da dê.

³ Kôranh Brah jêng răp jăp, Păng mra ƀư ma khân may ăn dăng jêh ri king n'gang khân may klaih bơh nơm djơh mhĭk.

⁴ Tâm Kôranh Brah, hên rnơm nanê̆ pô aơ ma khân may dôl ƀư jêh ri mra ƀư lĕ nau hên ntĭm nti jêh.

⁵ Dăn Kôranh Brah leo ntĭm nuih n'hâm khân may văch ma nau Brah Ndu rŏng jêh ri ma nau srôih tâm Brah Krist!

⁶ Hơi phung oh nâu, tâm amoh Kôranh Brah he jêng Brah Yêsu Krist, khân may nkah phung oh nâu der ngai hom đah phung oh nâu gŭ rêh ƀlao pah kan, mâu tĭng lĕ nau ntĭm nti ƀiălah khân may hŏ sŏk dơn jêh bơh hên.

⁷ Khân may nơm gĭt jêh mâm ƀư gay tĭng kơt hên; yorlah lah gŭ ndrel ma khân may, hên mâu ôh gŭ rêh ƀlao pah kan,

⁸ mâu sa dơm ndơ bu ôh. Ƀiălah, hên măng nar pah kan tâm nau hŏt, hŏt ra ah, gay mâu ƀư ôh nau jâk jêr ma du huê tâm phung khân may.

⁹ Mâu di ôh hên mâu geh nau dơi dơn nau nkhôm, ƀiălah hên ŭch ƀư leo trong gay khân may tĭng.

¹⁰ Tâm dôl hên gŭ ndrel khân may, hên đă jêh khân may pô aơ: Tơlah mbu nơm mâu ŭch pah kan, lơi ăn păng sa.

¹¹ Yorlah hên tăng jêh tâm phung khân may geh bunuyh gŭ rêh tâm nau ƀlao, mâu ŭch pah kan ôh, ƀiălah ŭch rkhŭk nau bunuyh ƀaƀă.

¹² Tâm Kôranh Brah jêng Brah Yêsu Krist, hên ntrŭnh jêh ri nkah phung nây, ăn khân păng gŭ rklăk pah kan gay siăm nau rêh ma khân păng nơm.

¹³ Hơi phung oh nâu, lơi rdja nuih n'hâm nôk khân may ƀư kan ueh.

¹⁴ Tơlah mbu moh mâu tông tĭng nau hên lah tâm samƀŭt aơ, njrăng hom jêh ri lơi tâm rnglăp ôh đah khân păng, gay ma păng geh nau bêk prêng.

¹⁵ Nđâp lah kơt nĕ, lơi uănh ma khân păng nâm bu du huê rlăng ôh; ƀiălah, ntĭm hom nâm bu du huê oh nâu nơm.

¹⁶ Mbơh sơm dăn Kôranh Brah nau đăp mpăn ăn nau đăp mpăn ma khân may ƀaƀơ jêh ri tâm lĕ rngôch nau! Dăn Kôranh Brah gŭ ndrel ma lĕ rngôch khân may!

¹⁷ Gâp aơ, Y-Pôl, ma ti gâp nơm kach nau mbah jô̆ khâl aơ. Aơ jêng rplay gâp nchih amoh tâm lĕ rngôch n'ha samƀŭt; gâp vay kach amoh tâm ban kơt nây.

¹⁸ Mbơh sơm dăn nau yô̆ bơh Kôranh Brah he jêng Brah Yêsu Krist gŭ ndrel ma lĕ rngôch khân may!