II Têsalônik 2 - Nau Brah Ndu Ngơi 2023

Mpơl nơm rdâng đah Kôranh Brah

¹ Hơi phung oh nâu, nau plơ̆ văch Kôranh Brah he jêng Brah Yêsu Krist, jêh ri nau rgum he ndrel ma Păng, hên dăn khân may

² lơi ir uh ah nuih n'hâm mâu lah klach bơh brah djơh, bơh nau ngơi mâu lah ma samƀŭt njuăl ntôn lah nâm bu luh tă bơh hên njuăl, lah ma nar Kôranh Brah tât jêh.

³ Lơi ăn bu ndơm mƀruh khân may. Yorlah mƀăr lơi nau chroh mra tât lor, jêh ri kon bunuyh djơh mhĭk, kon nau rai roh, mra tâm mpơl;

⁴ nâm bu ntĭt nơm tâm rdâng, n'hao êng păng nơm ta klơ ma lĕ rngôch nau bu rnha jêng brah mâu lah ma ndơ bu yơk mbah, kŏ tât păng gŭ tâm ngih Brah Ndu, kơp êng păng nơm jêng Brah Ndu.

⁵ Khân may mâu kah gĭt pô aơ dôl gâp gŭ ndrel ma khân may, gâp lah jêh ma khân may nau aơ?

⁶ Jêh ri aƀaơ khân may gĭt jêh ndơ nkân lơi gay păng knŏng tâm mpơl di rnôk nal ma păng.

⁷ Yorlah nau dăng ndâp bơh nau tih mhĭk ntơm pah kan jêh; ƀiălah Nơm nkân păng aƀaơ aơ ăt pah kan kŏ tât nar Bunuyh bu dơi sŏk.

⁸ Rnôk nây phung djơh mhĭk mra tâm mpơl, jêh ri Kôranh Brah jêng Brah Yêsu mra nkhĭt ăn khĭt păng ma n'hâm bơh trôm mbung Păng, ƀư rai păng ma nau chrêk rmah nôk Păng plơ̆ văch.

⁹ Bơh nau pah kan Satan, nơm djơh mhĭk mra tâm văch ma lĕ rngôch nau brah tâm ban đŏng lĕ nau khlay, nau mbên khlay mƀruh ndơm;

¹⁰ păng dŏng lĕ rngôch nau plĕch rlăm djơh mhĭk gay ndơm phung rai yot, yorlah khân păng mâu sŏk dơn ôh nau rŏng tâm nau ngăn gay dơn nau tâm rklaih.

¹¹ Yor nây, Brah Ndu jao khân păng tâm nau vĭ ngăn, ƀư ăn khân păng chroh ma nau mƀruh ndơm,

¹² gay ma lĕ rngôch bunuyh mâu chroh ma nau ngăn, ƀiălah ŭch rŏng ma nau djơh mhĭk mra dơn nau tâm rmal.

¹³ Hơi phung oh nâu jêng phung Kôranh Brah rŏng, hên ŭch lah ueh ma Brah Ndu ƀaƀơ ma khân may, yorlah ntơm saơm Brah Ndu săch jêh gay ăn nau tâm rklaih ma khân may, tă nau kloh ueh bơh Brah Huêng Ueh jêh ri nau chroh tâm nau ngăn.

¹⁴ Yor nau nây đŏng, Păng hŏ dŏng Nau Mhe Mhan Ueh hên kuăl khân may gay dơn nau chrêk rmah bơh Kôranh Brah he jêng Brah Yêsu Krist.

¹⁵ Pônây, hơi khân may, gŭ nâp hom jêh ri tông prăp hom lĕ nau ntĭm nti hên hŏ nti ma khân may, mâu lah ma nau ngơi, mâu lah ma nau samƀŭt.

¹⁶ Dăn Kôranh Brah he, jêng Brah Yêsu Krist nơm jêh ri Brah Ndu, Mbơ̆ he, Nơm rŏng jêh ma he, jêh ri bơh nau yô̆ ăn ma he nau bonh leng n'ho ro jêh ri nau kâp gân ueh,

¹⁷ n'hao nuih n'hâm khân may, ƀư ma khân may ăn dơi nâp tâm lĕ kan jêh ri nau ngơi ueh!