II Têsalônik 1 - Nau Brah Ndu Ngơi 2023

Nau mbah jô̆ khâl

¹ Y-Pôl, Y-Silvan jêh ri Y-Timôthê nchih samƀŭt njuăl ma Phung Ngih Brah Ndu ta ƀon Têsalônik gŭ tâm Kôranh Brah jêng Brah Yêsu Krist:

² Dăn Brah Ndu, Mbơ̆ he, jêh ri Kôranh Brah jêng Brah Yêsu Krist ăn nau yô̆ jêh ri nau đăp mpăn ma khân may!

Nau phung Têsalônik chroh nâp. – Nau phat dôih nôk Kôranh Brah plơ̆ văch

³ Hơi phung oh nâu, ăn hên lah ueh ma Brah Ndu ƀaƀơ yor ma khân may; jêh ri nau aơ jêng di ngăn, yorlah nau chroh khân may văch ma toyh âk ngăn, jêh ri nau rŏng ăp nơm tâm khân may đah ndrăng khân may nơm lơ hô văch ma toyh lơn.

⁴ Hên tâm rnê êng yor khân may tâm lĕ Phung Ngih Brah Ndu, ma nau srôih jêh ri nau chroh khân may tâm lĕ nau ƀư mhĭk jêh ri nau rêh ni khân may dơn jêh.

⁵ Aơ jêng nau mbơh ma nau Brah Ndu phat dôih sŏng, gay ma khân may plơ̆ jêng nau khư ma ƀon bri hađăch Brah Ndu, jêh ri yor nây khân may dơn nau rêh ni.

⁶ Tĭng nau sŏng Brah Ndu, nanê̆ Păng mra sŏk nau rêh ni har plơng ma phung ƀư rêh ni ma khân may;

⁷ jêh ri ma khân may jêng phung dơn nau rêh ni geh nau rlu ndrel ma hên, tâm nar Kôranh Brah jêng Brah Yêsu mra tâm mpơl bơh trôk ta nklang chiông ŭnh hit, ndrel ma phung tông mpăr bêng nau dơi Păng.

⁸ Păng mra tâm rmal phung mâu gĭt năl Brah Ndu jêh ri mâu tông bâr ma Nau Mhe Mhan Ueh bơh Kôranh Brah he jêng Brah Yêsu.

⁹ Khân păng mra geh nau tâm rmal roh rai n'ho ro, tâm nkhah bơh muh măt Kôranh Brah jêh ri bơh nau chrêk rmah nau brah Păng

¹⁰ tơlah Păng plơ̆ văch tâm nar nây, gay geh nau tâm rnê ta nklang phung kloh ueh Păng jêh ri lĕ rngôch phung chroh geh nau n'gơr uănh, tâm nây geh khân may, yor ma khân may chroh jêh ma nau hên mbơh tanăp măt khân may.

¹¹ Yor ri, hên mbơh sơm ma khân may ƀaƀơ, gay ma Brah Ndu he ƀư ma khân may khư ma nau Păng kuăl, jêh ri yor ma nau brah Păng gay ƀư lôch jêh lĕ nau ŭch mĭn ueh jêh ri kan nau chroh khân may;

¹² kŏ tât amoh Kôranh Brah he jêng Brah Yêsu geh nau tâm rnê tâm khân may, jêh ri khân may tâm Păng, tĭng nâm nau yô̆ bơh Brah Ndu he jêh ri bơh Kôranh Brah jêng Brah Yêsu Krist.