II Samuel 9 - Nau Brah Ndu Ngơi 2023

Y-Đavit jêh ri Y-Mêphibôset

¹ Rnôk nây, Y-Đavit lah: “Geh bunuyh hôm rêh lĕ bơh ngih Y-Sôl?” Gâp ŭch ƀư ueh ma păng yor tă bơh Y-Jônathan.

² Geh du huê oh mon tâm ngih Y-Sôl, amoh Y-Siba; bu kuăl păng hăn ma Y-Đavit. Hađăch ôp: “May jêng Y-Siba lĕ?” Păng plơ̆ lah: “Di ngăn, gâp aơ, jêng oh mon hađăch.”

³ Hađăch lah tay: “Hôm e lĕ du huê tâm ngih Y-Sôl? Gâp ŭch sŏk nau ueh Brah Ndu gay ăn ma păng?” Y-Siba lah ma hađăch: “Y-Jônathan hôm e geh du huê kon bu klâu păng rvĕn lĕ bar jâng.”

⁴ Hađăch ôp: “Ta ntŭk păng?” Y-Siba lah: “Păng gŭ tâm ngih Y-Makir, kon Y-Amiêl, ta Lôdêbar.

⁵ Pôri, hađăch Đavit prơh bunuyh hăn tât ta ngih Makir, kon Y-Amiêl, gŭ ta Lôdêbar, vơt păng plơ̆ sĭt.

⁶ Tơlah Y-Mêphibôset, kon Y-Jônathan, sau Y-Sôl, văch ma Y-Đavit jêh ri păn muh măt ta neh jêh ri mbah. Y-Đavit lah: Hơi Y-Mêphibôset!” Păng plơ̆ lah: “Aơ! Ta aơ geh oh mon hađăch.”

⁷ Y-Đavit lah ma păng: “Lơi klach ôh, yorlah gâp ŭch ƀư nau ueh ma may yor Y-Jônathan, mbơ̆ may; gâp mra mplơ̆ sĭt đŏng ma may lĕ neh Y-Sôl, che may, jêh ri may mra sông sa ta sưng sông gâp ƀaƀơ.”

⁸ Y-Mêphibôset chon mon mbah, jêh ri lah: “Gâp mâu ueh rlau lơn ma du mlâm kon so hŏ khĭt. Ơ hađăch, mâm dĭng may ƀư ueh đah gâp?”

⁹ Jêh nây hađăch kuăl Y-Siba, oh mon Y-Sôl, jêh ri lah: “Gâp ăn jêh ma kon sau kôranh may lĕ rngôch drăp ndơ Y-Sôl jêh ri lĕ ndơ ngih păng.

¹⁰ Pôri, ăn may ndrel ma phung kon bu klâu jêh ri oh mon may jik kai mir nây ma păng, jêh nây sŏk play kao gay ma kon sau kôranh may dơi geh ndơ sông sa. Bi Y-Mêphibôset, kon sau kôranh may, mra sông sa mro ta sưng sông gâp.” Rnôk nây, Y-Siba geh jât ma prăm nuyh kon bu klâu jêh ri bar jât nuyh oh mon.

¹¹ Y-Siba lah ma hađăch: “Oh mon hađăch mra ƀư lĕ nau hađăch jêng kôranh gâp ntĭnh.” Pônây Y-Mêphibôset sông sa ta sưng sông hađăch Đavit nâm du huê tâm phung kon bu klâu hađăch.

¹² Y-Mêphibôset geh du huê kon bu klâu jê̆ amoh Y-Mika. Lĕ rngôch phung gŭ tâm ngih Y-Siba jêng phung oh mon Y-Mêphibôset.

¹³ Pônây, Mêphibôset gŭ ta Yêrusalem yorlah păng dơi sông ta sưng sông hađăch, nđâp lah păng rvĕn lĕ bar jâng.