II Samuel 8 - Nau Brah Ndu Ngơi 2023

Y-Đavit dơi đah phung tahan Philistin, Môap, Aram, jêh ri phung tahan Êđôm

¹ Jêh nau nây, Y-Đavit dơi đah phung Philistin, tŭn jot khân păng jêh ri pit sŏk nau dơi chiă uănh lĕ ƀon tă bơh ti phung Philistin.

² Hađăch dơi đah phung tahan Môap, đă khân păng bê̆ch ta klơ neh jêh ri veh ma rse: veh bar bông rse jêh ri nkhĭt, veh du bông rse ăn ma rêh. Pôri ăn phung Môap pah kan jêh ri chê̆ pi ma Y-Đavit.

³ Y-Đavit dơi lơh đŏng hađăch n'gor Sôba jêng Y-Hadadêser, kon Y-Rêhôp, dôl hađăch nây hăn gay ndâk đŏng nau chiă uănh ta n'gor dak krong Ơphrat.

⁴ Y-Đavit nhŭp du rbăn pơh rhiăng phung tahan ncho seh jêh ri bar rmưn tahan hăn jâng bơh hađăch Sôba jêh ri sreh jâng jon lĕ rngôch seh uih ndeh, knŏng om tŏng du rhiăng bôk ndeh dơm.

⁵ Tơlah phung Aram bơh Damas văch ŭch kơl ma Y-Hadadêser, hađăch Sôba, Y-Đavit nkhĭt bar rmưn bar rbăn nuyh tahan tâm phung Aram.

⁶ Jêh ma nây, Y-Đavit njêng pôih ta ƀon Damas n'gor Aram; phung Aram pah kan jêh ri chê̆ pi ma Y-Đavit. Ta ntŭk Y-Đavit hăn tât, pôri Brah Yêhôva ăn păng dơi.

⁷ Y-Đavit sŏk lĕ khêl mah bơh phung oh mon Y-Hadadêser djôt jêh ri leo ndơ nây sĭt ma Yêrusalem.

⁸ Tă bơh Bêta jêh ri Bêrôthai, bar ƀon Y-Hadadêser, hađăch Đavit hŏ pit in âk ngăn kông.

⁹ Tơlah hađăch ƀon Hamat, jêng Y-Toi, tăng lư ma Y-Đavit dơi jêh đah lĕ phung tahan Y-Hadadêser,

¹⁰ Y-Toi prơh Y-Jôram, kon păng nơm, tât mbah ma hađăch Đavit, jêh ri mât ton ma păng tâm lơh jêh ri dơi jêh đah Y-Hadadêser; yorlah Y-Hadadêser vay tâm lơh đah Y-Toi. Y-Jôram djôt leo ndrel păng ndô ndơ prăk, mah, jêh ri kông ma hađăch Đavit.

¹¹ Lĕ ndơ nây tâm ban lĕ, hađăch Đavit nhhơr prăp kloh ueh ma Brah Yêhôva, nâm bu păng hŏ nhhơr prăp prăk jêh ri mah bơh phung mpôl bunuyh păng hŏ tŭn jot:

¹² Phung Aram, phung Môap, phung Ammôn, phung Philistin, jêh ri phung Amalek, jêh ri păng ƀư tâm ban lĕ ndô ndơ sŏk gro bơh Y-Hadadêser kon bu klâu Y-Rêhôp hađăch n'gor Sôba.

¹³ Jêh păng lơh nkhĭt du rmưn pham rbăn bunuyh phung Êđôm tâm rlŭng Boh jêh ri plơ̆ sĭt, Y-Đavit geh lư n'găr hâu ngăn.

¹⁴ Păng njêng pôih tâm lam n'gor Êđôm, jêh ri lĕ rngôch phung Êđôm gŭ tâm dâng Y-Đavit. Brah Yêhôva ăn nau dơi ma Y-Đavit ăp ntŭk păng hăn.

Phung kôranh tahan Y-Đavit

¹⁵ Y-Đavit chiă uănh lĕ rngôch phung Israel, ƀư nau di jêh ri nau sŏng ma lĕ rngôch phung ƀon lan.

¹⁶ Y-Jôap, kon H'Sêruya, jêng kôranh toyh ma lĕ rngôch phung tahan; Y-Jêhôsaphat, kon Y-Ahilut, jêng kôranh kâp nchih samƀŭt prăp nau tât;

¹⁷ Y-Sadôk, kon Y-Ahitup, jêh ri Y-Ahimêlek, kon Y-Abiathar, jêng phung kôranh ƀư brah; jêh ri Y-Sêraya jêng kôranh nchih samƀŭt;

¹⁸ Y-Bênaya, kon Y-Jêhôida, jêng kôranh chiă uănh ma phung Chêrêthit jêh ri phung Pêlêthit; hôm phung kon bu klâu Y-Đavit jêng kôranh ƀư brah.