II Samuel 7 - Nau Brah Ndu Ngơi 2023

Y-Đavit ndrăp ƀư ngih brah

¹ Tơlah hađăch hŏ gŭ tâm ngih păng nơm, Brah Yêhôva hŏ rklaih jêh hađăch tă bơh lĕ rngôch phung rlăng gŭ văr jŭm păng jêh ri ăn ma păng geh nau đăp mpăn,

² pôri hađăch ngơi đah nơm mbơh lor Y-Nathan: “Uănh hom, gâp gŭ tâm ngih hađăch ƀư ma tơm si sêdar, ƀiălah Hip Nau Tâm Rnglăp Brah Ndu gŭ tâm ngih bok.”

³ Y-Nathan lah ma hađăch: “Moh nau tâm nuih n'hâm hađăch ŭch ƀư, ăn ƀư hom yorlah Brah Yêhôva gŭ ndrel ma hađăch.”

Brah Yêhôva king lơi nau Y-Đavit mĭn

⁴ Ƀiălah tâm măng nây, Brah Yêhôva ngơi ma Y-Nathan:

⁵ “Hăn hom lah ma Y-Đavit, oh mon Gâp, pô aơ Brah Yêhôva lah: ‘May mra ndâk ăn ma Gâp du mlâm ngih brah gay Gâp gŭ ta nây lĕ?

⁶ May gĭt lĕ ntơm bơh nar Gâp njŭn leo phung Israel du luh bơh Êjipt kŏ tât ta nar aơ, Gâp mâu gŭ ôh ma du mlâm ngih brah, ƀiălah Gâp hăn nsong ta aơ ta ri gŭ tâm ngih bok jêh ri Ngih Bok.

⁷ Tâm lam ntŭk Gâp gŭ ta nklang phung ƀon lan Israel, Gâp ê hŏ mâp lah ma du kôranh chiă uănh tâm phung ndŭl mpôl Israel, jêng nơm rmăk biăp ma phung ƀon lan Gâp pô aơ: Mâm dĭng khân may mâu ndâk ôh ma Gâp du mlâm ngih brah ma tơm si sêdar?’

⁸ Pôri aƀaơ, lah hom ma Y-Đavit, oh mon Gâp: ‘Brah Yêhôva ma phung tahan lah: Gâp hŏ kuăl may tă bơh nklang ndrêch gơ̆, tă bơh ntŭk may chiăp biăp, gay njêng may jêng kôranh chiă uănh phung ƀon lan Israel Gâp.

⁹ Gâp hŏ gŭ ndrel ma may tâm lĕ rngôch ntŭk may hăn, ƀư rai lĕ rngôch phung rlăng may; jêh ri Gâp hŏ ƀư ăn may lư n'găr nâm bu amoh phung toyh ta neh ntu.

¹⁰ Gâp hŏ rơm ndrăp jêh ma phung ƀon lan Israel Gâp du ntŭk gŭ, Gâp mra tăm khân păng ta nây, jêh ri khân păng mra gŭ mro tâm n'gor păng nơm, mâu geh nau rŭng răng ôh; phung djơh mhĭk mâu mra hôm tŭn jot khân păng nâm bu nar kăl e,

¹¹ jêng nâm bu nôk Gâp njêng phung kôranh phat dôih chiă uănh phung ƀon lan Israel Gâp. Gâp hŏ rklaih may tă bơh lĕ rngôch phung rlăng jêh ri ăn nau đăp mpăn ma may. Rlau lơn ma nây, Brah Yêhôva lah pô aơ Păng mra ndâk ma may du nau chiă uănh.

¹² Tơlah nar may lĕ jêh, jêh ri may bê̆ch ndrel ma phung chô yau may, Gâp mra njêng noi deh may chiă uănh ntrok may, jêng noi deh may; jêh ri Gâp mra ƀư nâp ktang ma ƀon bri hađăch păng.

¹³ Păng mra ndâk du mlâm ngih brah ma amoh Gâp, jêh ri Gâp mra ƀư sưng hađăch păng nâp n'ho ro.

¹⁴ Gâp mra jêng Mbơ̆ păng, jêh ri păng mra jêng kon Gâp. Tơlah păng ƀư nau kue, Gâp mra phat dôih păng nâm bu kon bunuyh dŏng mâng rvĕ gay ntăm nti ma kon bunuyh.

¹⁵ Ƀiălah nau rŏng Gâp mâu mra du tă bơh păng nâm Gâp hŏ du tă bơh Y-Sôl, jêng nơm Gâp hŏ chalơi jêh tă bơh may.

¹⁶ Pônây, nau chiă uănh jêh ri ƀon bri hađăch may mra jêng nâp n'ho ro tanăp măt may; sưng hađăch may mra dơi nâp mro mrăng.’”

¹⁷ Y-Nathan hăn tât nkoch tay ma Y-Đavit lĕ rngôch nau ngơi tâm mpơl aơ.

Y-Đavit mbơh sơm

¹⁸ Hađăch Đavit hăn tât gŭ panăp măt Brah Yêhôva, jêh ri lah: “Hơi Kôranh Brah, Brah Yêhôva, mbu gâp jêng jêh ri mbu moh rnăk vâl gâp, dĭng May hŏ njŭn leo gâp tât ta ntŭk aơ?

¹⁹ Hơi Kôranh Brah Yêhôva, nau may lah nây jêng du ndơ jê̆ tanăp măt May, dĭng May ngơi ma ngih oh mon May ma âk rô̆ rlet kăndơ̆? Hơi Kôranh Brah Yêhôva, di lĕ aơ jêng nau vay May ƀư ma lĕ rngôch bunuyh hĕ?

²⁰ Moh nau Y-Đavit hôm dơi lah đŏng? Hơi Kôranh Brah Yêhôva! May gĭt năl jêh oh mon May.

²¹ Nây jêng nau ngơi May jêh ri tĭng nâm nuih n'hâm May nơm, May ƀư jêh lĕ nau kan toyh aơ, jêh ri mpơl ma oh mon May gĭt năl.

²² Yor ri, hơi Kôranh Brah Yêhôva! May jêng toyh, mâu geh nơm tâm rđĭl nâm bu May. Tĭng nâm lĕ nau hên tăng jêh ma tôr hên, rlau ma May mâu geh Brah Ndu êng ôh.

²³ Ta klơ neh ntu, moh phung ƀon lan tâm ban ma phung ƀon lan Israel May, jêng phung ƀon lan Brah Ndu tâm rklaih jêh gay ƀư phung ƀon lan May nơm jêh ri tâm amoh ma khân păng? May hŏ ƀư yor ma May nơm jêh ri n'gor bri May, rĭ dĭng May ƀư lĕ nau kan toyh khư ma bu klach, tơlah May hŏ mprơh jêh âk mpôl băl bunuyh êng jêh ri phung brah khân păng tă bơh tanăp măt May, jêng phung ƀon lan May hŏ sâm chuai khân păng du luh bơh Êjipt gay prăp ma May nơm.

²⁴ Yorlah May hŏ njêng phung ƀon lan Israel ƀư phung ƀon lan May n'ho ro. Ơ Brah Yêhôva! May nơm jêng Brah Ndu khân păng.

²⁵ Pônây aƀaơ, hơi Yêhôva Brah Ndu! Dăn ƀư nâp ktang kŏ tât ƀaƀơ n'ho ro lĕ nau May ngơi jêh ma oh mon May jêh ri ma nau chiă uănh păng, jêh ri ƀư di tĭng nâm nau May ngơi jêh.

²⁶ Dăn amoh May bu tâm rnê mro mrăng, jêh ri bu lah pô aơ: Brah Yêhôva ma phung tahan jêng Brah Ndu phung Israel. Ăn nau chiă uănh Y-Đavit, jêng oh mon May, dơi nâp ngăn ngên tanăp măt May!

²⁷ Hơi Brah Yêhôva ma phung tahan, jêng Brah Ndu phung Israel, May nơm hŏ lah jêh nau ton aơ ma oh mon May pô aơ: ‘Gâp mra njêng du nau chiă uănh ma may.’ Yor nây, oh mon May dơi janh nhhơr nau mbơh sơm aơ ma May.

²⁸ Aƀaơ, hơi Brah Yêhôva! May nơm jêng Brah Ndu jêh ri lĕ nau May ngơi jêng nanê̆ ngăn, May hŏ ton jêh ma oh mon May nau ueh aơ.

²⁹ Pônây, dăn Kôranh Brah ăn nau ueh uĭn ma oh mon May tâm nau chiă uănh, gay păng dơi gŭ tanăp May mra geh tât ƀaƀơ n'ho ro. Hơi Kôranh Brah Yêhôva, yorlah May nơm hŏ ngơi jêh jêh ri yor nau May yô̆ dĭng nau chiă uănh oh mon May mra geh nau ueh uĭn mro mrăng.”