II Samuel 6 - Nau Brah Ndu Ngơi 2023

Y-Đavit njŭn leo Hip Nau Tâm Rnglăp sĭt ma Yêrusalem

¹ Y-Đavit tâm rƀŭn đŏng lĕ rngôch phung bu lĕ săch tâm phung Israel, klăp lah pe jât rbăn nuyh.

² Jêh nây Y-Đavit hăn trong, nđâp ma lĕ rngôch phung tĭng ndô̆ păng tât Baale tâm Yuđa gay tung leo Hip Nau Tâm Rnglăp Brah Ndu plơ̆ sĭt. Nĕ jêng hip tuy amoh Brah Yêhôva ma phung tahan, Nơm hôm gŭ ta nklang phung chêrubim ta klơ nây.

³ Khân păng dơm Hip Nau Tâm Rnglăp Brah Ndu ta klơ ndeh ndrôk mhe, jêh nây djôt leo bơh ngih Y-Abinadap gŭ ta klơ gôl yôk. Y-Usa jêh ri Y-Ahiô, phung kon bu klâu Y-Abinadap, ƀĭt bôk ndeh mhe nây.

⁴ Khân păng leo ndeh nđâp ma Hip Nau Tâm Rnglăp Brah Ndu luh bơh ngih Y-Abinadap ta klơ gôl yôk, jêh ri Y-Ahiô hăn panăp Hip Nau Tâm Rnglăp.

⁵ Y-Đavit jêh ri lĕ rngôch ngih Israel kdŏ mprơ tanăp Brah Yêhôva ma lĕ ntil gong ƀư ma si sêdar, gong rêng, gong rêng loih, gâr jê̆, ndơ kreh lât ma nglau ti jêh ri ching ndrup tâm nchâm.

Y-Usa khĭt

⁶ Tơlah khân păng tât ta ntŭk mprah ba Y-Nakôn, Y-Usa yơr ti kuăn Hip Nau Tâm Rnglăp Brah Ndu, yorlah ndrôk chêh jâng.

⁷ Brah Yêhôva hao ji nuih ma Y-Usa. Brah Ndu rmal păng yor nau ƀư tih, jêh ri păng khĭt ta nây êp ta meng Hip Nau Tâm Rnglăp Brah Ndu

⁸ Y-Đavit nuih yorlah Brah Yêhôva hŏ ji nuih ma Y-Usa; jêh ri bu ntơ ntŭk nây jêng Pêres-Usa tât ma nar aơ.

⁹ Nar nây, Y-Đavit klach ma Brah Yêhôva jêh ri păng lah: “Mâm ƀư Hip Nau Tâm Rnglăp Brah Ndu dơi sĭt ma gâp?”

¹⁰ Yor ri Y-Đavit mâu njŭn leo ôh Hip Nau Tâm Rnglăp Brah Yêhôva plơ̆ sĭt ma păng tâm ƀon Đavit; ƀiălah njŭn leo păng lăp tâm ngih Y-Ôbet-Êđôm, bunuyh Gat.

¹¹ Pônây, Hip Nau Tâm Rnglăp Brah Yêhôva gŭ pe khay tâm ngih Y-Ôbet-Êđôm, bunuyh Gat. Brah Yêhôva ăn nau ueh uĭn ma Ôbet-Êđôm jêh ri ma lĕ ngih păng.

Bu djôt leo Hip Nau Tâm Rnglăp lăp ma ƀon Đavit

¹² Bu mbơh ma hađăch Y-Đavit, “Brah Yêhôva hŏ ăn jêh nau ueh uĭn ma ngih Ôbet-Êđôm jêh ri lĕ ndơ păng geh yor hip Brah Ndu.” Pôri, Y-Đavit hăn vơt Hip Nau Tâm Rnglăp Brah Ndu ta ngih Y-Ôbet-Êđôm plơ̆ sĭt ma ƀon Đavit ma nau răm maak.

¹³ Tơlah phung bunuyh tung Hip Nau Tâm Rnglăp Brah Ndu hŏ hăn chuat jêh prao nhuat, Y-Đavit nhhơr du mlâm ndrôk jêh ri du mlâm mpô mpa lay ueh ƀư mpa ƀư brah.

¹⁴ Y-Đavit nsoh êphôt ƀư ma bok mhay, pâl ntalơ̆ lĕ nuih n'hâm păng tanăp Brah Yêhôva.

¹⁵ Pônây, Y-Đavit jêh ri lĕ rngôch Israel njŭn leo Hip Nau Tâm Rnglăp Brah Yêhôva plơ̆ sĭt tâm nau troh nter răm rhơn jêh ri ma bâr nŭng huy ngăn.

¹⁶ Ƀiălah tơlah Hip Nau Tâm Rnglăp Brah Yêhôva lăp tâm ƀon Đavit, H'Mikal kon bu ur Y-Sôl, n'gơr uănh ta mpông bloh saơ Đavit pâl ntalơ̆ tanăp Brah Yêhôva, tâm trôm nuih n'hâm păng mưch ma hađăch.

¹⁷ Pônây, khân păng djôt leo Hip Nau Tâm Rnglăp Brah Yêhôva lăp dơm ta nklang ngih bok Y-Đavit hŏ ndâk jêh; jêh nây Y-Đavit nhhơr ndơ ƀư brah gŭch jêh ri ndơ ƀư brah ma nau đăp mpăn tanăp măt Brah Yêhôva.

¹⁸ Tơlah Y-Đavit hŏ nhhơr ndơ ƀư brah gŭch jêh ri ndơ ƀư brah ma nau đăp mpăn lôch jêh, hađăch sŏk amoh Brah Yêhôva ma phung tahan gay ăn nau ueh uĭn ma phung ƀon lan;

¹⁹ jêh ri păng tâm pă ma lĕ rngôch phung Israel, ma lĕ bu klâu nđâp bu ur, ăp nơm du glo piăng let, du mlay puăch, jêh ri ƀănh play krăk ƀâu. Pakơi nây, ăp nơm sĭt ma ngih păng nơm.

²⁰ Y-Đavit tâm ban lĕ plơ̆ sĭt gay ăn nau ueh uĭn ma phung ngih păng nơm. Ƀiălah kon bu ur Y-Sôl jêng H'Mikal văch chuă Y-Đavit jêh ri ngơi: “Nar aơ hađăch phung Israel ƀư chrêk ma lơp păng nơm ngăn, tơlah gŭ săk hưl tra năp măt phung oh mon bu ur, ƀư nâm bu du huê bunuyh dơm dam!”

²¹ Y-Đavit lah ma H'Mikal: “Nây yơh tra năp măt Brah Yêhôva jêng Nơm hŏ săch sŏk jêh gâp ntrok an ma mbơ̆ ay, jêh ri lĕ rngôch ngih mbơ̆ ay, njêng gâp ƀư hađăch chiă uănh phung Israel jêng phung ƀon lan Brah Yêhôva, ta nây gâp dơi mprơ kdŏ tanăp măt Brah Yêhôva.

²² Gâp mra trŭnh gâp nơm âk lơn, ăn gâp uănh êng gâp nơm jêng bunuyh rvưt rvâng, ƀiălah phung oh mon bu ur ay lah khân păng mra yơk ma gâp.”

²³ Yor ri, H'Mikal, kon bu ur Y-Sôl, mâu geh ôh kon n'ho ma tât nar păng khĭt.