II Samuel 5 - Nau Brah Ndu Ngơi 2023

Bu tŏ dak ƀâu kah ma Y-Đavit ƀư hađăch lĕ n'gor Israel

¹ Rnôk nây, lĕ rngôch ndŭl mpôl Israel văch tât ma Y-Đavit ta Hêbron, jêh ri lah: “Hên jêng noi deh du mham đah hađăch.

² Ntơm bơh kăl e, tơlah hađăch Sôl hôm chiă uănh ma hên, hađăch chiă uănh jêh phung Israel hăn tâm lơh jêh ri khân păng sĭt. Brah Yêhôva lah ma hađăch: ‘May mra rmăk biăp ma phung ƀon lan Gâp, jêh ri jêng hađăch ma phung Israel.’”

³ Pônây, lĕ rngôch phung bu ranh Israel văch gay tâm mâp đah hađăch ta Hêbron; hađăch Đavit ƀư nau tâm rnglăp ma khân păng tanăp Brah Yêhôva, jêh ri khân păng tŏ dak ƀâu kah ma Y-Đavit jêng hađăch ma lĕ n'gor Israel.

⁴ Y-Đavit ntơm chiă uănh nôk păng hŏ geh pe jât năm, jêh ri chiă uănh tâm puăn jât năm.

⁵ Ta Hêbron, Y-Đavit chiă uănh phung Yuđa tâm pơh năm ma prao khay; jêh nây ta Yêrusalem, păng chiă uănh lĕ rngôch phung Israel jêh ri Yuđa pe jât năm.

Y-Đavit pit sŏk ƀon Yêrusalem

⁶ Hađăch jêh ri phung tĭng ndô̆ păng hăn tât ta Yêrusalem, lơh phung Jêbusit, jêng phung ƀon lan gŭ tâm n'gor tơm. Khân păng lah ma Y-Đavit: “May mâu dơi văch lăp ta aơ ôh, phung chieh măt jêh ri phung rvĕn ăt tŏng nau ktang lơh mprơh may!” Khân păng mĭn: “Y-Đavit mâu dơi văch lăp ta aơ ôh.”

⁷ Ƀiălah Y-Đavit lơh pit jêh pôih nâp Siôn, nây jêng ƀon Đavit.

⁸ Tâm nar nây, Y-Đavit lah: “Lĕ rngôch phung ŭch tâm lơh đah phung Jêbusit, hăn tĭng hom trong ntu gay hăn trŭnh sŏk dak jêh ri tâm lơh đah phung rvĕn jêh ri phung chieh măt, jêng phung rlăng Y-Đavit.” Yor nau nây geh trong: “Phung chieh măt jêh ri phung rvĕn mâu mra dơi lăp tâm ngih ôh.”

⁹ Y-Đavit gŭ ta pôih nây, jêh ri ntơ amoh ƀon Đavit. Hađăch ƀư mpêr gŭ văr jŭm ntơm bơh Milô plơ̆ lăp mpeh tâm trôm.

¹⁰ Y-Đavit lơ nar lơ janh ktang, yorlah Brah Yêhôva jêng Brah Ndu ma phung tahan gŭ ndrel ma păng.

¹¹ Y-Hiram, hađăch ƀon Tyre, prơh phung mbơh hăn tât ma Y-Đavit, djôt leo tơm si sêdar, jêh ri phung trah si, phung tơng châm lŭ gay rdâk ngih hađăch ma Y-Đavit.

¹² Rnôk nây, Y-Đavit gĭt năl pô aơ Brah Yêhôva hŏ njêng jêh păng ƀư hađăch ma phung Israel, jêh ri ƀư ăn ƀon bri hađăch păng geh nau ndrŏng yor phung ƀon lan Păng jêng Israel.

¹³ Jêh Y-Đavit hăn luh tă bơh Hêbron, hađăch sŏk đŏng ur jêh ri phung ur yông ta Yêrusalem; khân păng deh đŏng phung kon bu ur jêh ri kon bu klâu ma Y-Đavit.

¹⁴ Aơ jêng amoh phung kon deh ăn hađăch ta ƀon Yêrusalem: Y-Samua, Y-Sôbap, Y-Nathan, Y-Salômôn,

¹⁵ Y-Iphar, Y-Êlisua, Y-Nêphek, Y-Japhia,

¹⁶ Y-Êlisama, Y-Êliada, jêh ri Y-Êliphêlet.

Y-Đavit dơi đah phung tahan Philistin

¹⁷ Tơlah phung Philistin tăng lư bu tŏ jêh dak ƀâu kah ăn Y-Đavit jêng hađăch chiă uănh phung Israel, phung tahan Philistin leo lĕ rngôch phung tahan hăn hao tâm lơh đah Y-Đavit. Lah gĭt nau nây Y-Đavit hăn trŭnh ro tât ta pôih.

¹⁸ Phung Philistin hăn bra ăn tahan hăn tâm rlŭng Rêphaim.

¹⁹ Rnôk nây, Y-Đavit ôp ma Brah Yêhôva: “Di lĕ gâp dơi hăn tâm lơh đah phung Philistin? May mra jao khân păng tâm ti gâp lĕ?” Brah Yêhôva plơ̆ lah ma Y-Đavit: “Hăn hao hom, yorlah n'hêl nanê̆ Gâp mra jao phung Philistin tâm ti may.”

²⁰ Pônây, Y-Đavit leo phung tahan păng hăn rlet ma Baal-Pêrisim jêh ri dơi đah khân păng; hađăch lah: “Brah Yêhôva hŏ lơh rai jêh phung rlăng gâp tanăp gâp nâm bu dak hoch.” Yor ri, păng ntơ amoh ntŭk aơ jêng Baal Pêrasim.

²¹ Phung tahan Philistin chalơi lĕ rup brah khân păng ta nây, Y-Đavit jêh ri phung tĭng ndô̆ păng sŏk djôt leo ndơ nây.

²² Du tơ̆ đŏng, phung tahan Philistin văch hao tay jêh ri hăn bra tâm rlŭng Rêphaim.

²³ Tơlah Y-Đavit ôp ma Brah Yêhôva, Păng lah: “May lơi hăn hao ôh; hăn ndăch dăr hom pakơi khân păng, jêh nây may mra rduh lơh khân păng rlet mpeh tơm si balsam.

²⁴ Jêh ri tơlah may tăng nteh jâng nhuat ta klơ chiông tơm si balsam, rnôk nây rduh lơh gơnh hom, yorlah nôk nây yơh, Brah Yêhôva mra hăn panăp may gay lơh đah phung tahan Philistin.”

²⁵ Y-Đavit ƀư di tĭng lĕ ntĭl Brah Yêhôva hŏ ntĭnh ntăm jêh ma păng, jêh ri hađăch hŏ dơi lơh phung tahan Philistin ntơm bơh Gêba ma tât ta Gêser.