II Samuel 4 - Nau Brah Ndu Ngơi 2023

Nau bu nkhĭt ntŭng Y-Isbôset

¹ Tơlah Y-Isbôset, kon Y-Sôl, tăng nau Y-Apner hŏ khĭt jêh ta Hêbron, păng rdja jâng ti, jêh ri lĕ rngôch phung Israel klach da dê.

² Rnôk nây, kon Y-Sôl geh bar hê kôranh tahan hăn nsong lơh: du huê bunuyh amoh Y-Bana, du huê bunuyh amoh Y-Rêkap; lĕ bar hê jêng kon Y-Rimôn ta Bêrôt bơh noi deh phung Benjamin — Phung Bêrôt nâm bu phung Benjamin,

³ yorlah khân păng hŏ du ndĕ tât ma Gitaim, jêh ri gŭ njưh ta nây kŏ tât ta nar aơ.

⁴ Y-Jônathan, kon Y-Sôl, geh du huê kon bu klâu rvĕn lĕ bar jâng. Păng geh prăm năm jêh, tơlah tăng lư nau tât ma Y-Sôl jêh ri Y-Jônathan tă bơh Jesrêel. Bunuyh sâm mpu rong djôt leo păng nchuăt du; tâm nôk păng nchuăt du ma nau ndal, păng tŭp jêh ri jêng rvĕn. Amoh păng jêng Y-Mêphibôset.

⁵ Bar hê kon Y-Rimôn ta ƀon Bêrôt, amoh jêng Y-Rêkap jêh ri Y-Bana hăn tât ta ngih Y-Isbôset tâm nôk nar duh ktang ngăn, tâm nôk hađăch lâng bê̆ch rlu bôk nar.

⁶ Khân păng hăn tât tâm ngih, n'hi săk sŏk ba ƀlê, jêh nây ntâp ta ndŭl Y-Isbôset. Pakơi nây, Y-Rêkap nđâp ma nâu păng jêng Y-Bana nchuăt du.

⁷ Nôk khân păng lăp tâm ngih dôl hađăch lâng bê̆ch rlu ta klơ sưng bê̆ch tâm jrô bê̆ch, khân păng ntâp khĭt jêh ri koh bôk hađăch. Jêh nây khân păng djôt bôk hađăch hăn măng tĭng trong Arabah.

Y-Đavit rmal phung nkhĭt Y-Isbôset

⁸ Khân păng djôt leo bôk Y-Isbôset rlet ma Hêbron, nhhơr ma hađăch Đavit, jêh ri mbơh ma hađăch: “Aơ jêng bôk Y-Isbôset, kon Y-Sôl, phung rlăng đah hađăch, nơm ŭch ƀư mhĭk nau rêh hađăch. Nar aơ, Brah Yêhôva lĕ plơng har jêh Y-Sôl jêh ri noi deh păng ăn ma hađăch, jêng kôranh hên.”

⁹ Ƀiălah Y-Đavit plơ̆ sĭt lah ma Y-Rêkap jêh ri Y-Bana, phung kon Y-Rimôn ta Bêrôt: “Nanê̆ tĭng nâm Brah Yêhôva gŭ rêh mro mrăng, jêng Nơm rklaih jêh gâp tă bơh lĕ rngôch nau rêh ni,

¹⁰ tơlah geh bunuyh hăn tât mbơh ma gâp: ‘Ri! Y-Sôl khĭt jêh,’ jêh ri mĭn păng nơm jêng du huê bunuyh mbơh nau răm maak, gâp hŏ nhŭp jêh ri nkhĭt jêh bunuyh nây ta ƀon Siklak, gay nkhôm ma nau mbơh kơt nĕ.

¹¹ Rlau lơn ma phung janh ƀai nkhĭt lơi du huê bunuyh sŏng srăng lâng bê̆ch ta klơ sưng bê̆ch tâm ngih păng nơm! Pôri aƀaơ, mâm ƀư gâp mâu kêh mham păng tâm ti khân may, jêh ri ƀư rai khân may bơh klơ neh ntu?”

¹² Jêh nây Y-Đavit ntăm ma phung oh mon păng nkhĭt bar hê nây; khân păng koh lơi lĕ jâng ti khân păng, jêh nây yông săk jăn khĭt khân păng êp kêng dak nglao Hêbron. Ƀiălah khân păng djôt leo bôk Y-Isbôset tâp tâm môch Y-Apner, ta Hêbron.