II Samuel 3 - Nau Brah Ndu Ngơi 2023

Y-Đavit tâm lơh đah Y-Isbôset

¹ Ngih Y-Đavit jêh ri ngih Y-Sôl tâm lơh mro jŏ năng nar; Y-Đavit lơ nar lơ ktang, bi ngih Y-Sôl lơ nar lơ huơi.

² Ta Hêbron, Y-Đavit deh âk kon bu klâu. Kon bôk rah jêng Y-Amnôn, kon bơh H'Ahinôam ta Jesrêel;

³ kon rơh bar jêng Y-Chêliap, kon bơh H'Abigêl, ur drô Y-Nabal ta yôk Karmel; kon rơh pe jêng Y-Apsalôm, kon bơh H'Maka, kon bu ur Y-Talmai, hađăch n'gor Gêsur;

⁴ kon rơh puăn jêng Y-Adônija, kon bơh H'Hagit; kon rơh prăm jêng Y-Sêphatia, kon bơh H'Abital;

⁵ jêh ri kon rơh prao jêng Y-Itrêam, kon bơh H'Êgla, ur Y-Đavit. Nây jêng phung kon bu klâu hŏ deh ăn Y-Đavit, tâm dôl păng gŭ ta Hêbron.

Y-Apner chalơi Y-Isbôset jêh ri tâm rnglăp ndrel ma Y-Đavit

⁶ Tâm nôk nau tâm lơh ăt hôm ta nklang ngih Y-Sôl đah ngih Y-Đavit, Y-Apner ƀư ktang ntŭk păng nơm tâm ngih Y-Sôl.

⁷ Kăl e ri, Y-Sôl geh du huê ur yông, amoh H'Rispa, kon bu ur Y-Aiya. Y-Isbôset lah ma Y-Apner: “Mâm ƀư may lăp gŭ đah ur yông mbơ̆ gâp?”

⁸ Y-Apner ji nuih ngăn ma lĕ nau Y-Isbôset lah, jêh ri păng lah: “Gâp jêng bôk so hĕ pah kan ma phung Yuđa? Tât aƀaơ, gâp lĕ nuih n'hâm răp jăp ma ngih Y-Sôl, mbơ̆ may, ăn ma phung oh nâu, jêh ri phung mĭt jiăng păng, jêh ri mâu jao ôh may tâm ti Y-Đavit. Ƀiălah nar aơ may ăt nduyh gâp yor nau tih đah du huê bu ur aơ!

⁹ Ăn Brah Ndu tâm rmal gâp jâk jêr tơlah gâp mâu yor ma Y-Đavit ƀư rĭng lĕ nau Brah Yêhôva hŏ ton jêh ma păng,

¹⁰ nâm bu ntĭt rgâl lơi ƀon bri hađăch bơh Y-Sôl, jêh ri ndâk sưng hađăch Y-Đavit ta klơ phung Israel jêh ri phung Yuđa, ntơm bơh Dan tât ma Bêr-Sêba.”

¹¹ Y-Isbôset mâu nănh plơ̆ lah ôh ma Y-Apner, yor păng klach ma păng.

¹² Y-Apner prơh phung tâm ntang an ma păng gay lah ma Y-Đavit: “N'gor bri aơ jêng ndơ mbu nơm? Dăn hađăch ndâk nau tâm rnglăp đah gâp, gâp mra kơl may njŭn leo lĕ rngôch phung Israel plơ̆ sĭt ma hađăch.”

¹³ Y-Đavit plơ̆ lah: “Ueh yơh! Gâp mra ƀư nau tâm rnglăp ma may. Gâp knŏng dăn may du ntil nau lah may tât tâm mâp đah gâp, lơi mpơl măt ma gâp lor tơlah ê hŏ leo ôh H'Mikal, kon bu ur Y-Sôl văch tât.”

¹⁴ Y-Đavit prơh đŏng phung mbơh hăn tât gay lah ma Y-Isbôset, kon bu klâu Y-Sôl: “Mplơ̆ sĭt H'Mikal ma gâp, ur gâp nơm hŏ nsông jêh ma ndơ nđăp du rhiăng ntâu proch nhôm phung Philistin.”

¹⁵ Y-Isbôset prơh bunuyh sŏk H'Mikal tă bơh sai păng, Y-Paltiêl, kon Y-Lais.

¹⁶ Sai păng hăn ndrel ma păng, nhĭm ma păng du njăr trong, tĭng tât ta Bahurim. Dôl nây, Y-Apner lah ma păng: “Hăn sĭt hom ngih may!” Y-Paltiêl plơ̆ sĭt.

¹⁷ Y-Apner lah ma phung kôranh bu ranh Israel: “Jŏ ngăn jêh khân may kơnh Y-Đavit jêng hađăch.

¹⁸ Pôri aƀaơ, ƀư hom; yorlah Brah Yêhôva geh lah ma Y-Đavit pô aơ: ‘Yorlah oh mon Gâp jêng Y-Đavit, Gâp mra tâm rklaih phung ƀon lan Israel tă bơh ti phung Philistin jêh ri bơh ti lĕ rngôch phung rlăng khân păng.’”

¹⁹ Y-Apner ăt ngơi tâm ban pônây ma phung Benjamin, jêh nây păng hăn tât Hêbron gay nkoch ma Y-Đavit gĭt nau mĭn bơh phung Israel jêh ri lĕ rngôch ngih Benjamin.

²⁰ Y-Apner hăn tât tâm mâp đah Y-Đavit ta Hêbron, djôt leo bar jât nuyh. Y-Đavit thai ndơ sông sa ma Y-Apner jêh ri ma phung bunuyh ndrel ma păng.

²¹ Y-Apner lah ma Y-Đavit: “Gâp mra tâm rƀŭn đŏng lĕ rngôch phung Israel văch tât ma hađăch, jêng kôranh gâp, gay ăn khân păng dơi ƀư nau tâm rnglăp đah hađăch, jêh ri hađăch mra ƀư hađăch chiă uănh lĕ n'gor Israel, di nâm nuih n'hâm hađăch ŭch.” Y-Đavit ăn Y-Apner sĭt, jêh ri păng hăn ma nau đăp mpăn.

Y-Jôap nkhĭt Y-Apner

²² Nôk nây phung oh mon Y-Đavit hăn ndrel ma Y-Jôap plơ̆ sĭt tă bơh nau tâm lơh, djôt leo âk ngăn ndơ pit sŏk, ƀiălah Y-Apner mâu hôm gŭ ndrel ma Y-Đavit ta Hêbron ôh; yorlah Y-Đavit lĕ ăn păng sĭt, păng hăn ma nau đăp mpăn.

²³ Tơlah Y-Jôap jêh ri lĕ rngôch phung tahan ndrel ma păng plơ̆ sĭt jêh, bu mbơh ma Y-Jôap: “Y-Apner, kon Y-Ner, văch jêh ma hađăch, ƀiălah hađăch ăn păng sĭt, jêh ri păng hăn ma nau đăp mpăn.”

²⁴ Y-Jôap hăn ro tâm mâp đah ma hađăch jêh ri ôp: “Moh nau hađăch lĕ ƀư? Aơ, Y-Apner hŏ tât tâm mâp đah hađăch, mâm dĭng hađăch ăn păng sĭt gay ma păng hăn tâm ban pônây?

²⁵ Hađăch gĭt lĕ ma Y-Apner, kon Y-Ner, knŏng văch jêh ŭch ndơm hađăch, jêh ri gay gĭt ndah nâm jŏ may luh jêh ri ndah nâm jŏ may sĭt, gay ŭch gĭt lĕ nau may ƀư.”

²⁶ Tơlah Y-Jôap luh jêh tă bơh Y-Đavit, păng prơh bunuyh hăn tĭng pakơi Y-Apner jêh ri leo păng plơ̆ sĭt ntơm bơh ntu prăp dak Sira. Ƀiălah Y-Đavit, mâu gĭt ôh nau nây.

²⁷ Tơlah Y-Apner plơ̆ đŏng tât jêh ta Hêbron, Y-Jôap djôt leo păng êng ta mpông ƀon, nâm bu ŭch nkoch bri đah păng ma nau kan ndâp. Ta nây, Y-Jôap ntâp ta ndŭl Y-Apner, jêh ri nkhĭt lơi păng gay mplơ̆ rnon mham oh Y-Apner jêng Y-Asahel.

²⁸ Pakơi nây, Y-Đavit gĭt nau nây păng lah: “Gâp jêh ri ƀon bri hađăch gâp mâu geh nau tih n'ho ro ôh tanăp măt Brah Yêhôva yor mham Y-Apner, kon Y-Ner.

²⁹ Ăn mham nây nkhŭt tay ta klơ bôk Y-Jôap jêh ri ta klơ lĕ ngih mbơ̆ păng! Ăn ngih Y-Jôap mâu tăch yơt ôh bunuyh ji kuet ji rôi, mâu lah nau ji phŭng, mâu lah phung knŏng gĭt ƀư nau kan phung bu ur, mâu lah cha lôt khĭt ma đao, mâu lah nau ji ngot yor pưt sông sa!”

³⁰ Kơt nĕ, Y-Jôap jêh ri oh păng jêng Y-Abisai, hŏ nkhĭt lơi Y-Apner, yorlah păng nkhĭt oh khân păng jêng Y-Asahel, tâm nau tâm lơh ta ƀon Gibêôn.

Y-Đavit nhĭm vơl yor Y-Apner

³¹ Y-Đavit lah ma Y-Jôap jêh ri lĕ rngôch phung ƀon lan tĭng ndô̆ păng: “Nkhêk hom ao khân may, nsoh ao ma bok ƀau, jêh ri nhĭm vơl ma Y-Apner.” Jêh nây Y-Đavit tĭng groi băng.

³² Tơlah khân păng tâp Y-Apner ta Hêbron jêh, hađăch nhĭm nter klơ môch Y-Apner; jêh ri lĕ rngôch phung ƀon lan nhĭm tâm ban lĕ.

³³ Hađăch ƀư du nau mprơ nhĭm khĭt ma Y-Apner: “Mâm ƀư Y-Apner khĭt nâm bu du huê bunuyh rluk?

³⁴ Ti may bu mâu chăp ôh, Jâng may bu mâu đŏng nkông; May chôt khĭt jêh Nâm bu cha lôt tanăp phung mhĭk!” Lĕ rngôch phung ƀon lan nhĭm.

³⁵ Jêh nau nây, lĕ rngôch phung ƀon lan tât nchâp Y-Đavit sông sa piăng let êlor lôch nar, ƀiălah Y-Đavit sơm ton lah: “Tơlah êlor nar nhâp, gâp sa du glo piăng let mâu lah ndơ êng, ăn Brah Ndu rmal jâk ngăn ma gâp.”

³⁶ Lĕ rngôch phung ƀon lan saơ nau nây jêh ri maak ma nau nây; lĕ nau hađăch ƀư ueh da dê tanăp măt lĕ rngôch phung ƀon lan.

³⁷ Pônây, tâm nar nây, lĕ rngôch phung Israel gĭt hađăch mâu tât ma nau tih nkhĭt Y-Apner, kon Y-Ner.

³⁸ Hađăch lah ma phung oh mon păng: “Khân may mâu gĭt hĕ ma du huê kôranh chiă uănh, du huê bunuyh khlay lĕ chôt jêh nar aơ tâm n'gor Israel?

³⁹ Mpeh let ma gâp, nar aơ gâp hôm huơi nđâp lah gâp jêng hađăch bu tŏ dak ƀâu kah jêh; ƀiălah phung nây, jêng phung kon H'Sêruya, hŏ ƀư jêr ir ma gâp. Dăn Brah Yêhôva mplơ̆ sĭt ma nơm ƀư mhĭk tĭng nâm nau djơh mhĭk păng!”