II Samuel 24 - Nau Brah Ndu Ngơi 2023

Y-Đavit kơp rnoh bunuyh

¹ Du tơ̆ đŏng, Brah Yêhôva ji nuih ma phung Israel. Păng nsŭk nsôr Y-Đavit ƀư nau mhĭk ma khân păng jêh ri lah: “Kơp hom rnoh phung Israel jêh ri phung Yuđa.”

² Pônây hađăch đă ma Y-Jôap, jêng kôranh ma phung tahan toyh, dôl gŭ ndrel ma hađăch: “Hăn hom lam tâm lĕ rngôch ndŭl mpôl Israel, ntơm bơh Dan tât ma Bêr-Sêba, kơp rnoh bunuyh gay ăn gâp dơi gĭt rnoh phung Israel jêng ndah âk.”

³ Ƀiălah Y-Jôap lah ma hađăch: “Dăn ma Yêhôva Brah Ndu hađăch ƀư ma phung ƀon lan ntop du rhiăng tơ̆ âk lơn ma aƀaơ ri, jêh ri măt hađăch jêng kôranh gâp ăt hôm e saơ nau ntop âk nây! Ƀiălah mâm ƀư hađăch jêng kôranh gâp ŭch ƀư tay nau aơ?”

⁴ Ƀiălah, nau hađăch ngơi dăng rlau lơn ma nau mĭn Y-Jôap jêh ri phung kôranh chiă uănh tahan. Yor ri, Y-Jôap jêh ri phung kôranh chiă uănh tahan hŏ tâm nkhah đah hađăch, dâk hăn gay kơp rnoh phung ƀon Israel.

⁵ Khân păng rgăn dak krong Yurdan jêh ri ƀư ntŭk rmlak ta ƀon Arôer, mpeh rđŭng ƀon ta nklang rlŭng Gat, jêh ri hăn tât ta ƀon Jaser.

⁶ Ntơm bơh nây, khân păng hăn lăp tâm n'gor Gilêat jêh ri n'gor neh Tatim Hôdsi. Jêh nây khân păng tât ta ƀon Dan Jiaam jêh ri nkual văr jŭm ma ƀon Sidôn.

⁷ Khân păng tâm ban đŏng hăn tât ma pôih ƀon Tyre, lăp tâm lĕ rngôch ƀon phung Hivit jêh ri phung Kanaan. Jêh nây khân păng hăn ma nkual Nêgep n'gor Yuđa ta Bêr-Sêba.

⁸ Pônây, khân păng hăn lam n'gor; lôch sĭn khay bar jât nar, khân păng plơ̆ sĭt ta ƀon Yêrusalem.

⁹ Y-Jôap mbơh ma hađăch rnoh kơp phung ƀon lan hŏ dơi kơp: Tâm phung Israel geh pham rsen bunuyh janh ktang dơi djôt đao, jêh ri tâm phung Yuđa geh prăm rsen nuyh.

Nau ji tưp ƀư mhĭk ngăn tâm phung ƀon lan Israel. – Y-Đavit nhhơr ndơ ƀư brah ta Môria

¹⁰ Tơlah jêh nau kơp phung ƀon lan nuih n'hâm Y-Đavit nâm bu sôch bu sôr. Y-Đavit ngơi ma Brah Yêhôva: “Gâp hŏ ƀư tih toyh ngăn jêh tâm nau gâp hŏ ƀư jêh. Ƀiălah aƀaơ, hơi Brah Yêhôva! Dăn jut lơi nau kue bơh oh mon May hŏ ƀư tih, yorlah gâp ƀư jêh ma nau rluk ngăn.”

¹¹ Ang ôi taơ, tơlah Y-Đavit kah rngăl, geh nau Brah Yêhôva ngơi ma nơm mbơh lor Y-Gat, jêng bunuyh geh nau tâm saơ an ma Y-Đavit, pô aơ:

¹² “Hăn nkoch hom ma Y-Đavit pô aơ Brah Yêhôva lah kơt aơ: ‘Gâp geh pe nau ma may. Săch hom knŏng nguay tâm pe nau nây, jêh nây Gâp mra sŏk nau nây ƀư ma may.’”

¹³ Y-Gat hăn văch ma Y-Đavit, mbơh ma hađăch lĕ nau nây jêh ri lah: “Moh nau hađăch săch: Mâu lah pơh năm nau sa sât ji ngot tâm bri may, mâu lah pe khay hađăch nchuăt du bơh tanăp phung rlăng tĭng may, mâu lah pe nar nau ji tưp ƀư mhĭk ngăn tâm bri may? Aƀaơ, dăn may gŭ mĭn jêh ri săch nau gâp mra plơ̆ sĭt lah đŏng ma Nơm prơh gâp hăn jêh.”

¹⁴ Y-Đavit lah ma Y-Gat: “Gâp tŭp tâm nau rêh ni toyh ngăn! Pônây, ăn he tŭp tâm ti Brah Yêhôva, yorlah nau Păng yô̆ nđach toyh ngăn; ƀiălah lơi ăn gâp tŭp tâm ti bunuyh ôh.”

¹⁵ Pôri, Brah Yêhôva ƀư ăn nau ji tưp ƀư mhĭk ngăn tâm phung Israel, ntơm bơh ơm ôi nar nây tât ta mông hŏ nal jêh. Rnoh bunuyh khĭt tâm phung ƀon lan ntơm bơh Dan tât ma Bêr-Sêba jêng pơh rmưn nuyh.

¹⁶ Tơlah tông mpăr yơr ti gay ƀư rai ma Yêrusalem, Brah Yêhôva tâm rgâl nau mĭn ma nau ƀư mhĭk nây, jêh ri lah ma tông mpăr nơm gŭ ƀư rai phung ƀon lan: “Găp jêh! Aƀaơ ri rhuăt hom ti may.” Rnôk nây taơ, tông mpăr Brah Yêhôva gŭ êp ntŭk mprah ba Y-Arauna, bunuyh Jêbusit.

¹⁷ Saơ tông mpăr rmal phung ƀon lan, Y-Đavit ngơi ma Brah Yêhôva: “Gâp nơm hŏ ƀư tih jêh, gâp nơm ƀư jêh ma nau ƀai. Ƀiălah phung biăp aơ, moh nau khân păng mâp ƀư jêh? Mbơh sơm ti Kôranh Brah rmal ma gâp jêh ri ma ngih mbơ̆ gâp!”

Y-Đavit ndâk nơng ƀư brah ta ntŭk mprah ba

¹⁸ Tâm nar nây, Y-Gat hăn tât tâm mâp đah Y-Đavit jêh ri lah: “Hăn hao hom, ndâk du nơng ƀư brah ma Brah Yêhôva ta ntŭk mprah ba Y-Arauna, bunuyh Jêbusit.”

¹⁹ Y-Đavit hăn hao tĭng nâm nau Y-Gat lah, tĭng nâm Brah Yêhôva ntăm jêh.

²⁰ Tơlah Y-Arauna uănh saơ hađăch jêh ri phung oh mon păng dôl văch rlet ma păng, păng hăn luh ro jêh ri păn muh măt ta neh tanăp măt hađăch.

²¹ Y-Arauna lah: “Moh nau hađăch jêng kôranh gâp văch ma oh mon hađăch?” Hađăch Đavit lah: “Gâp hăn văch gay rvăt ntŭk mprah ba may, jêh ri ndâk ta nây du nơng ƀư brah ma Brah Yêhôva, gay nau ji tưp dôl ƀư mhĭk tâm phung ƀon lan nsrŭng dơi.”

²² Y-Arauna lah ma Y-Đavit: “Dăn hađăch jêng kôranh gâp sŏk hom jêh ri nhhơr moh ndơ hađăch mĭn ueh. Aơ geh ndrôk prăp ma ndơ ƀư brah gŭch, lĕ ndơ mprah ba jêh ri mâng mbăk ndrôk dŏng ƀư long.

²³ Hơi hađăch, Y-Arauna ăn lĕ ndơ aơ ma hađăch.” Y-Arauna lah tay: “mbơh sơm Yêhôva Brah Ndu hađăch dơn hađăch!”

²⁴ Ƀiălah hađăch lah ma Y-Arauna: “Mâu ôh, gâp ŭch rvăt ndơ nây tă bơh may tĭng nâm rnoh di. Gâp mâu ŭch nhhơr ôh ma Yêhôva Brah Ndu gâp lĕ ndơ ƀư brah gŭch ƀiălah gâp mâu mâp rvăt ôh.” Pôri, Y-Đavit rvăt ntŭk mprah ba jêh ri ndrôk ma prăm jât Sêkel prăk.

²⁵ Y-Đavit ndâk ta nây du mlâm nơng ƀư brah ma Brah Yêhôva, jêh ri ndơ ƀư brah gŭch jêh ri ndơ ƀư brah ma nau đăp mpăn. Brah Ndu iăt nau mbơh sơm jêh ri rlu lơi nau ji tưp ta bri phung Israel.