II Samuel 23 - Nau Brah Ndu Ngơi 2023

Nau Y-Đavit ngơi nglĕ dŭt

¹ Aơ jêng nau Y-Đavit ngơi nglĕ dŭt: “Nau ngơi Y-Đavit, kon bu klâu Y-Yêsê, Jêng nau ngơi bơh bunuyh hŏ n'hao prêh klơ jêh, Nơm Brah Ndu Yakôb tŏ jêh dak ƀâu kah, Jêh ri jêng nơm blau mprơ ueh ngăn tâm phung Israel:

² Huêng Brah Yêhôva ăn ma gâp nau ngơi Păng, Jêh ri nau Păng ngơi gŭ ta mpiăt gâp.

³ Brah Ndu phung Israel hŏ ngơi jêh, Lŭ Toyh phung Israel hŏ lah jêh ma gâp: ‘Tơlah du huê chiă uănh bunuyh ma nau sŏng, Chiă uănh ma nau klach yơk ma Brah Ndu

⁴ Păng jêng nâm bu nchrat ang ôi, tơlah ƀli luh nar, Kêng ôi mâu geh ndâr tŭk ôh; Nâm bu nau ang nchrat lah jêh mih, Ƀư ma gơ̆ nse chăt bơh neh.’

⁵ Mâu di hĕ ngih gâp nâm bu pônây tanăp măt Brah Ndu? Yorlah Păng hŏ njêng jêh đah gâp du nau tâm rnglăp n'ho ro, Lĕ rngôch nau vay hŏ dăp jêh jêh ri mât mray. Mâu di hĕ lĕ nau tâm rklaih jêh ri lĕ nau gâp ŭch ngăn Păng nơm yơh mra ƀư jêng ƀơh?

⁶ Ƀiălah nơm djơh mhĭk nâm bu lok bu mƀăr lơi jêh, Yorlah bu mâu dơi bun păng ma ti ôh.

⁷ Sŏk hom ndơ dŏng ma loih Mâu lah n'gâr tak gay ma bun, Jêh nây bu su khân păng ma ŭnh.”

Amoh lĕ săk phung tahan janh ktang Y-Đavit

⁸ Aơ jêng amoh phung tahan janh ktang Y-Đavit: Lor lơn geh Y-Jôsep-Basêbet, bunuyh Tachêmôn, jêng kôranh ma pe nuyh tahan janh ktang; păng nơm hŏ sŏk tak jêh ri nkhĭt pham rhiăng nuyh tâm du tơ̆.

⁹ Jêh nây, geh Y-Êlêasar, kon Y-Dôdô, sau Y-Ahôhit, jêng du huê tâm pe nuyh tahan janh ktang ndrel ma Y-Đavit hăn tât ntŭk phung Philistin rƀŭn rgum nkrĭp dăp tahan ma nau tâm lơh. Phung Israel plơ̆ rŭch pakơi,

¹⁰ ƀiălah Y-Êlêasar dâk jêh ri nkhĭt phung Philistin kŏ tât rgănh ti, n'ho dăng krêp đao tâm ti păng. Tâm nar nây, Brah Yêhôva ăn ma phung Israel nau dơi tâm lơh toyh. Phung tahan plơ̆ tay tĭng groi pakơi Y-Êlêasar knŏng kâp sŏk gro ndô ndơ phung rlăng nây dơm.

¹¹ Pakơi bunuyh nây geh Y-Sama, kon Y-Agê, bunuyh Hararit. Phung Philistin tâm rgum phung tahan ta lôk mir bu tăm bêng ma tuh vang, jêh ri phung tahan nchuăt du da dê panăp phung Philistin.

¹² Ƀiălah Y-Sama dâk ta nklang mir, kâp n'gang păng jêh ri dơi lơh phung Philistin; Brah Yêhôva ăn ma phung Israel geh nau dơi tâm lơh toyh.

¹³ Tâm pe jât kôranh tahan, geh pe nuyh hăn trŭnh dôl yan kăch rek jêh ri hăn tât tâm mâp đah Y-Đavit ta trôm lŭ Adulam, geh du mpôl phung tahan Philistin ƀư pôih tahan tâm rlŭng Rêphaim.

¹⁴ Rnôk nây Y-Đavit gŭ tâm pôih, bi mpôl phung tahan Philistin gŭ ta ƀon Ƀêtlêhem.

¹⁵ Y-Đavit ŭch ngăn jêh ri lah: “Ndă ma geh bunuyh ăn gâp dak nhêt tă bơh ntu dak êp kêng mpông ƀon Ƀêtlêhem!”

¹⁶ Rnôk nây, geh pe nuyh janh ktang hăn rgăn pôih tahan phung Philistin, bâk dak tâm ntu dak êp kêng mpông ƀon Ƀêtlêhem, djôt leo ma Y-Đavit. Ƀiălah hađăch mâu ŭch nhêt ôh, ƀiălah păng nkhŭt dak nây nhhơr ma Brah Yêhôva,

¹⁷ jêh ri lah: “Hơi Brah Yêhôva! Gâp lah mâu nhêt ngăn. Dak aơ mâu lĭn lĕ đah mham phung pe nuyh aơ, sân săk jăn khân păng gay hăn tât ntŭk ri?” Pôri, hađăch mâu ŭch nhêt dak nây. Nây jêng nau pe nuyh tahan janh ktang hŏ ƀư jêh.

¹⁸ Y-Abisai, oh Y-Jôap, kon H'Sêruya, jêng kôranh chiă uănh ma mpôl “pe jât”. Păng nơm hŏ rjăng tak lơh jêh ri nkhĭt pe rhiăng nuyh, jêh ri geh nau lư n'găr tâm pe tahan janh ktang nây.

¹⁹ Mâu di hĕ Y-Abisai geh lư n'găr lơn tâm pe nuyh aơ lĕ? Păng jêng kôranh khân păng. Nđâp tơlah păng mâu ban ôh phung pe nuyh nây.

²⁰ Y-Bênaya, kon bu klâu Y-Jêhôida, jêng du huê bu klâu janh ktang bơh Kapsêel, nơm lư n'găr yor hŏ ƀư âk kan toyh. Păng yơh hŏ nkhĭt bar hê tahan janh ktang phung Môap. Geh du nar măng lĭng (nar tŭp pler), tâm ban lĕ phung aơ hăn trŭnh du trôm, geh du mlâm yau mŭr, jêh ri nkhĭt lơi păng.

²¹ Păng yơh hŏ lơh nkhĭt du huê bunuyh toyh juat Êjipt. Bunuyh Êjipt djôt tâm ti du n'gâr tak, bi Y-Bênaya djôt du mlâm mâng jra hăn lơh păng. Păng pit tak tă bơh ti bu klâu Êjipt, jêh ri nkhĭt păng ma tak păng nơm.

²² Nĕ jêng lĕ nau kan Y-Bênaya, kon Y-Jêhôida, ƀư jêh; păng geh nau lư n'găr tâm rđĭl đah pe nuyh tahan janh ktang.

²³ Y-Bênaya geh nau lư n'găr lơn tâm mpôl “Pe Jât”; ƀiălah păng mâu tâm ban pe nuyh tahan janh ktang. Y-Đavit dơm păng chiă uănh phung tahan gak hađăch.

²⁴ Tâm mpôl “Pe Jât” hôm geh: Y-Asahel oh Y-Jôap, Y-Êlhanan kon Y-Dôdô ta Ƀêtlêhem,

²⁵ Y-Sama bơh Harôt, Y-Êlika bơh Harôt,

²⁶ Y-Hêles bunuyh Palti, Y-Ira kon Y-Ikês bơh Têkôa,

²⁷ Y-Abiêser bơh Anathôt, Y-Mêbunai bunuyh Husa,

²⁸ Y-Salmôn bunuyh Ahôhit, Y-Maharai bơh Nêtôphat,

²⁹ Y-Hêlep kon Y-Bana bơh Nêtôphat, Y-Itai kon Y-Ribai bơh Gibêa phung Benjamin,

³⁰ Y-Bênaya ta Pirathôn, Y-Hidai ta dak n'hor Gas,

³¹ Y-Abialbôn bunuyh Arba, Y-Asmavet bơh Bahurim,

³² Y-Êliahba bơh Salbôn, phung kon Y-Jasen: Y-Jônathan,

³³ Y-Sama bunuyh Hararit, Y-Ahiam kon Y-Sarar bunuyh Hararit,

³⁴ Y-Êliphêlet kon Y-Ahasbai bơh Makatit, Y-Êliam kon Y-Ahitôpel bunuyh Gilô,

³⁵ Y-Hêsrô bơh yôk Karmel, Y-Parai bunuyh Arbit,

³⁶ Y-Igal kon Y-Nathan ta Sôba, Y-Bani bunuyh Gat,

³⁷ Y-Sêlek bunuyh Ammôn, Y-Naharai ta Bêrôt, jêng nơm djôt ndơ tâm lơh ma Y-Jôap, jêng kon H'Sêruya.

³⁸ Y-Ira bunuyh Ithrit, Y-Garep bunuyh Ithrit,

³⁹ Y-Uri bunuyh Hitit. Lĕ rngôch jêng pe jât ma pơh nuyh.