II Samuel 22 - Nau Brah Ndu Ngơi 2023

Nau Y-Đavit mprơ ma nau dơi tâm lơh

¹ Tơlah Brah Yêhôva hŏ tâm rklaih jêh Y-Đavit tă bơh ti Y-Sôl, păng mprơ ma nau ngơi aơ gay tâm rnê ma Brah Yêhôva:

² “Brah Yêhôva jêng lŭ toyh, jêh ri pôih nâp gâp, Jêh ri Nơm tâm rklaih gâp.

³ Brah Ndu gâp jêng lŭ toyh gâp, jêng ntŭk gâp gŭ krap, Jêng khêl jêh ri jêng nke ma nau tâm rklaih gâp, Jêng pôih nâp jêh ri ntŭk gâp gŭ krap, Nơm tâm rklaih gâp ăn gâp rklaih tă bơh phung djơh mhĭk.

⁴ Gâp mra vơh vơl ma Brah Yêhôva, Nơm khư ma bu tâm rnê; Jêh ri gâp mra dơi rklaih jêh tă bơh lĕ phung rlăng đah gâp.

⁵ Rbuh dak lêng nau khĭt nchueng jŭm gâp, Lĕ dak thăng nau rai yot ƀư ăn gâp klach krit;

⁶ Lĕ rse ƀon phung khĭt hŏ kât jŭm gâp, Dăk nau khĭt tâm mâp đah gâp.

⁷ Tâm nau rêh ni, gâp kuăl mbơh sơm ma Brah Yêhôva; Gâp vơl dăn ma Brah Ndu gâp. Ta ntŭk Ngih Brah Kloh Ueh, Păng tăng bâr gâp; Bâr gâp nter tât tôr Păng.

⁸ Rnôk aơ neh ntu n'găr mpât jêh ri n'goh n'gơ, Mbon lĕ ndâr trôk n'găr mpât Jêh ri n'gơ n'găr yorlah Păng ji nuih.

⁹ Nhhŭk ŭnh luh bơh trôm muh păng; Mpiăt ŭnh hit luh bơh trôm mbung Păng, Jêh ri sa ônh rnga hĭt tă bơh Păng.

¹⁰ Păng n'glưh lơi trôk jêh ri jŭr gŭ; Tâm dâng jâng Păng geh ndâr tŭk krăk mbâl.

¹¹ Păng ncho ta klơ chêrubim jêh ri mpăr; Păng tâm mpơl ta klơ năr sial.

¹² Păng sŏk nau ngo nkŭm gŭ jŭm păng, Nâm du ngih bok đah âk dak tâm ndâr tŭk krăk mbâl.

¹³ Tă bơh nau ang chrêk rmah tă bơh panăp Păng, Ônh rnga hit.

¹⁴ Brah Yêhôva ƀư ăn ma lơp nglaih ta klơ lĕ ndâr trôk; Nơm Dŭt Prêh ngơi ma bâr Păng.

¹⁵ Păng pănh hăr, ƀư ma phung rlăng gâp du pru pra; Păng njuăl nchrat ral, ƀư ăn khân păng rai nchah.

¹⁶ Yor tă bơh nau Brah Yêhôva nduyh Jêh ri yor n'hâm nsôr luh tă bơh trôm muh Păng, Blat dak mƀŭt mpơl jêh, Mbon neh ntu lĕ mpơl đŏng.

¹⁷ Tă bơh prêh klơ, Păng yơr ti kuăn gâp, Păng mphâk gâp luh bơh dak jru.

¹⁸ Păng tâm rklaih gâp bơh phung rlăng ktang, Tă bơh phung tâm rmot ma gâp, Yorlah khân păng jêng ktang lơn ma gâp.

¹⁹ Khân păng hăn lơh gâp tâm nar gâp rêh ni, Ƀiălah Brah Yêhôva chông n'gang gâp.

²⁰ Păng njŭn gâp tâm ntŭk huy toyh Jêh ri tâm rklaih gâp, yorlah Păng rŏng ma gâp.

²¹ Brah Yêhôva hŏ nkhôm jêh ma gâp tĭng nâm nau sŏng srăng gâp; Păng mplơ̆ ma gâp tĭng nâm nau kloh ti gâp,

²² Yorlah gâp djôt prăp lĕ trong ndô̆ Brah Yêhôva, Mâu chalơi Brah Ndu gâp gay ƀư nau mhĭk.

²³ Yorlah lĕ rngôch nau vay ƀư bơh Păng gŭ panăp gâp; Gâp mâu mâp teng đah lĕ nau vay Păng dăp.

²⁴ Gâp mâu geh nau bu nduyh ôh tanăp Păng, Jêh ri gâp njrăng mât êng săk nơm bơh nau mhĭk.

²⁵ Yor nây, Brah Yêhôva hŏ mplơ̆ sĭt jêh ma gâp tĭng nâm nau sŏng srăng gâp, Jêh ri tĭng nau kloh ti gâp tanăp Păng.

²⁶ Ma phung răp jăp, May tâm mpơl nau răp jăp; Ma phung nŭm rĭng, May tâm mpơl May nơm jêng nŭm rĭng.

²⁷ Ma nơm kloh rsang, Kôranh Brah mra tâm mpơl May nơm kloh rsang; Ƀiălah ma nơm kue, May mra tâm mpơl May nơm ma nau tâm rdâng.

²⁸ Kôranh Brah tâm rklaih phung dêh rhêt, Ƀiălah măt Kôranh Brah uănh ma phung sưr gay n'glưh khân păng.

²⁹ Ơ Brah Yêhôva! May jêng ŭnh kađen gâp, Brah Ndu gâp mra sol ang nau ngo gâp.

³⁰ Tă bơh Kôranh Brah, gâp klăp lah rduh lơh phung tahan rlăng; Nsing ma Brah Ndu, gâp hăn rgăn mpêr ƀon.

³¹ Bi ma Brah Ndu, lĕ trong Păng jêng nŭm rĭng, Nau Brah Yêhôva hŏ geh nau rlong uănh kloh jêh. Păng jêng khêl ma lĕ rngôch bunuyh nde krap tâm Păng.

³² Yorlah, Padih Brah Yêhôva, mbu jêng Brah Ndu? Mbu jêng lŭ toyh, tơlah mâu di Brah Ndu hên?

³³ Brah Ndu nơm jêng ntŭk gâp nde krap nâp ktang, Păng njŭn bunuyh sŏng lăp tâm trong Păng.

³⁴ Păng ƀư ma jâng gâp nâm bu jâng jun me, Jêh ri ăn gâp gŭ nâp ta klơ yôk prêh.

³⁵ Păng nti ti gâp ma nau tâm lơh, Gay tur ti gâp dơi van n'gâr na kông.

³⁶ Kôranh Brah ăn ma gâp khêl nau tâm rklaih, Păng, Jêh ri dêh rhêt May hŏ ƀư jêh ma gâp jêng toyh.

³⁷ May pơk huy trong tâm dâng nhuat jâng gâp, Jêh ri jâng gâp nhuat mâu geh mbĭr ôh.

³⁸ Gâp mprơh tĭng jêh ri ƀư rai jêh phung rlăng đah gâp Knŏng plơ̆ sĭt tơlah ƀư rai lĕ khân păng.

³⁹ Gâp ƀư rai lĕ jêh ri nkhĭt khân păng; Khân păng cha lôt jŭr tâm dâng jâng gâp, mâu hôm dâk ôh.

⁴⁰ Yorlah Kôranh Brah rêt jêh rse bŭt gâp đah nau ktang gay ma tâm lơh, Jêh ri May ƀư ma phung rduh lơh gâp, chon mon panăp gâp.

⁴¹ Kôranh Brah đŏng ƀư ăn ma phung rlăng gâp rle ndŭr kơi nchuăt du Gay gâp ƀư rai jêh phung tâm rmot đah gâp.

⁴² Khân păng n'gơr uănh, ƀiălah mâu geh bunuyh kơl rklaih ôh; Khân păng nter dăn ma Brah Yêhôva, ƀiălah Păng mâu plơ̆ sĭt lah ôh.

⁴³ Gâp mbang hăch khân păng nâm bu neh muy, Ƀư nchah rai, jot khân păng nâm bŏk rŏ trong.

⁴⁴ May tâm rklaih jêh gâp tă bơh nau tâm rlăch đah phung ƀon lan; May prăp gâp gay ăn jêng bôk ma lĕ bri dak; Du ntĭl mpôl gâp mâu gĭt năl mra pah kan ma gâp.

⁴⁵ Phung bu năch mra râm nsâr văch ma gâp; Tơlah khân păng tăng lư ma gâp, khân păng tông bâr gâp.

⁴⁶ Phung bu năch mra rdja nuih, Jêh ri văch râm sâr tă bơh ntŭk khân păng nde krap.

⁴⁷ Brah Yêhôva gŭ rêh mro mrăng jêh ri khư mât ton jêng lŭ toyh ma gâp! Tâm rnê Brah Ndu jêng lŭ nau tâm rklaih gâp!

⁴⁸ Brah Ndu nơm plơng bôk ma gâp, Păng ƀư ăn phung ƀon lan tông bâr gâp,

⁴⁹ Jêh ri rklaih gâp bơh phung rlăng. Kôranh Brah n'hao gâp ta klơ prêh lơn phung rlăng gâp, Jêh ri rklaih gâp bơh phung janh ƀai.

⁵⁰ Yor ri, hơi Brah Yêhôva! Gâp mra tâm rnê ma May ta nklang phung mpôl băl, Jêh ri mprơ tâm rnê ma amoh May.

⁵¹ Brah Yêhôva ăn nau tâm rklaih toyh ma hađăch Păng săch jêh, Jêh ri tâm mpơl nau ueh ma nơm Păng tŏ jêh dak ƀâu kah, Jêng Y-Đavit jêh ri ma noi deh păng kŏ tât ƀaƀơ n'ho ro.”