II Samuel 21 - Nau Brah Ndu Ngơi 2023

Nau ji ngot tâm pe năm. – Nau plơng bôk ma phung Gibêôn

¹ Dôl rnôk rô̆ Y-Đavit, geh nau ji ngot jŏ jong tâm pe năm. Yor ri, Y-Đavit joi muh măt Brah Yêhôva. Brah Yêhôva plơ̆ lah: “Nau aơ dơi tât yorlah Y-Sôl jêh ri phung ngih păng geh nau ƀư tih nkhŭt mham, tơlah păng nkhĭt jêh phung Gibêôn.”

² Hađăch kuăl phung Gibêôn tât jêh ri ngơi ndrel đah khân păng — Phung Gibêôn mâu jêng phung Israel ôh, ƀiălah khân păng jêng hôm e klen tă bơh phung Amôrit. Nđâp tơlah phung Israel hŏ geh nau ton ma khân păng, ƀiălah Y-Sôl hŏ joi nau ƀư rai khân păng yor nau duh nđơr păng ma phung ƀon lan Israel jêh ri phung Yuđa.

³ Y-Đavit ôp phung Gibêôn: “Moh nau gâp ƀư ma khân may? Jêh ri moh ndơ gâp mra sŏk ŭch ƀư kloh nau tih; gay ma khân may dơi mât ton ma drăp ndơn Brah Yêhôva?”

⁴ Phung Gibêôn plơ̆ lah ma hađăch: “Nau vah vang hên đah Y-Sôl jêh ri phung ngih păng, mâu di nau đah prăk mâu lah mah ôh, mâu đŏng di hên ŭch nkhĭt du huê tâm phung Israel.” Y-Đavit ôp đŏng: “Pôri, moh ndơ gâp mra ƀư ăn ma khân may?”

⁵ Khân păng lah ma hađăch: “Ma bunuyh hŏ ƀư mhĭk hên jêh ri mĭn ŭch ƀư rai hên, gay ma hên mâu geh ntŭk ôh tâm lam n'gor bri Israel,

⁶ dăn jao hom ma hên pơh nuyh tâm phung kon bu klâu păng, gay hên yông khân păng tra năp măt Brah Yêhôva ta Gibêa, ta ƀon Y-Sôl jêng nơm Brah Yêhôva hŏ săch jêh.” Hađăch lah: “Gâp mra jao khân păng.”

⁷ Y-Đavit om Y-Mêphibôset, kon bu klâu Y-Jônathan, sau Y-Sôl, yor nau sơm ton tâm ton Y-Đavit đah Y-Jônathan, kon bu klâu Y-Sôl, hŏ ƀư nau tâm rnglăp tanăp măt Brah Yêhôva.

⁸ Ƀiălah hađăch nhŭp Y-Armôni jêh ri Y-Mêphibôset jêng bar hê kon bu klâu H'Rispa, kon bu ur Y-Aiya, hŏ deh ma Y-Sôl; ndrel ma prăm nuyh kon bu klâu H'Mêrap, kon bu ur Y-Sôl, hŏ deh ma Y-Adriêl, kon bu klâu Y-Barsilai bunuyh Mêhôlat,

⁹ jêh ri jao khân păng tâm ti phung Gibêôn. Phung nây yông trô ko khân păng ta klơ yôk, tanăp Brah Yêhôva. Pơh nuyh khân păng khĭt ndrel du tơ̆, bu nkhĭt khân păng tâm nar bôk yan rek, jêng ntơm saơm yan rek ba ôrgơ.

¹⁰ H'Rispa, kon bu ur Y-Aiya, sŏk du pŏk bok ƀau lăk klơ lŭ dŏng ƀư sưng bê̆ch ma păng nơm. Jêh nây ntơm bơh yan rek kŏ tât tơlah geh dak mih tă bơh trôk nkhŭt jŭr ta săk jăn khĭt khân păng; nôk nar păng nching mâu ăn ôh sĭm tâm trôk drâm klơ khân păng, mâu lah mpô mpa bri văch dăch khân păng dôl măng.

¹¹ Tơlah bu mbơh ma Y-Đavit nau H'Rispa, kon bu ur Y-Aiya, ur yông Y-Sôl, ƀư jêh,

¹² Y-Đavit hăn sŏk nting Y-Sôl jêh ri nting Y-Jônathan, kon bu klâu Y-Sôl, ntơm bơh phung mât uănh ƀon Jabes tâm n'gor Gilêat. Phung nây hŏ sŏk ntŭng săk jăn khĭt Y-Sôl jêh ri kon păng tă bơh ta nklang ƀon Bet-San, ntŭk phung Philistin yông ko khân păng tâm nar phung Philistin dơi đah Y-Sôl ta Gilbôa.

¹³ Jêh nây hađăch djôt leo nting Y-Sôl jêh ri nting Y-Jônathan, kon păng, plơ̆ sĭt tă bơh Jabes. Bu sŏk đŏng lĕ nting phung bu yông jêh nko,

¹⁴ jêh ri khân păng tâp nting Y-Sôl jêh ri Y-Jônathan tâm môch Y-Kis, mbơ̆ Y-Sôl, ta ƀon Sêla, tâm n'gor Benjamin. Jêh bu ƀư lôch jêh lĕ nau hađăch ntĭnh jêh, Brah Ndu tăng nau bu mbơh sơm ma bri dak.

Nau tâm lơh đah phung tahan Philistin

¹⁵ Du tơ̆ đŏng, phung Philistin tâm lơh đah phung Israel. Y-Đavit jêh ri phung oh mon păng hăn trŭnh jêh ri tâm lơh đah phung Philistin. Ƀiălah Y-Đavit gĭt ma păng nơm lĕ rgănh ngăn jêh.

¹⁶ Rnôk nây, Y-Isbi-Bênôp, kon sau Rapha, geh du n'gâr tak ma kông njing jâk pe kilô n'gul, cheng du đao mhe, jêh ri ŭch nkhĭt Y-Đavit.

¹⁷ Ƀiălah Y-Abisai, kon H'Sêruya, hŏ văch kơl hađăch, lơh bu klâu Philistin, jêh ri nkhĭt păng. Ntơm bơh nây, phung tahan Y-Đavit sơm ton jêh ri lah ma hađăch: “May mâu mra hôm hăn nau tâm lơh ndrel hên, om ŭnh kađen Israel mâu geh ôh nhhât.”

¹⁸ Jêh nau nây, hôm geh nau tâm lơh êng đah phung Philistin ta ƀon Gôp. Rnôk nây taơ, Y-Sibêkai, bu klâu Husa, nkhĭt Y-Sap, jêng kon sau Rapha.

¹⁹ Tâm ban đŏng ta Gôp, tâm nau tâm lơh êng đah phung Philistin, Y-Êlhanan, kon bu klâu Y-Jarê-Ôrêgim, bunuyh Ƀêtlêhem, nkhĭt Y-Gôliat ƀon Gat; n'gâr tak păng nâm bu mâng mpeh tanh.

²⁰ Geh đŏng nau tâm lơh êng ta ƀon Gat, geh du huê bunuyh toyh juat geh prao nglau ti ta ăp mpang ti păng jêh ri geh prao nglau jâng ta ăp jâng păng, lĕ rngôch jêng bar jât ma puăn nglau; păng tâm ban lĕ jêng mpôl ntil Rapha.

²¹ Bunuyh aơ vay mưch ma phung Israel, Y-Jônathan, kon bu klâu nâu Y-Đavit jêng Y-Simêa, nkhĭt păng.

²² Puăn nuyh phung Philistin aơ bu deh ta ƀon Gat, noi deh phung Rapha; khân păng khĭt tâm ti Y-Đavit jêh ri ma ti phung oh mon păng.