II Samuel 20 - Nau Brah Ndu Ngơi 2023

Y-Sêba ƀư nau tâm rdâng

¹ Ta nây geh du huê bunuyh dơm dam, amoh Y-Sêba, kon bu klâu Y-Bikri, bunuyh Benjamin. Păng uh nŭng jêh ri kuăl: “He mâu geh du kô̆ tâm Y-Đavit ôh, Mâu đŏng geh dơn drăp ndơ tâm kon Y-Yêsê Hơi phung Israel, ăp nơm plơ̆ sĭt hom ma ngih păng nơm!”

² Lĕ rngôch phung Israel chalơi Y-Đavit gay hăn tĭng ndô̆ Y-Sêba, kon Y-Bikri. Ƀiălah phung Yuđa ăt răp jăp ma hađăch, tĭng ndô̆ hađăch ntơm bơh dak krong Yurdan tât ma ƀon Yêrusalem.

³ Tơlah Y-Đavit plơ̆ sĭt tât ma ngih hađăch ta ƀon Yêrusalem; jêh ri hađăch sŏk jât nuyh ur yông păng hŏ ăn mât mray ngih hađăch, ăn ma khân păng gŭ krŭng tâm du ngih êng geh tahan kâp njrăng. Hađăch ăn ndơ sông sa ma khân păng dŏng, ƀiălah mâu hăn tât ôh ma khân păng. Tâm ban pônây, bu krŭng khân păng, gŭ rêh nâm bu bunuyh ndrô kŏ tât nar khân păng khĭt.

Bu nkhĭt Y-Amasa jêh ri Y-Sêba

⁴ Jêh ta nây, hađăch lah ma Y-Amasa: “Tâm pe nar, kuăl hom tâm rƀŭn ma gâp phung tahan Yuđa, jêh ri may nơm văch ta aơ tâm ban lĕ.”

⁵ Y-Amasa hăn kuăl phung Yuđa tâm rƀŭn, ƀiălah păng gŭ kâp rlau nar hađăch lĕ dăp nal jêh ma păng.

⁶ Y-Đavit lah ma Y-Abisai: “Aƀaơ ri, Y-Sêba, kon bu klâu Y-Bikri, mra ƀư mhĭk ma he âk lơn ma Y-Apsalôm. Pônây, sŏk hom phung tahan kôranh may jêh ri tĭng Y-Sêba, klach lah păng rvan sŏk lĕ ƀon nâp jêh ri păng du klaih tă bơh he.”

⁷ Rnôk nây, phung tahan Y-Jôap, phung Chêrêthit, phung Pêlêthit jêh ri lĕ rngôch phung tahan janh ktang, hăn tĭng ndô̆ Y-Abisai da dê. Khân păng luh du tă bơh Yêrusalem, tĭng Y-Sêba, kon bu klâu Y-Bikri.

⁸ Tơlah khân păng tât dăch lŭ toyh ƀon Gibêôn, saơ Y-Amasa hăn tâm mâp đah khân păng. Y-Jôap nsoh jêh kho ao tahan, geh rse vân bŭt cheng du mlâm đao geh ndrop. Dôl păng chuat hăn rlet panăp, đao nây tŏk jêh tă tâm ndrop.

⁹ Y-Jôap lah ma Y-Amasa: “Mbah ma may, may geh nau đăp mpăn lĕ?” Jêh nây ti ma Y-Jôap kuăn ta têp Y-Amasa gay chŭm păng.

¹⁰ Y-Amasa mâu saơ ôh đao ta ti đah ri Y-Jôap jêh ri Y-Jôap ntâp ma đao ta ndŭl, proch Y-Amasa luh lŭng ta neh; păng khĭt, mâu hôm geh ntâp tal bar đŏng ôh. Jêh nây, Y-Jôap jêh ri Y-Abisai, oh păng, tĭng đŏng Y-Sêba, kon bu klâu Y-Bikri.

¹¹ Du huê bu klâu ndăm tâm phung tahan Y-Jôap gŭ dâk dăch săk jăn Y-Amasa jêh ri kuăl: “Mbu rŏng ma Y-Jôap, jêh ri mbu nơm gŭ mpeh Y-Đavit, tĭng ndô̆ hom Y-Jôap.”

¹² Săk jăn Y-Amasa bêng ma mham, bê̆ch ta nklang trong. Nơm nây saơ lĕ rngôch bunuyh gŭ nsrŭng da dê êp săk jăn Y-Amasa, yor ri mpâk lơi săk jăn Y-Amasa tă bơh trong, ăn tâm du mir, jêh nây put păng ma du blah bok.

¹³ Tơlah lĕ sŏk jêh păng tă bơh trong, lĕ rngôch phung ƀon lan hăn tĭng ndô̆ Y-Jôap, gay tĭng rgot Y-Sêba, kon bu klâu Y-Bikri.

¹⁴ Y-Sêba hăn lam lĕ ndŭl mpôl Israel, tât ma ƀon Abel Bet-Maka; lĕ rngôch phung Bêrit tâm rgum da dê jêh ri tĭng ma păng.

¹⁵ Lĕ rngôch phung tahan Y-Jôap hăn nchueng jŭm Y-Sêba tâm Abel Bet-Maka. Khân păng n'hao neh ta pĭt mpêr ƀon, tâm tham đah pôih. Jêh nây khân păng mbang chah mpêr ƀon gay kăl lơi păng.

¹⁶ Rnôk nây, geh du huê bu ur blau mĭn gŭ tâm ƀon kuăl huy ma khân păng, jêh ri lah: “Iăt, iăt hom! Mbơh hom ma Y-Jôap: ‘Văch dăch hom ta aơ, gâp ŭch nkoch bri ma păng.’”

¹⁷ Tơlah Y-Jôap văch dăch, bu ur ôp: “May jêng Y-Jôap lĕ?” Păng plơ̆ lah: “Di, gâp yơh.” Bu ur lah đŏng: “Iăt hom nau oh mon bu ur may.” Păng plơ̆ lah: “Gâp iăt.”

¹⁸ Bu ur nây lah: “Rnôk kăl e ri bu vay lah tâm pô aơ: ‘Hăn hom ôp sek nau mĭn bunuyh ƀon lan ƀon Abel, ri mơ khân păng dơi ƀư kan nâm bu kơt nĕ.’

¹⁹ Ƀon hên jêng du rplay ƀon nau đăp mpăn jêh ri răp jăp ngăn tâm phung Israel, ƀiălah may joi nau ƀư rai lơi du rplay ƀon tơm ma phung Israel! Mâm ƀư may ŭch ƀư rai drăp ndơn Brah Yêhôva?”

²⁰ Y-Jôap plơ̆ lah: “Mâu ôh! Gâp mâu mâp mĭn nau ƀư rai mâu lah mbang chah tâm ban pônây ôh!

²¹ Nau nây mâu di jêng nau mĭn gâp ôh. Ƀiălah geh du huê bunuyh gŭ ta bri klơ dor yôk Êphraim, amoh Y-Sêba, kon bu klâu Y-Bikri, păng hŏ dâk tâm rdâng đah hađăch Đavit. Jao hom knŏng du huê păng dơm, gâp mra rŭch plơ̆ tă bơh ƀon aơ.” Bu ur nây lah ma Y-Jôap: “Ri, bu mra mƀăr bôk păng rlau mpêr ƀon ăn ma may.”

²² Jêh nây bu ur nây văch tanăp lĕ rngôch phung ƀon lan, jêh ri blau mĭn nsŭk nsôr khân păng. Bu koh trô ko Y-Sêba, kon Y-Bikri, jêh ri mƀăr ăn ma Y-Jôap. Y-Jôap uh nŭng rŭch plơ̆ phung tahan, lĕ rngôch bunuyh du tă bơh ƀon, ăp nơm plơ̆ sĭt rlet ma ngih khân păng nơm. Bi Y-Jôap plơ̆ sĭt ma hađăch ta Yêrusalem.

²³ Rnôk nây taơ, Y-Jôap jêng kôranh toyh ma lĕ rngôch phung tahan Israel; Y-Bênaya, kon bu klâu Y-Jêhôida, jêng kôranh chiă uănh ma phung Chêrêthit jêh ri phung Pêlêthit;

²⁴ Y-Adôniram jêng kôranh ma kan pi; Y-Jêhôsaphat, kon Y-Ahilut, jêng kâp nchih prăp nau tât;

²⁵ Y-Sêva jêng kôranh nchih samƀŭt; Y-Sadôk jêh ri Y-Abiathar jêng phung kôranh ƀư brah.

²⁶ Bi Y-Ira, bunuyh Jarit, jêng kôranh ƀư brah ma Y-Đavit.