II Samuel 2 - Nau Brah Ndu Ngơi 2023

Bu njêng Y-Đavit jêng hađăch phung Yuđa ta Hêbron

¹ Jêh nau nây, Y-Đavit ôp ma Brah Yêhôva: “Gâp dơi lĕ hăn ma du ƀon tâm ăp rplay ƀon tâm n'gor Yuđa?” Brah Yêhôva plơ̆ lah: “Hăn hao hom.” Y-Đavit lup tay: “Moh ƀon gâp mra hăn?” Brah Yêhôva plơ̆ lah: “Ƀon Hêbron.”

² Y-Đavit hăn tât ta nây, djôt leo bar hê ur păng H'Ahinôam, bunuyh Jesrêel, jêh ri H'Abigêl, ur drô Y-Nabal ta Karmel.

³ Y-Đavit djôt đŏng phung gŭ ndrel ma păng, nđâp ma phung tâm ngih khân păng, hăn gŭ tâm lĕ ƀon tâm nkual Hêbron.

⁴ Phung Yuđa hăn tât ta nây jêh ri tŏ dak ƀâu kah ma Y-Đavit jêng hađăch ma ngih Yuđa. Bu mbơh ma Y-Đavit: “Phung ƀon lan ta ƀon Jabes Gilêat hŏ tâp jêh Y-Sôl.”

⁵ Y-Đavit prơh phung mbơh hăn tât phung ƀon lan Jabes Gilêat: “Dăn ma Brah Yêhôva ăn nau ueh uĭn ma khân may, yorlah khân may hŏ mpơl jêh nuih n'hâm ueh ma Y-Sôl, kôranh khân may, jêh ri tâp păng!

⁶ Dăn ma Brah Yêhôva tâm mpơl nau ueh jêh ri nau răp jăp ma khân may! Bi gâp tâm ban đŏng mra ƀư ueh ma khân may, yorlah khân may hŏ ƀư jêh nau nây.

⁷ Ăn ti khân may jêng ktang, mpơl hom khân may jêng phung nanh janh; yorlah Y-Sôl, kôranh khân may lĕ khĭt jêh, ƀiălah ngih Yuđa hŏ tŏ dak ƀâu kah ta gâp ăn jêng hađăch ma khân păng.”

Y-Isbôset chiă uănh phung Israel

⁸ Rnôk nây, kôranh ma phung tahan Y-Sôl jêng Y-Apner, kon Y-Ner, leo kon bu klâu Y-Sôl jêng Y-Isbôset tât ma ƀon Mahanaim,

⁹ ndâk njêng păng ƀư hađăch ma phung Gilêat, phung Asurit, phung Jesrêel, phung Êphraim, phung Benjamin, jêh ri ma lĕ phung Israel.

¹⁰ Tơlah Y-Isbôset, kon bu klâu Y-Sôl, ntơm chiă uănh phung Israel, păng hŏ geh puăn jât năm, jêh ri păng chiă uănh bar năm. Knŏng geh ngih Yuđa hăn tĭng Y-Đavit.

¹¹ Jêh ri rnôk Y-Đavit gŭ ta ƀon Hêbron, chiă uănh ma ngih Yuđa, geh pơh năm ma prao khay.

Y-Jôap tâm lơh đah Y-Apner. – Y-Asahel khĭt

¹² Y-Apner, kon Y-Ner, jêh ri phung oh mon Y-Isbôset, kon Y-Sôl, du luh bơh Mahanaim hăn tât ma Gibêôn.

¹³ Y-Jôap, kon H'Sêruya, jêh ri phung oh mon Y-Đavit tâm ban lĕ hăn tât. Khân păng tâm mâp ndrăng khân păng ta dak nglao Gibêôn; du phung gŭ mpeh đah aơ dak nglao, jêh ri du phung êng gŭ mpeh đah ri.

¹⁴ Rnôk nây, Y-Apner lah ma Y-Jôap: “Ăn phung ndăm dâk jêh ri tâm lơh đah ndrăng khân păng tra năp he!” Y-Jôap lah: “Ơ, ăn khân păng tâm lơh.”

¹⁵ Pôri khân păng dâk, hăn luh kơp rnoh tâm ban âk: jât ma bar nuyh phung Benjamin yor Y-Isbôset, kon Y-Sôl, jêh ri jât ma bar nuyh tâm phung oh mon Y-Đavit.

¹⁶ Ăp nơm kuăn ta bôk nơm rdâng păng, ntâp chiông đao ta pŭng; lĕ rngôch cha lôt khĭt. Yor ri, ntŭk nây bu ntơ Mir Đao, ta Gibêôn.

¹⁷ Nar nây, geh du nau tâm lơh ktang ngăn, Y-Apner jêh ri phung tahan Israel rai yot tanăp phung oh mon Y-Đavit.

¹⁸ Ta nây, geh pe nuyh kon H'Sêruya, jêng Y-Jôap, Y-Abisai, jêh ri Y-Asahel. Y-Asahel nchuăt ngăch ngăn nâm bu yơng tâm bri.

¹⁹ Y-Asahel nchuăt tĭng Y-Apner, mâu rle n'gĭl teng pa ma mâu lah pa chiau ôh tâm dôl păng tĭng.

²⁰ Y-Apner n'gĭl pakơi, jêh ri ôp: “Di lĕ may jêng Y-Asahel?” Păng plơ̆ lah: “Di ngăn, gâp yơh aơ.”

²¹ Y-Apner lah ma păng: “Teng hom pa ma may mâu lah pa chiau may, rduh dăch du huê tâm phung ndăm nây jêh ri pit sŏk ndơ tâm lơh păng.” Ƀiălah Y-Asahel mâu ntlơi nchuăt tĭng Y-Apner.

²² Y-Apner lah đŏng ma Y-Asahel: “Rlu lơi hom tă bơh trong tĭng gâp! Mâm dĭng may ŭch ma gâp lơh nkhĭt may? Yorlah tơlah kơt nĕ, mâm ƀư gâp hôm dơi uănh măt Y-Jôap jêng nâu may?”

²³ Yorlah Y-Asahel mâu ŭch plơ̆ ôh, yor nây Y-Apner ntâp păng ta ndŭl ma chiông tak kŏ tât rho đah ri. Y-Asahel cha lôt jêh ri khĭt ta ntŭk nây. Lĕ rngôch bunuyh hăn tât ta ntŭk Y-Asahel chôt khĭt nsrŭng da dê.

²⁴ Y-Jôap jêh ri Y-Abisai tĭng Y-Apner. Tơlah bar hê nây tât ta gôl yôk Amma tâm tham đah Giah, ta mpeh bri rdah Gibêôn, pôri nar lĕ nhâp.

²⁵ Phung Benjamin gŭ jŭm Y-Apner, jêng du phung tahan, jêh ri khân păng gŭ ta klơ du n'gơn yôk.

²⁶ Y-Apner kuăl toyh Y-Jôap jêh ri lah: “Mpiăt đao, mâu ŭch rlu hĕ nkhĭt bunuyh? May mâu gĭt hĕ kêng nglĕ dŭt mra knŏng jêng nau rngot? Ndah nâm jŏ may mra ntrŭnh ma phung ƀon lan may lơi hôm tĭng oh nâu khân păng?”

²⁷ Y-Jôap plơ̆ lah: “Nanê̆ tĭng nâm Brah Ndu gŭ rêh mro mrăng, tơlah may mâu ngơi ôh, phung ƀon lan ăt tĭng oh nâu khân păng tât ta ang ôi taơ.”

²⁸ Y-Jôap uh nŭng, lĕ rngôch phung ƀon lan rlu da dê, mâu hôm tĭng phung Israel ôh jêh ri mâu hôm tâm lơh đŏng ôh.

²⁹ Lĕ măng nây, Y-Apner jêh ri lĕ rngôch phung tĭng ndô̆ păng hăn rgăn Arabah. Khân păng rgăn dak krong Yurdan, jêh ri hăn lam Bitrôn, jêh nây khân păng tât ta Mahanaim.

³⁰ Y-Jôap rlu mâu hôm tĭng Y-Apner ƀiălah plơ̆ sĭt. Nôk tâm rƀŭn lĕ rngôch phung ƀon lan tâm phung oh mon Y-Đavit ƀiălah pưt jât ma sĭn nuyh jêh ri Y-Asahel.

³¹ Phung oh mon Y-Đavit nkhĭt jêh pe rhiăng prao jât nuyh phung Benjamin, jêng phung tahan Y-Apner.

³² Khân păng tung Y-Asahel jêh ri tâp păng tâm môch mbơ̆ păng ta Ƀêtlêhem. Jêh nây Y-Jôap jêh ri phung tahan păng hăn lĕ măng, tât ta Hêbron dôl dăch luh nar.