II Samuel 19 - Nau Brah Ndu Ngơi 2023

Phung ƀon lan njŭn Y-Đavit sĭt rgăn dak krong Yurdan

¹ Bu hăn nkoch ma Y-Jôap: “Aơ, hađăch nhĭm vơl jêh ri klâng ndrê yor Y-Apsalôm khĭt.”

² Pôri nar nây, nar nau dơi rlơ̆ jêng nar nhĭm nhhiăng lĕ rngôch phung ƀon lan; yorlah phung ƀon lan hŏ tăng bu lah hađăch rngot klâng ma nau khĭt kon hađăch.

³ Tâm nar nây, phung tahan lăp ntŭng tâm ƀon nâm phung tahan nchuăt du tă bơh ntŭk tâm lơh, plơ̆ sĭt ntŭng tâm nau prêng.

⁴ Bi hađăch rdêp măt păng, kuăl nhĭm nter huy ngăn: “Hơi Y-Apsalôm, kon bu klâu gâp! Hơi Y-Apsalôm, kon bu klâu gâp, kon bu klâu gâp!”

⁵ Y-Jôap lăp tâm ngih hađăch jêh ri lah: “Nar aơ may hŏ ƀư nau prêng ma lĕ rngôch phung oh mon may, jêng phung hŏ sâm rklaih jêh nau rêh may nar aơ, nau rêh phung kon bu klâu may, jêh ri phung kon bu ur may, nau rêh ur may jêh ri phung ur yông may đŏng.

⁶ Tâm ban pônây, may rŏng ma phung tâm rmot ma may, jêh ri tâm rmot ma phung rŏng ma may. Yorlah nar aơ may hŏ mpơl rah vah jêh nau may mâu uănh khlay ma phung kôranh chiă uănh tahan jêh ri phung oh mon may. Aƀaơ aơ, gâp gĭt tơlah nar aơ Y-Apsalôm hôm e rêh, jêh ri lĕ rngôch hên khĭt da dê, pôri hĕ may maak!

⁷ Aƀaơ, dăn hađăch dâk hom jêh ri hăn luh ngơi nau n'hao nuih ma phung oh mon may. Yorlah gâp sơm ton đah Brah Yêhôva: Tơlah may mâu hăn ôh, măng aơ mâu mra hôm geh du huê bunuyh gŭ n'hanh may ta aơ; jêh ri nau mhĭk nây mra jêng mhĭk lơn lĕ rngôch nau mhĭk tât jêh ma may ntơm bơh rnôk may hôm ndăm tât nar aơ.”

⁸ Rnôk nây, hađăch dâk jêh ri gŭ ta mpông ƀon. Tơlah bu mbơh ma lĕ rngôch phung ƀon lan gĭt pô aơ hađăch gŭ ta mpông ƀon, khân păng hăn văch tanăp hađăch. Rnôk nây, phung Israel hŏ nchuăt du jêh, ăp nơm plơ̆ sĭt ma ngih păng nơm.

Y-Đavit plơ̆ sĭt ma ƀon Yêrusalem

⁹ Tâm lĕ rngôch phung ndŭl mpôl Israel, bu nchră ndrăng khân păng pô aơ: “Hađăch tâm rklaih jêh he bơh ti phung rlăng, jêh ri păng rklaih jêh he bơh ti phung Philistin. Ƀiălah aƀaơ, păng du jêh bơh bri dak yor Y-Apsalôm.

¹⁰ Bi Y-Apsalôm, nơm he tŏ jêh dak ƀâu kah ăn jêng hađăch he, păng khĭt jêh tâm nau tâm lơh. Yor nây aƀaơ, mâm ƀư khân may mâu ngơi ôh du nau gay njŭn hađăch sĭt?”

¹¹ Hađăch Đavit njuăl nơm mbơh ma phung kôranh ƀư brah Y-Sadôk jêh ri Y-Abiathar: “Ôp hom ma phung bu ranh Yuđa pô aơ: ‘Mâm ƀư khân may jêng phung nglĕ dŭt njŭn leo hađăch sĭt ma ngih păng, nôk tâm nchră ma nau nây tâm lam phung Israel hŏ tăng tât ta tôr hađăch?

¹² Khân may jêng phung băl mpôl gâp, jêng noi deh du mham gâp. Mâm ƀư khân may jêng phung nglĕ dŭt njŭn hađăch sĭt?’

¹³ Khân may tâm ban lĕ lah hom ma Y-Amasa pô aơ: ‘Mâu di hĕ may jêng nting gâp jêh ri nglay săk gâp? Tơlah ntơm aƀaơ rlet panăp, may mâu ƀư kôranh ma phung tahan gâp ntrok ma Y-Jôap, dăn Brah Ndu rmal ma gâp jâk ngăn.’”

¹⁴ Pônây, phung Yuđa rŏng ngăn ma Y-Đavit, lĕ rngôch khân păng nâm bu du huê bunuyh dơm. Khân păng prơh bu hăn mbơh ma hađăch: “Dăn hađăch jêh ri lĕ rngôch phung oh mon may plơ̆ sĭt hom.”

¹⁵ Hađăch plơ̆ sĭt jêh ri tât ta dak krong Yurdan. Phung Yuđa hăn tât ta Gilgal gay chuă vơt jêh ri njŭn hađăch rgăn dak krong Yurdan.

Y-Đavit yô̆ an ma Y-Simei

¹⁶ Y-Simei, kon Y-Gêra, bunuyh Benjamin, gŭ ta ƀon Bahurim, hăn trŭnh ndal ndrel phung Yuđa gay vơt hađăch Đavit.

¹⁷ Du rbăn nuyh phung Benjamin hăn ndrel ma păng. Geh đŏng Y-Siba, oh mon tâm ngih Y-Sôl, ndrel ma jât mprăm nuyh kon bu klâu păng jêh ri bar jât nuyh phung oh mon, khân păng hăn ndal tât ta dak krong Yurdan lor panăp hađăch.

¹⁸ Khân păng rgăn ntŭk dak krong suăt gay ran mâp phung tâm ngih hađăch jêh ri ƀư lĕ moh ndơ hađăch ŭch. Dôl hađăch ntơm rgăn dak krong Yurdan, Y-Simei, kon bu klâu Y-Gêra, chon mon ta neh tra năp hađăch,

¹⁹ jêh ri lah: “Vơl dăn ma kôranh gâp lơi klăp ndăng ôh nau tih gâp, jêh ri lơi hôm kah gĭt ma nau djơh mhĭk oh mon may hŏ ƀư tih jêh tâm nar hađăch jêng kôranh gâp du luh tă bơh Yêrusalem. Dăn hađăch lơi djôt prăp ôh nau nây tâm nuih n'hâm.

²⁰ Oh mon may gĭt năl jêh nau tih. Ƀiălah nar aơ, gâp jêng nơm lor lơn tâm lĕ rngôch ngih Y-Yôsep, gâp hŏ trŭnh lor gay chuă vơt hađăch jêng kôranh gâp.”

²¹ Y-Abisai, kon bu klâu H'Sêruya, ôp: “Pôri, bu mâu mra nkhĭt ôh hĕ ma Y-Simei yorlah hŏ rak rtăp jêh ma nơm Brah Yêhôva tŏ dak ƀâu kah?”

²² Ƀiălah Y-Đavit plơ̆ lah ma păng: “Hơi kon bu klâu H'Sêruya, moh nau gâp geh ƀư tih đah khân may, dĭng nar aơ khân may rlơ̆ jêng nâm bu bunuyh tâm rdâng đah gâp? Tâm du nar nâm bu ma nar aơ mâm ƀư nkhĭt tay du huê tâm phung Israel? Di lĕ gâp mâu gĭt nar aơ gâp jêng hađăch ma phung Israel?”

²³ Hađăch lah ma Y-Simei: “May mâu khĭt ôh.” Jêh nây hađăch sơm ton đah păng.

Y-Mêphibôset chuă vơt hađăch Đavit

²⁴ Y-Mêphibôset, kon Y-Sôl, tâm ban đŏng hăn trŭnh chuă vơt hađăch. Păng mâu geh rao jâng ôh, mâu lĕ kreh têp, jêh ri mâu lah pih kho ao păng, ntơm bơh nar hađăch luh hăn kŏ tât nar păng plơ̆ sĭt ma nau đăp mpăn.

²⁵ Tơlah păng văch bơh Yêrusalem ŭch chuă vơt hađăch, hađăch lah ma păng: “Mâm ƀư may mâu hăn ôh ndrel ma gâp, Y-Mêphibôset?”

²⁶ Păng plơ̆ sĭt lah: “Hơi hađăch jêng kôranh gâp, oh mon gâp ndơm gâp. Yorlah oh mon may jêng rvĕn, rĭ dĭng đă păng: ‘Sâm rêt ưn seh bri gay ma gâp dơi ncho hăn ndrel hađăch.’

²⁷ Ƀiălah păng nchơt nau gâp ngơi ma hađăch jêng kôranh gâp. Ƀiălah, hađăch jêng kôranh gâp nâm bu tông mpăr Brah Ndu, ƀư hom moh nau may mĭn ueh.

²⁸ Yorlah lĕ rngôch ngih mbơ̆ gâp knŏng jêng phung bunuyh prăp ma nau khĭt tanăp măt hađăch jêng kôranh gâp dơm, ƀiălah may n'gân dơm oh mon may ndrel ma phung gŭ sông sa ta sưng sông may. Pônây, moh nau dơi êng đŏng gâp hôm geh gay ŭch dăn ma hađăch?”

²⁹ Hađăch plơ̆ lah ma păng: “Ndơ hôm may ngơi ma nau kan may? Gâp hŏ đă jêh may jêh ri Y-Siba tâm pă hom neh.”

³⁰ Y-Mêphibôset lah ma hađăch: “Ơ, ăn Y-Siba sŏk lĕ rngôch, yorlah hađăch jêng kôranh gâp hŏ plơ̆ sĭt jêh ma nau đăp mpăn jêng ueh ngăn.”

Y-Đavit ăn nau nkhôm ma Y-Barsilai

³¹ Rnôk nây, Y-Barsilai bu klâu Y-Gilêat trŭnh văch tă bơh Rôgêlim, jêh ri păng hăn ndrel ma hađăch rgăn dak krong Yurdan gay njŭn ma hađăch rgăn kơh đah ri dak krong.

³² Y-Barsilai hŏ ranh ngăn, păng geh pham jât năm. Păng kơl jêh ndơ sông sa ăn ma hađăch dôl hađăch gŭ ta Mahanaim, yorlah păng jêng du huê bunuyh ndrŏng ngăn.

³³ Hađăch lah ma Y-Barsilai: “Hăn rgăn hom dak krong Yurdan ndrel ma gâp jêh ri gŭ ndrel ma gâp ta Yêrusalem, gâp siăm rong may.”

³⁴ Ƀiălah Y-Barsilai lah ma hađăch: “Dŭm nâm jŏ năm gâp hôm rêh dĭng gâp hăn tay ndrel hađăch ma Yêrusalem?

³⁵ Nar aơ gâp geh jêh pham jât năm, hôm gĭt vât nau ueh mâu lah nau mhĭk đŏng? Oh mon may kŏ mâu hôm gĭt năl kah mâu lah sât ndô ndơ he sa jêh ri nhêt, mâu hôm geh nau maak lĕ tơlah tăng bu klâu mâu lah bu ur mpât mprơ? Pônây, mâm ƀư oh mon may ƀư tay nau jâk ma hađăch jêng kôranh gâp?

³⁶ Oh mon may mra hăn ndrel may tât vah vang mpeh đah ri kơh krong Yurdan. Ƀiălah mâm ƀư hađăch ŭch nkhôm ăn gâp kơt nĕ?

³⁷ Gâp dăn ma may ăn oh mon may plơ̆ sĭt, gay ăn gâp khĭt tâm ƀon gâp nơm, êp môch me mbơ̆ gâp. Ƀiălah aơ jêng Y-Chimham, oh mon may, păng mra rgăn dak krong Yurdan ndrel ma hađăch jêng kôranh gâp, ƀư hom ma păng tĭng nâm may mĭn ueh.”

³⁸ Hađăch plơ̆ lah: “Y-Chimham mra rgăn hăn ndrel gâp, jêh ri gâp mra ƀư ma păng tĭng nâm bu lĕ rngôch nau may ŭch mĭn ueh. Lĕ nau may dăn ma gâp, gâp mra ăn ma may.”

³⁹ Pônây, lĕ rngôch phung ƀon lan rgăn dak krong Yurdan da dê, jêh ri hađăch rgăn đŏng. Hađăch chŭm Y-Barsilai jêh ri ăn nau ueh uĭn ma păng. Jêh nây păng plơ̆ sĭt ma ngih vâl păng nơm.

⁴⁰ Bơh nĕ, hađăch hăn tât ma ƀon Gilgal, geh Y-Chimham hăn ndrel ma păng. Lĕ rngôch phung ƀon lan Yuđa jêh ri du n'gul phung ƀon lan Israel hŏ njŭn hađăch hăn.

Phung Israel jêh ri phung Yuđa tâm djrel ma nau chuă vơt hađăch

⁴¹ Rnôk nây, lĕ rngôch phung Israel hăn tât ma hađăch, jêh ri ôp: “Mâm ƀư phung oh nâu hên jêng phung Yuđa, hăn ntŭng chuă vơt may jêh ri njŭn leo hađăch hăn rgăn dak krong Yurdan ndrel ma phung tâm ngih hađăch jêh ri lĕ rngôch phung hăn tĭng ma hađăch?”

⁴² Lĕ rngôch phung Yuđa plơ̆ lah ma phung Israel: “Hên hŏ ƀư nau nây yor hađăch jêng mpôl băl dăch đah hên. Ƀiălah mâm ƀư khân may ji nuih yor nau aơ? Hên hŏ mâp sa lĕ du ntĭl ndơ hên rnơm tă bơh păng ăn? Mâu lah păng mâp ăn dơm lĕ ndô ndơ ma hên?”

⁴³ Phung Israel plơ̆ lah đŏng ma phung Yuđa: “Ma hađăch Đavit, hên geh jât mpôl băl prăp ma ngih hađăch; rlau lơn ma nĕ, hên geh âk nau di lơn ƀơh đah khân may. Pôri mâm ƀư khân may tâm rmot ir ma hên? Mâu hĕ di hên jêng phung lor lơn hŏ lah ma nau njŭn sĭt hađăch he?” Ƀiălah phung Yuđa ngơi ktang lơn ma phung Israel ngơi.