II Samuel 18 - Nau Brah Ndu Ngơi 2023

Y-Apsalôm mâu dơi jêh ri khĭt

¹ Y-Đavit kơp phung tahan tĭng păng, jêh nây dơm phung kôranh chiă uănh toyh ma du rbăn nuyh tahan jêh ri ma du rhiăng nuyh tahan.

² Y-Đavit prơh hăn phung tahan, du kô̆ tâm pe Y-Jôap mât uănh, du kô̆ tâm pe Y-Abisai, kon bu klâu H'Sêruya, oh Y-Jôap mât uănh, du kô̆ tâm pe Y-Itai bu klâu Gitit mât gai. Jêh ri hađăch lah ma phung tahan, “Gâp nơm tâm ban lĕ mra hăn ndrel ma khân may.”

³ Ƀiălah phung tahan lah: “May mâu mra hăn tâm lơh ôh. Yorlah tơlah hên nchuăt du, phung rlăng mâu mra meng ma hên ôh, tơlah du n'gul phung hên khĭt, khân păng mâu mra chrê ma hên lĕ; ƀiălah may geh rnoh khlay lơn ma hên jêng du rmưn tơ̆. Pôri aƀaơ, ueh lơn may gŭ tâm ƀon gay prơh bu hăn kơl hên.”

⁴ Hađăch lah ma khân păng: “Gâp mra ƀư nau khân may mĭn jêng ueh lơn.” Jêh nây hađăch dâk ta meng mpông ƀon, dôl lĕ rngôch phung tahan hăn phung rhiăng nuyh jêh ri phung rbăn nuyh.

⁵ Hađăch ntĭnh ma Y-Jôap, ma Y-Abisai, jêh ri ma Y-Itai: “Yor ma gâp, ăn khân may ƀư ma nau rdơ̆ ma nơm ndăm Y-Apsalôm.” Lĕ rngôch phung tahan iăt nau hađăch ntĭnh ma lĕ rngôch phung kôranh chiă uănh tahan nau ƀư ma Y-Apsalôm.

⁶ Phung tahan hăn tâm mir tâm lơh đah phung Israel. Nau tâm lơh tât geh ta nklang krŏng Êphraim.

⁷ Ta nây, phung tahan Y-Đavit dơi đah phung tahan Israel. Rnoh bunuyh khĭt âk ngăn. Nar nây, geh bar rmưn nuyh khĭt.

⁸ Nau tâm lơh lam n'gor bri nây; tâm nar nây, geh âk bunuyh khĭt roh tâm bri âk lơn đah nau khĭt ma tak đao.

⁹ Nkhêp, phung oh mon Y-Đavit tâm mâp đah Y-Apsalôm ncho du mlâm seh bri nchuăt tâm dâng lĕ n'gĭng si tơm n'ho. Bôk Y-Apsalôm văk ta tơm n'ho yông păng vah vang trôk jêh ri neh, bi seh bri nchuăt na nau.

¹⁰ Geh du huê bunuyh saơ nau nây jêh ri mbơh ma Y-Jôap: “Aơ, gâp lĕ saơ jêh Y-Apsalôm yông ta klơ tơm n'ho.”

¹¹ Y-Jôap lah ma nơm mbơh: “Moh nau! May hŏ saơ păng? Mâm ƀư may mâu sreh păng tŭp ta neh? Lah pônây, gâp mra nkhôm ma may jât glo prăk jêh ri du njăr rse vân bŭt.”

¹² Ƀiălah bu klâu nây lah ma Y-Jôap: “Nđâp tơlah may ăn ma gâp kuăn du rbăn glo prăk kđôi lĕ, gâp mâu yơr ôh ti gâp ƀư ma kon bu klâu hađăch; yorlah hên tăng jêh nau hađăch ntĭnh ma may, ma Y-Abisai, jêh ri ma Y-Itai pô aơ: ‘Yor gâp, king n'gang hom nau rêh bu klâu ndăm Y-Apsalôm.’

¹³ Rlau lơn ma nĕ, tơlah gâp mâu răp jăp jêh ri nkhĭt kon bu klâu hađăch, mâu dơi pôn mo ma hađăch ôh, jêh ri may nơm mra phong” gâp.

¹⁴ Y-Jôap lah: “Gâp mâu hôm geh mông ma may kơt nĕ ôh.” Jêh nây păng sŏk pe mlâm tak tâm ti, hăn tât ntâp tâm play nuih Y-Apsalôm dôl păng hôm rêh jêh ri yông ta klơ tơm n'ho.

¹⁵ Jât phung ndăm djôt ndơ tâm lơh Y-Jôap gŭ jŭm jêh ri lơh khĭt Y-Apsalôm.

¹⁶ Jêh nau nây, Y-Jôap uh nŭng jêh ri phung tahan mâu hăn tĭng phung tahan Israel đŏng, yorlah Y-Jôap nkân khân păng.

¹⁷ Khân păng sŏk săk jăn Y-Apsalôm mƀăr tâm ntu brŏng tâm krŏng, jêh nây bun lŭ ta klơ păng jêng du mpưm dŭt toyh. Rnôk nây, lĕ rngôch phung Israel nchuăt du da dê, ăp nơm plơ̆ sĭt ngih vâl păng nơm.

¹⁸ Y-Apsalôm dôl hôm rêh, păng ndâk jêh ma păng nơm du mlâm gâng tâm rlŭng Ngih Hađăch nâm du ntŭk ndray ma păng nơm, yorlah păng lah: “Gâp mâu geh kon bu klâu thoi ma amoh gâp.” Jêh nây păng sŏk amoh păng nơm dơm ta gâng nây; gâng nây ăt hôm rnha jêng ntŭk ndray Y-Apsalôm kŏ tât ta nar aơ.

Y-Đavit tăng lư Y-Apsalôm khĭt

¹⁹ Y-Ahimas, kon bu klâu Y-Sadôk, lah: “Ăn gâp nchuăt mbơh nau maak ma hađăch pô aơ Brah Yêhôva tâm rklaih jêh hađăch tă bơh ti phung rlăng păng.”

²⁰ Ƀiălah Y-Jôap lah: “Nar aơ, may mâu di jêng bunuyh mbơh nau răm maak. May mra mbơh nau răm maak tâm du nar êng, ƀiălah nar aơ mâu jêng ueh ôh, yorlah kon bu klâu hađăch lĕ khĭt jêh.”

²¹ Jêh nây Y-Jôap lah ma Y-Kus: “Hăn hom nkoch tay ma hađăch nau may lĕ saơ jêh.” Y-Kus chon mon mbah Y-Jôap, jêh nây nchuăt hăn.

²² Y-Ahimas, kon bu klâu Y-Sadôk, lah tay ma Y-Jôap: “Kđôi moh nau tât, ăn gâp nchuăt tĭng pakơi Y-Kus.” Y-Jôap ôp: “Hơi kon, mâm ƀư may ŭch nchuăt hăn? May mâu mra geh nau nkhôm ôh yor nau mbơh nây.”

²³ Y-Ahimas lah: “Kđôi lĕ moh nau tât, dăn ăn gâp nchuăt.” Y-Jôap lah ma păng: “Nchuăt hom.” Pôri, Y-Ahimas nchuăt tĭng trong neh lâng jêh ri păng rlet Y-Kus.

²⁴ Y-Đavit gŭ tâm nklang mpông ƀon. Bi bunuyh tahan gŭ gak hao klơ chor mpông pêr ta klơ mpêr ƀon, tơlah n'gơr măt uănh păng saơ du huê bunuyh nchuăt tât.

²⁵ Bunuyh tahan gŭ gak kuăl huy jêh ri mbơh ma hađăch. Hađăch lah: “Tơlah knŏng êng păng, păng văch tât gay mbơh.” Bunuyh nây nchuăt tât gơnh ro.

²⁶ Jêh nây, bunuyh tahan gŭ gak saơ đŏng du huê bunuyh êng nchuăt ran, păng kuăl bunuyh gŭ gak ta mpông pêr jêh ri lah: “Uănh hom, geh đŏng du huê bunuyh dôl nchuăt ran du huê dơm.” Hađăch lah: “Nơm nây tâm ban lĕ djôt leo nau mbơh.”

²⁷ Bunuyh tahan gŭ gak lah: “Gâp saơ bunuyh nchuăt lor, nâm bu săk jăn Y-Ahimas, kon bu klâu Y-Sadôk.” Hađăch lah: “Păng jêng du huê bunuyh ueh, nanê̆ păng văch mbơh nau ueh.”

²⁸ Y-Ahimas nter huy jêh ri mbơh ma hađăch: “Lĕ rngôch nau jêng ueh!” Jêh nây păng păn muh măt ta neh panăp hađăch, jêh ri lah tay: “Mât ton ma Yêhôva Brah Ndu hađăch, jêng Nơm hŏ rklaih ma hađăch luh bơh phung yơr ti tâm rdâng đah hađăch jêng kôranh gâp!”

²⁹ Ƀiălah hađăch ôp: “Bu klâu ndăm Y-Apsalôm geh nau đăp mpăn đŏng?” Y-Ahimas plơ̆ sĭt lah: “Tơlah Y-Jôap prơh oh mon may hăn, gâp saơ bu ƀư nau drơu drơu hâu ngăn, ƀiălah gâp mâu gĭt ôh moh nau lĕ tât geh.”

³⁰ Hađăch lah: “Du hom pa meng jêh ri dâk ta aơ.” Y-Ahimas du jêh ri dâk kâp ta nây.

³¹ Aơ, Y-Kus tât đŏng jêh ri lah: “Dăn hađăch jêng kôranh gâp tăng nau ueh aơ. Nar aơ, Brah Yêhôva tâm rklaih jêh may tă bơh ti lĕ rngôch phung dâk tâm rdâng đah may.”

³² Hađăch ôp ma Y-Kus: “Bu klâu ndăm Y-Apsalôm geh nau đăp mpăng đŏng?” Y-Kus plơ̆ lah: “Ăn phung rlăng đah hađăch jêng kôranh gâp, jêh ri lĕ rngôch phung dâk tâm rdâng gay ƀư mhĭk ma hađăch jêng nâm bu bu klâu ndăm nây lĕ!”

Y-Đavit nhĭm klâng ma Y-Apsalôm

³³ Hađăch phit nuih n'hâm hâu ngăn, hăn hao tâm jrô ta klơ mpông ƀon jêh ri nhĭm. Dôl păng chuat păng lah: “Hơi Y-Apsalôm, kon bu klâu gâp, kon bu klâu gâp! Y-Apsalôm, kon bu klâu gâp! Ueh lơn gâp khĭt ntrok may! Hơi Y-Apsalôm, kon bu klâu gâp, kon bu klâu gâp!”