II Samuel 17 - Nau Brah Ndu Ngơi 2023

Y-Husai ƀư roh lơi nau Y-Ahitôpel nchră

¹ Y-Ahitôpel lah tay ma Y-Apsalôm: “Ăn gâp săch du rmưn bar rbăn nuyh tahan, jêh ri gâp mra ăn khân păng tĭng Y-Đavit măng aơ ro.

² Gâp mra hăn rduh ran păng dôl păng rgănh, rdja nuih, jêh ri mra nhhu nkrit păng; lĕ rngôch phung tĭng păng mra nchuăt du, jêh ri gâp mra nkhĭt knŏng du huê hađăch.

³ Pônây, gâp mra njŭn lĕ rngôch phung ƀon lan plơ̆ sĭt ndrel ma hađăch. Nau khĭt du huê bunuyh may tĭng joi nây mra ăn lĕ rngôch plơ̆ sĭt ma hađăch, jêh ri lĕ rngôch phung ƀon lan mra geh nau đăp mpăn.”

⁴ Nau nchră nây ƀư maak ma Y-Apsalôm jêh ri lĕ rngôch kôranh bu ranh Israel.

⁵ Ƀiălah Y-Apsalôm lah: “Kuăl hom Y-Husai, bunuyh Arkit, văch ăn he iăt moh nau păng lah đŏng.”

⁶ Tơlah Y-Husai văch, Y-Apsalôm lah ma păng: “Y-Ahitôpel hŏ ngơi tâm ban pônây, he mra ƀư lĕ tĭng nâm nau nchră nây? Tơlah mâu di ôh, may ngơi hom.”

⁷ Y-Husai lah ma Y-Apsalôm: “Rơh aơ, nau Y-Ahitôpel nchră mâu ueh ôh.”

⁸ Y-Husai lah tay: “May gĭt lĕ ma mbơ̆ may jêh ri phung tĭng ndô̆ păng jêng phung tahan janh ktang; khân păng ji nuih nâm bu du mlâm kau tâm bri bu nhŭp ntŭng kon păng. Rlau lơn ma nây, mbơ̆ may jêng du huê tahan vay găn jêh âk nau tât, păng mâu mra bê̆ch măng ndrel ma phung tahan ôh.

⁹ Nđâp aƀaơ ri, păng dôl gŭ krap tâm trôm ntu mâu lah tâm ntŭk êng. Tơlah ntơm tâm lơh, geh phung tahan he ƀaƀă chôt khĭt jêh, lĕ rngôch phung tăng mra lah: ‘Mpeh phung Y-Apsalôm lĕ roh rai jêh.’

¹⁰ Aƀaơ, phung ktang lơn lĕ rngôch, nđâp lah janh ktang nâm bu yau mŭr kđôi, mra phit yor nau klach; yorlah lĕ rngôch phung Israel gĭt jêh ma hađăch mbơ̆ may jêng du huê janh ktang, jêh ri phung gŭ ndrel păng jêng phung janh nănh da dê.

¹¹ Pôri, gâp nchră kơt aơ: Ăn lĕ rngôch phung Israel tâm rgum ndrel may, ntơm bơh Dan tât ta Bêr-Sêba, jêng âk nâm bu choih tâm dak mƀŭt, jêh nây may nơm mra leo phung tahan păng hăn ma nau tâm lơh.

¹² He mra hăn lơh Y-Đavit ta ntŭk bu gĭt păng gŭ, jêh ri he mra nchueng jŭm păng nâm bu dak ngom truh ta neh; pônây, păng jêh ri lĕ rngôch phung tahan păng mâu geh du huê hôm gŭ rêh klen ôh.

¹³ Tơlah păng du krap gŭ tâm du rplay ƀon, lĕ rngôch phung Israel mra djôt rse brăt tât, jêh ri he mra mphâk ƀon nây trŭnh tâm rlŭng kŏ tât bu mâu hôm saơ rchuăl lŭ jê̆ ta nây.”

¹⁴ Y-Apsalôm jêh ri lĕ rngôch phung Israel lah da dê: “Nau nchră Y-Husai, bunuyh Arkit, jêng ueh lơn ma nau nchră Y-Ahitôpel.” Yorlah Brah Yêhôva hŏ nal jêh ŭch ƀư roh nau nchră Y-Ahitôpel, gay ăn nau mhĭk tât ma Y-Apsalôm.

Nau ndâp mbơh ăn Y-Đavit nchuăt du

¹⁵ Rnôk nây, Y-Husai lah ma bar hê kôranh ƀư brah Y-Sadôk jêh ri Y-Abiathar: “Y-Ahitôpel geh nchră kơt aơ kơt aơ ma Y-Apsalôm jêh ri ma phung bu ranh Israel, ƀiălah gâp lĕ nchră đŏng kơt ri kơt ri.

¹⁶ Pôri aƀaơ, prơh hom ro bunuyh hăn mbơh ma Y-Đavit: ‘Dăn hađăch lơi bê̆ch măng aơ ta lĕ ntŭk rgăn dak krong lăp bri rdah ôh, ƀiălah hăn rgăn dak krong ro; tơlah mâu, hađăch jêh ri lĕ rngôch phung hăn tĭng may mra rai lôch lĕ.’”

¹⁷ Y-Jônathan jêh ri Y-Ahimas gŭ kâp ma nau mhe ta Ên-Rôgel, khân păng mâu hăn lăp tâm ƀon yorlah klach bu saơ. Du huê oh mon bu ur hăn văch mbơh ma bar hê ăn khân păng gay khân păng mbơh tay ma hađăch Đavit.

¹⁸ Ƀiălah du huê ndăm saơ khân păng jêh ri mbơh ma Y-Apsalôm. Bar hê khân păng hăn ndal jêh ri tât ma ngih du huê bunuyh ta Bahurim. Bunuyh aơ geh du mlâm ntu dak tâm nkual ngih păng, jêh ri khân păng trŭnh ta nây.

¹⁹ Bu ur păng sŏk ndơ nkŭm put lơi bâr ntu dak nây, jêh nây sui ba ta klơ aơ gay bu mâu gĭt ôh ma nau nây.

²⁰ Phung oh mon Y-Apsalôm tât ta ngih bu ur nây jêh ri ôp: “Ta ntŭk Y-Ahimas jêh ri Y-Jônathan?” Bu ur nây plơ̆ lah: “Khân păng lĕ rgăn dak n'hor jêh.” Khân păng joi ƀiălah mâu dơi saơ, pôri khân păng plơ̆ sĭt ma ƀon Yêrusalem.

²¹ Jêh khân păng hăn jêh, Y-Ahimas jêh ri Y-Jônathan luh du tă bơh ntu dak jêh ri hăn mbơh ma Hađăch Đavit. Khân păng lah ma Y-Đavit: “Dâk hom jêh ri rgăn gơnh kơh dak krong, yorlah Y-Ahitôpel hŏ nchră jêh kơt aơ, kơt aơ gay tâm rdâng đah hađăch.”

²² Y-Đavit jêh ri lĕ rngôch phung gŭ n'hanh păng dâk rgăn dak krong Yurdan da dê. Ƀhit rvi ang, mâu hôm geh ôh du huê bunuyh ê hŏ rgăn dak krong Yurdan.

Y-Ahitôpel khĭt. – Y-Đavit ta Nahanaim

²³ Tơlah Y-Ahitôpel saơ bu mâu ƀư tĭng nau nchră păng, păng dăp ưn seh bri păng hăn trong plơ̆ sĭt ma ngih păng tâm ƀon păng nơm. Jêh păng ƀư lôch lĕ kan ma ngih vâl păng, păng nkhĭt săk nơm. Bu tâp păng tâm môch mbơ̆ păng.

²⁴ Rnôk nây Y-Đavit hăn tât ta Mahanaim, Y-Apsalôm ndrel ma lĕ rngôch phung Israel hăn tĭng păng rgăn dak krong Yurdan.

²⁵ Y-Apsalôm dơm njêng Y-Amasa jêng kôranh ma phung tahan ntrok Y-Jôap. Y-Amasa jêng du huê kon bu klâu du huê bunuyh Israel amoh Y-Itra, jêng bunuyh hŏ gŭ nsum đah H'Abigêl, kon bu ur Y-Nahas, jêh ri yuh H'Sêruya, mê̆ Y-Jôap.

²⁶ Phung Israel ƀư pôih rmlak ndrel ma Y-Apsalôm tâm n'gor Gilêat.

²⁷ Tơlah Y-Đavit lĕ tât ta ƀon Mahanaim, Y-Sôbi, kon bu klâu Y-Nahas, tă bơh ƀon Raba phung Ammôn, nđâp ma Y-Makir, kon bu klâu Y-Amiêl, tă bơh ƀon Lôdêbar, jêh ri Y-Barsilai bunuyh Gilêat, tă bơh ƀon Rôgêlim,

²⁸ djôt leo sưng bê̆ch, khăl ngan, ngan grưng, ba ƀlê, ba ôrgơ, rnih môi, ba vâr, tuh vanh, jêh ri lĕ ntil găr vâr ƀaƀă,

²⁹ dak sŭt, dak toh kŏt, âk biăp, jêh ri ƀănh dak toh sŏk bơh dak toh ndrôk, ma Y-Đavit jêh ri ma phung ƀon lan gŭ n'hanh păng sông sa. Yorlah khân păng lah pô aơ: “Phung ƀon lan ji ngot, ji hir jêh ri rgănh tâm bri rdah.”