II Samuel 16 - Nau Brah Ndu Ngơi 2023

Y-Đavit jêh ri Y-Siba

¹ Tơlah Y-Đavit hao lĕ rlau jêh n'gơn yôk, Y-Siba oh mon Y-Mêphibôset tâm mâp đah păng, ndrel ma bar mlâm seh bri dăp vơng rdeng bar rhiăng glo piăng let, du rhiăng glo ƀănh krăk ƀâu kro, du rhiăng ƀănh play rvi, du nông ndrănh krăk ƀâu.

² Hađăch ôp Y-Siba: “Moh nau may mra ƀư ma ndơ nây?” Y-Siba lah: “Lĕ seh bri ăn phung ta ngih hađăch ncho, ƀănh jêh ri play krăk ƀâu ƀư sông sa ma phung bu klâu ndăm, jêh ri ndrănh prăp ma phung lĕ huăr tâm bri rdah.”

³ Hađăch ôp: “Pônây, ta ntŭk kon bu klâu kôranh may?” Y-Siba lah: “Păng gŭ ta ƀon Yêrusalem, yorlah păng lah: ‘Nar aơ ngih Israel mra mplơ̆ tay ma gâp ƀon bri hađăch che gâp.’”

⁴ Hađăch lah ma Y-Siba: “Pônây, lĕ rngôch ndơ Y-Mêphibôset aƀaơ jêng ndơ may.” Y-Siba lah: “Gâp mbah ma may. Ăn gâp geh nau yô̆ ƀaƀơ tanăp măt may, hơi kôranh gâp jêng hađăch!”

Y-Đavit jêh ri Y-Simei

⁵ Tơlah hađăch Đavit tât ma ƀon Bahurim, geh du huê bunuyh bơh băl mpôl ngih Y-Sôl văch tât, amoh Y-Simei, kon bu klâu Y-Gêra, hăn văch tă bơh ntŭk nây. Păng rak rtăp nkre hăn.

⁶ Păng klŭp lŭ ma Y-Đavit jêh ri ma phung oh mon hađăch, nđâp lah geh lĕ rngôch phung tahan jêh ri phung janh ktang king n'gang hađăch pa ma jêh ri pa chiau.

⁷ Y-Simei rak rtăp Y-Đavit pô aơ: “Du hom, du hom! Bunuyh nkhŭt mham, bunuyh djơh mhĭk nây!

⁸ Brah Yêhôva hŏ ƀư ăn ma mham bơh ngih Y-Sôl, may hŏ sŏk sưng hađăch, nkhŭt tay klơ bôk may. Brah Yêhôva mra jao ƀon bri hađăch tâm ti Y-Apsalôm, kon bu klâu may. Aƀaơ aơ, may mra geh nau rai yot, yorlah may jêng du huê bunuyh nkhŭt mham.”

⁹ Rnôk nây, Y-Abisai, kon bu klâu H'Sêruya, lah ma hađăch: “Mâm so khĭt aơ nănh rak rtăp hađăch jêng kôranh gâp? Ăn gâp hăn koh lơi trô ko păng.”

¹⁰ Ƀiălah hađăch lah: “Hơi phung kon bu klâu H'Sêruya, moh nau gâp geh đah khân may? Tơlah Y-Simei rak rtăp yorlah Brah Yêhôva hŏ lah jêh ma păng pô aơ: ‘Rak rtăp hom ma Y-Đavit,’ pôri mbu nănh lah păng: ‘Mbah tă may lah nau nây?’”

¹¹ Jêh nây Y-Đavit lah ma Y-Abisai jêh ri phung oh mon păng: “Aơ, kon bu klâu gâp nơm, jêng bunuyh luh tă bơh gâp, ŭch ƀư roh lơi nau rêh gâp, rlau lơn ma bu klâu Benjamin aơ! Lơi pha lah păng, ăn păng rak rtăp hom, yorlah Brah Yêhôva ntĭnh jêh ma păng ƀư kơt nây.

¹² Klăp lah Brah Yêhôva mra uănh nau rêh ni gâp, jêh ri mra sŏk nau ueh lăng mplơ̆ sĭt ma gâp ntrok ma nau rak rtăp păng nar aơ.”

¹³ Y-Đavit jêh ri lĕ rngôch phung tahan păng hăn na nau, bi Y-Simei hăn tĭng rŏ pŭng yôk tâm tra đah Y-Đavit. Dôl hăn trong păng rak rtăp ma Y-Đavit jêh ri klŭp Y-Đavit ma lŭ, jêh ri sui ma ndruyh neh.

¹⁴ Nôk hađăch jêh ri lĕ rngôch phung hăn ndrel ma păng tât ta dak krong Yurdan lĕ rgănh jêh, jêh ri hađăch gŭ mpăn suan ta nây.

Y-Husai jêh ri Y-Ahitôpel gŭ ndrel ma Y-Apsalôm ta Yêrusalem

¹⁵ Rnôk nây, Y-Apsalôm jêh ri lĕ rngôch phung Israel hŏ lăp tâm ƀon Yêrusalem da dê jêh, jêh ri Y-Ahitôpel hăn tĭng păng.

¹⁶ Tơlah Y-Husai, bunuyh Arkit, mĭt jiăng Y-Đavit, tât ta Y-Apsalôm, Y-Husai nter lah: “Hađăch mro mrăng! Hađăch mro mrăng!”

¹⁷ Y-Apsalôm ôp Y-Husai: “Aơ jêng nau may mpơl nuih n'hâm răp jăp đah mĭt jiăng may ƀơh? Mâm ƀư may mâu hăn ôh ndrel ma mĭt jiăng may?”

¹⁸ Y-Husai plơ̆ lah ma Y-Apsalôm: “Mâu ôh, Mbu nơm Brah Yêhôva săch jêh ri lĕ rngôch phung Israel săch jêh, gâp mra jêng ndơ păng jêh ri gâp mra gŭ ndrel ma păng.

¹⁹ Rlau lơn ma nĕ, ma mbu nơm gâp mra pah kan? Mâu di hĕ gâp pah kan ma kon bu klâu păng? Nâm bu gâp hŏ pah kan jêh ma mbơ̆ may, tâm ban nây lĕ gâp mra pah kan ma may.”

²⁰ Y-Apsalôm lah ma Y-Ahitôpel: “Khân may nchră hom joi moh nau he mra ƀư?”

²¹ Y-Ahitôpel lah ma Y-Apsalôm: “Hađăch hăn văch hom lăp gŭ ndrel phung ur yông mbơ̆ may, phung păng mât mray ngih hađăch. Tơlah phung Israel gĭt may hŏ tâm rmot jêh ma mbơ̆ may nây; pôri lĕ rngôch phung gŭ n'hanh may lơ jêng ktang lơn.”

²² Pôri, bu ndâk du mlâm ngih bok ma Y-Apsalôm ta klơ chor ngih hađăch, jêh nây Y-Apsalôm hăn lăp gŭ ndrel phung ur yông mbơ̆ păng. Lĕ rngôch phung Israel gĭt nau aơ da dê.

²³ Tâm rnôk nây, bu saơ nau Y-Ahitôpel nchră jêng nâm bu nau ngơi tă luh bơh Brah Ndu nơm. Lĕ rngôch nau nchră Y-Ahitôpel geh nau khlay tâm ban ma Y-Đavit nđâp Y-Apsalôm.