II Samuel 15 - Nau Brah Ndu Ngơi 2023

Y-Apsalôm ƀư ndâp mpôn nau tâm rdâng

¹ Jŏ djê̆ ta nây, Y-Apsalôm rơm ndrăp ma păng nơm du bôk ndeh, seh uih ndeh, jêh ri prăm jât nuyh tahan nchuăt tanăp păng.

² Y-Apsalôm vay dâk ơm ôi, dâk êp kêng meng trong mpông ƀon. Tơlah tâm mâp đah bunuyh geh nau phong dôih hăn tât hađăch gay dăn phat nkra, pôri Y-Apsalôm kuăl bunuyh nây văch jêh ri ôp: “Mbu ƀon may?” Tơlah khân păng plơ̆ lah: “Oh mon may jêng du ndŭl mpôl tâm phung ndŭl mpôl Israel,”

³ pôri Y-Apsalôm lah đŏng: “Aơ, nau phong dôih may jêng ueh jêh ri nau di; ƀiălah mâu geh bunuyh sâm ntrok ma hađăch gay iăt nau may ôh.”

⁴ Jêh nây Y-Apsalôm ngơi lah đŏng: “Ơ! Tơlah bu njêng gâp dơi jêng kôranh phat dôih tâm n'gor! Rnôk nây, mbu nơm geh nau phong dôih jêh ri ŭch phat nkra, mra tât ma gâp, gâp mra phat dôih sŏng ăn ma păng.”

⁵ Rlau lơn ma nĕ, tơlah geh bunuyh hăn văch dăch ŭch chon mon mbah ma Y-Apsalôm, păng yơr ti păng kuăn păng jêh ri chŭm păng.

⁶ Y-Apsalôm ƀư tâm ban lĕ ma lĕ rngôch phung Israel văch joi ma hađăch ma nau phat dôih; pônây, Y-Apsalôm ndơm sŏk nuih n'hâm phung Israel.

⁷ Lôch puăn năm, Y-Apsalôm lah ma hađăch: “Dăn ăn gâp hăn tât ta ƀon Hêbron gay ƀư lôch nau ton gâp hŏ ton ma Brah Yêhôva.

⁸ Yorlah dôl gâp gŭ ta n'gor Gêsur tâm n'gor Aram, oh mon hađăch ƀư jêh nau ton pô aơ: ‘Tơlah Brah Yêhôva djôt leo gâp plơ̆ sĭt ma ƀon Yêrusalem, rnôk nây gâp mra pah kan Brah Yêhôva.’”

⁹ Hađăch plơ̆ lah: “Hăn hom đăp mpăn.” Pônây, păng dâk hăn ma ƀon Hêbron.

¹⁰ Jêh nau nây, Y-Apsalôm prơh phung mbơh ndâp hăn lam ma phung mpôl băl Israel, lah pô aơ: “Tơlah khân may tăng bâr nŭng, rnôk nây lah hom: ‘Y-Apsalôm jêng hađăch ta ƀon Hêbron!’”

¹¹ Geh bar rhiăng nuyh tă bơh Yêrusalem hăn ndrel ma Y-Apsalôm. Khân păng jêng phung bu lĕ jă jêh, khân păng hăn ma nau sŏng, mâu gĭt ma nau nây ôh.

¹² Dôl Y-Apsalôm nhhơr mpa ƀư brah, păng prơh bu hăn jă Y-Ahitôpel, bunuyh Gilô, jêng nơm nchră ma Y-Đavit, văch bơh Gilô. Nau tâm rdâng nây lơ hâu ktang lơn, jêh ri rnoh bunuyh phung ƀon lan tĭng ndô̆ Y-Apsalôm jêng lơ hâu âk.

Y-Đavit du bơh Yêrusalem

¹³ Geh bunuyh hăn tât mbơh nau ma Y-Đavit: “Nuih n'hâm phung ƀon lan Israel rklêng mpeh ma Y-Apsalôm.”

¹⁴ Yor ri, Y-Đavit lah ma lĕ rngôch phung oh mon păng gŭ n'hanh păng ta ƀon Yêrusalem: “Dâk hom, he nchuăt du ro. Tơlah mâu du ôh, he mâu mra klaih ôh bơh Y-Apsalôm. Hăn hom gơnh luh bơh aơ, klach lah păng mra ban, ƀư mhĭk ma he jêh ri dŏng đao ƀư rai phung ƀon lan tâm ƀon.”

¹⁵ Phung oh mon hađăch lah: “Ơ, moh nau hađăch jêng kôranh hên ntrâng ƀư jêh, phung oh mon hađăch mra ƀư tĭng kơt.”

¹⁶ Pônây, hađăch luh hăn jêh ri lĕ rngôch bunuyh ta ngih hađăch hăn ndrel. Ƀiălah hađăch ăn gŭ jât nuyh ur yông gay mât chăm ngih hađăch.

¹⁷ Hađăch hăn lor, lĕ rngôch bunuyh tĭng pakơi jêh ri khân păng gŭ nsrŭng ta ngih nglĕ dŭt.

¹⁸ Lĕ rngôch oh mon hađăch hăn lor panăp hađăch da dê. Lĕ rngôch phung Chêrêthit, phung Pêlêthit jêh ri prao rhiăng nuyh phung Gitit, hŏ tĭng hađăch bơh ƀon Gat, hăn lor da dê tanăp măt hađăch.

¹⁹ Hađăch lah ma Y-Itai, bunuyh Gitit: “Mâm dĭng may ŭch hăn ndrel hên? Plơ̆ sĭt hom jêh ri gŭ ndrel hađăch, yorlah may jêng du huê bu năch bu hŏ mprơh jêh bơh ƀon tơm may.

²⁰ May mhe tât nar nđaơ, jêh ri nar aơ mâm gâp dơi rom may du nsong mblêng ndrel hên, tâm nôk gâp mâu gĭt ôh ntŭk gâp mra hăn? Plơ̆ sĭt hom jêh ri leo phung oh nâu phung Gitit hăn tĭng may. Dăn ma Kôranh Brah mpơl nau ueh jêh ri nau răp jăp ngăn Păng gŭ tâm may!”

²¹ Ƀiălah Y-Itai lah ma hađăch: “Tĭng nâm Brah Yêhôva gŭ rêh mro mrăng jêh ri hađăch jêng kôranh gâp gŭ rêh, hađăch jêng kôranh gâp mra gŭ ta ntŭk, nđâp lah tâm nau rêh mâu lah tâm nau khĭt, oh mon hađăch mra gŭ ta nây tâm ban lĕ.”

²² Hađăch Đavit lah ma Y-Itai: “Hăn hao hom jêh ri hăn lor panăp.” Pônây, Y-Itai bunuyh Gitit hăn lor panăp, nđâp ma lĕ rngôch phung păng jêh ri phung kon se ndăm tĭng păng.

²³ Lĕ n'gor bri nhĭm nhhiăng lŭng nter dôl lĕ rngôch phung ƀon lan aơ lĕ hăn jêh. Hađăch rgăn dak n'hor Kidrôn, ndrel ma lĕ rngôch phung ƀon lan tât ta trong rlet bri rdah da dê.

²⁴ Ta nây geh đŏng Y-Sadôk jêh ri lĕ rngôch phung Lêvi tung Hip Nau Tâm Rnglăp Brah Ndu. Khân păng njuyh Hip Nau Tâm Rnglăp Brah Ndu ta neh, jêh nây Y-Abiathar hăn lor panăp kŏ tât nôk lĕ rngôch phung ƀon lan hŏ du luh jêh tă bơh ƀon.

²⁵ Hađăch lah ma Y-Sadôk: “Djôt leo hom Hip Nau Tâm Rnglăp Brah Ndu plơ̆ sĭt ma ƀon. Tơlah gâp mra geh nau yô̆ tanăp măt Brah Yêhôva, Păng mra njŭn ăn gâp plơ̆ sĭt đŏng, ăn gâp saơ Hip Nau Tâm Rnglăp jêh ri ntŭk Brah Yêhôva gŭ.

²⁶ Ƀiălah tơlah Păng lah: ‘Gâp mâu ŭch rŏng ôh may,’ pôri ăn Păng ƀư ma gâp tĭng nâm nau Păng mĭn ueh!”

²⁷ Hađăch lah tâm ban lĕ lah ma kôranh ƀư brah Y-Sadôk: “Pônây, plơ̆ sĭt hom ma ƀon ma nau đăp mpăn, ndrel ma bar hê kon bu klâu khân may: Y-Ahimas, kon may, jêh ri Y-Jônathan, kon Y-Abiathar.

²⁸ Bi gâp, gâp mra kâp ta lĕ ntŭk rgăn dak krong tâm bri rdah, tât geh bunuyh tă bơh khân may hăn văch gay mbơh nau ma gâp.”

²⁹ Pôri, Y-Sadôk jêh ri Y-Abiathar tung Hip Nau Tâm Rnglăp Brah Ndu plơ̆ sĭt ma ƀon Yêrusalem, jêh ri khân păng ăt gŭ ta nây.

³⁰ Y-Đavit hăn hao klơ yôk Ôlive, nkre nhĭm nkre chuat, nkŭm bôk păng jêh ri chuat jâng dơm. Lĕ rngôch phung ƀon lan hăn tĭng hađăch nkŭm bôk khân păng, jêh ri nkre nhĭm nkre hăn.

³¹ Bu mbơh ma Y-Đavit: “Y-Ahitôpel đŏng gŭ tâm phung tâm nchră ndrel ma Y-Apsalôm.” Y-Đavit mbơh sơm: “Ơ Brah Yêhôva! Dăn ƀư ma tâm nchră kan Y-Ahitôpel jêng nau rluk.”

Y-Husai jêng nơm n'hut ma Y-Đavit

³² Tơlah Y-Đavit lĕ tât ta klơ n'gơn yôk, ntŭk bu yơk mbah ma Brah Ndu, Y-Husai, bunuyh Arkit, văch tâm mâp đah păng, kho ao lĕ hêk jêh jêh ri bôk păng neh muy.

³³ Y-Đavit lah ma păng: “Tơlah may hăn ndrel ma gâp, may mra jêng du nau jâk jêr ma gâp.

³⁴ Ƀiălah tơlah may plơ̆ sĭt ma ƀon jêh ri lah ma Y-Apsalôm pô aơ: ‘Hơi hađăch, gâp jêng oh mon may. Kăl e, gâp jêng oh mon ma hađăch mbơ̆ may, aƀaơ aơ gâp mra jêng oh mon ma may’. Pônây, may gŭ mpeh ma gâp ƀư roh lơi nau nchră Y-Ahitôpel.

³⁵ Mâu di hĕ lĕ kôranh ƀư brah Y-Sadôk jêh ri Y-Abiathar dôl gŭ ndrel may ta nây? Lĕ rngôch nau may tăng tă bơh ngih hađăch, mbơh hom ma lĕ kôranh ƀư brah Y-Sadôk jêh ri Y-Abiathar.

³⁶ Bar hê kon bu klâu khân păng jêng Y-Ahimas, kon bu klâu Y-Sadôk, jêh ri Y-Jônathan, kon bu klâu Y-Abiathar, hôm gŭ ndrel khân păng ta nây. May mra njuăl khân păng mbơh ma gâp lĕ nau may mra tăng.”

³⁷ Pônây Y-Husai, nơm nchră Y-Đavit, plơ̆ sĭt tâm ƀon tơlah dôl Y-Apsalôm lăp tâm Yêrusalem.