II Samuel 14 - Nau Brah Ndu Ngơi 2023

Y-Jôap dăp ma Y-Apsalôm plơ̆ sĭt

¹ Rnôk nây, Y-Jôap, kon bu klâu H'Sêruya, saơ nuih n'hâm hađăch mĭn ma Y-Apsalôm.

² Yor ri, Y-Jôap prơh bu hăn tât ta ƀon Têkôa, joi du huê bu ur me blau mĭn, jêh ri lah ma păng: “Ay jan lah ƀư bunuyh dôl geh nau klâng ndrê, nsoh kho ao klâng ndrê, lơi mhĭng ôh dak ƀâu kah. Ƀư hom nâm bu du huê bu ur me klâng ndrê jŏ nar.

³ Jêh nây hăn văch hom tâm mâp đah hađăch, mbơh ma păng kơt aơ...” Jêh ri Y-Jôap nti lĕ nau păng mra ngơi.

⁴ Tơlah bu ur me ƀon Têkôa tât tâm mâp đah hađăch, păng păn muh măt ta neh jêh ri mbah, jêh nây lah: “Hơi hađăch, kơl an gâp!”

⁵ Hađăch ôp: “Moh nau ay geh?” Păng lah: “Hơi hađăch! Gâp ndrô, sai gâp lĕ khĭt jêh.

⁶ Oh mon bu ur hađăch geh bar hê kon bu klâu. Bar hê khân păng tâm djrel tâm mir, jêh ri yorlah mâu geh bunuyh sâm buay khân păng ôh, pôri du huê aơ lơh khĭt du huê ri.

⁷ Jêh ri aƀaơ ri, lĕ noi deh dâk hao tâm rdâng đah oh mon bu ur hađăch, jêh ri lah: ‘Jao hom nơm nkhĭt jêh oh păng. Hên mra nkhĭt păng gay ntrok nau rêh oh păng yorlah păng nkhĭt jêh; jêh ri nđâp lah păng jêng nơm ndơn drăp, hên mra nkhĭt đŏng păng.’ Pônây, khân păng ŭch nkhĭt nơm hôm e ma gâp, mâu hôm ôh ăn ma sai gâp kon sau thoi noi deh păng ta klơ neh ntu.”

⁸ Hađăch lah ma bu ur: “Hăn sĭt hom ma ngih ay, gâp mra ntăm di ma nau ay.”

⁹ Bu ur ƀon Têkôa lah ma hađăch: “Hơi hađăch jêng kôranh gâp, ăn nau tih nây tŭp ta gâp jêh ri ma ngih mbơ̆ gâp. Bi hađăch jêh ri sưng gŭ mah hađăch dơi rklaih!”

¹⁰ Hađăch lah: “Tơlah geh bunuyh ngơi tâm rdâng ma ay, njŭn leo hom păng ma gâp. Păng mâu mra hôm nănh pah ma ay ôh.”

¹¹ Bu ur lah: “Dăn ma hađăch kah gĭt ma Yêhôva Brah Ndu hađăch gay king lơi nơm har plơng ma mham lơi hôm ƀư tay nau tâm nkhĭt ôh, jêh ri khân păng mâu mra nkhĭt kon bu klâu gâp ôh.” Hađăch lah: “Nanê̆ tĭng nâm Brah Yêhôva gŭ rêh mro mrăng, mâu geh du rse sŏk kon bu klâu ay mra rŭng ôh ta neh!”

¹² Bu ur lah đŏng: “Dăn ăn ma oh mon bu ur hađăch ngơi ntop du nau ma hađăch, jêng kôranh gâp.” Hađăch lah: “Ngơi hom.”

¹³ Bu ur lah: “Pôri mâm hađăch mâu ƀư ma phung ƀon lan Brah Ndu du nau nâm bu pônây? Tơlah phat dôih nau aơ, hađăch njêng nau tih jêh ma hađăch nơm, yorlah hađăch mâu ăn ma kon hađăch bu mprơh jêh plơ̆ sĭt.

¹⁴ Lĕ rngôch he mra khĭt yơh, tâm ban ma dak lĕ nkhŭt jêh klơ neh, mâu hôm blau rƀŭn ndrel ôh. Ƀiălah Brah Ndu mâu mra sŏk lơi ôh nau rêh; ƀiălah, Păng gĭt tĭng joi trong gay nơm bu mprơh jêh mâu ăn du ngai đah Păng.

¹⁵ Aƀaơ aơ, gâp văch tât lah nau aơ ma hađăch jêng kôranh gâp, yorlah phung ƀon lan nhhu gay ăn gâp klach. Oh mon bu ur hađăch mĭn: ‘Ăn gâp ngơi ma hađăch, klăp lah hađăch mra ƀư tĭng nâm nau oh mon bu ur păng dăn.

¹⁶ Di ngăn, hađăch mra iăt nau jêh ri tâm rklaih oh mon bu ur păng bơh ti phung ŭch ƀư rai gâp nđâp ma kon bu klâu gâp, mâu ăn ma păng dơn drăp ndơn Brah Ndu.’

¹⁷ Pônây, oh mon bu ur hađăch hŏ mĭn: ‘Nau ngơi hađăch, jêng kôranh gâp, mra ăn gâp gŭ đăp mpăn; yorlah hađăch, jêng kôranh gâp, mâu lĕ lĭn du huê tông mpăr Brah Ndu, gĭt sek uănh nau ueh jêh ri nau mhĭk.’ Dăn ma Yêhôva Brah Ndu hađăch gŭ ndrel hađăch!”

¹⁸ Hađăch plơ̆ sĭt lah ma bu ur nây: “Lơi pôn mo ma gâp ôh moh nau gâp mra ôp ay.” Bu ur ơh: “Ăn hađăch jêng kôranh gâp iăt ôp.”

¹⁹ Hađăch ôp: “Di lĕ ti Y-Jôap gŭ ndrel ma ay tâm lĕ nau aơ?” Bu ur nây plơ̆ lah: “Hơi hađăch jêng kôranh gâp, nanê̆ tĭng nâm may hôm rêh, bu mâu dơi teng ôh pa ma mâu lah pa chiau tâm lĕ nau hađăch jêng kôranh gâp hŏ lah jêh. Di ngăn, nây jêng Y-Jôap, oh mon hađăch, hŏ ntăm jêh ma gâp jêh ri păng yơh ăn oh mon bu ur hađăch ngơi lĕ nau aơ.

²⁰ Y-Jôap, oh mon hađăch, hŏ ƀư nâm bu pônây, gay ăn nau kan aơ dơi jêng nau mhe. Ƀiălah kôranh gâp geh nau blau mĭn nâm bu tông mpăr Brah Ndu, gĭt lĕ rngôch nau tât ta neh ntu.”

²¹ Jêh nau nây, hađăch lah ma Y-Jôap: “Gâp mra ăn lĕ nau may dăn. Hăn hom leo bu klâu ndăm Y-Apsalôm plơ̆ sĭt ta aơ.”

²² Y-Jôap păn muh măt ta neh jêh ri mbah, jêh ri ăn nau ueh uĭn ma hađăch. Y-Jôap lah: “Hơi hađăch, kôranh gâp, nar aơ oh mon may gĭt jêh gâp geh nau yô̆ tanăp măt hađăch, yorlah hađăch hŏ ƀư jêh nau oh mon dăn.”

²³ Jêh nây Y-Jôap dâk hăn trong, tât ta n'gor Gêsur jêh ri leo Y-Apsalôm plơ̆ sĭt ma ƀon Yêrusalem.

²⁴ Ƀiălah hađăch lah: “Ăn păng gŭ êng tâm ngih păng nơm, lơi ăn păng mpơl măt păng tanăp gâp.” Pônây Y-Apsalôm gŭ êng tâm ngih păng nơm jêh ri mâu dơi mpơl măt păng tanăp hađăch.

Y-Đavit yô̆ an ma Y-Apsalôm

²⁵ Nôk nây taơ, tâm lĕ rngôch phung Israel mâu geh ôh du huê bunuyh tâm rnê yor nau ueh săk păng nâm bu Y-Apsalôm: ntơm bơh mpang jâng tât nklang bôk, mâu geh khap men ôh tâm păng.

²⁶ Lôch ăp năm, păng kreh sŏk du tơ̆ yorlah jâk ƀư ma păng y. Ăp tơ̆ kreh sŏk, sŏk păng njing jâk lơn bar kilô, tĭng njing tâm ngih hađăch.

²⁷ Y-Apsalôm geh pe nuyh kon bu klâu jêh ri du huê bu ur. Kon bu ur amoh H'Tamar; păng jêng du huê druh mpăr ngăn.

²⁸ Y-Apsalôm gŭ ta ƀon Yêrusalem bar năm bêng, mâu mpơl măt ma hađăch.

²⁹ Jêh ta nây, Y-Apsalôm kuăl Y-Jôap văch gay prơh păng hăn mbơh ma hađăch, ƀiălah Y-Jôap mâu ŭch văch ôh ma păng. Y-Apsalôm prơh bu kuăl đŏng tal bar, ƀiălah Y-Jôap mâu ŭch văch ôh.

³⁰ Yor ri, Y-Apsalôm lah ma phung oh mon păng: “Uănh hom, mir Y-Jôap êp kêng mir gâp, păng tăm ba ôrgơ ta nây. Hăn hom su lơi mir nây ma ŭnh.” Phung oh mon Y-Apsalôm hăn su ro mir nây ma ŭnh.

³¹ Rnôk nây, Y-Jôap dâk jêh ri hăn tât ma ngih Y-Apsalôm jêh ri lah: “Mâm ƀư oh mon may hŏ su mir ba gâp ma ŭnh?”

³² Y-Apsalôm plơ̆ lah ma Y-Jôap: “Aơ, gâp prơh bunuyh kuăl may văch ta aơ, gay ma gâp dơi prơh may hăn mbơh ma hađăch: ‘Mâm ƀư dĭng gâp plơ̆ sĭt tă bơh n'gor Gêsur? Ueh lơn gâp ăt hôm gŭ ta nây.’ Pôri aƀaơ, gâp ŭch hăn tanăp hađăch. Tơlah gâp geh nau tih, ăn păng nkhĭt gâp.”

³³ Y-Jôap hăn văch tâm mâp đah hađăch jêh ri mbơh lĕ nau nây ma hađăch. Hađăch kuăl Y-Apsalôm văch. Y-Apsalôm hăn văch jêh ri chon mon tanăp măt hađăch. Hađăch chŭm Y-Apsalôm.