II Samuel 13 - Nau Brah Ndu Ngơi 2023

Y-Amnôn jêh ri H'Tamar

¹ Jêh nau nây geh tât nau aơ: Y-Apsalôm, kon bu klâu Y-Đavit, geh du huê oh bu ur ueh ngăn, amoh H'Tamar. Y-Amnôn, kon bu klâu Y-Đavit, rŏng ma păng.

² Y-Amnôn klâng kŏ tât păng nơm jêng ji yor ma H'Tamar, oh bu ur păng; yorlah păng jêng du huê bu ur druh, pôri Y-Amnôn mâu dơi ôh ŭch ƀư du ntil nau ma păng.

³ Ƀiălah Y-Amnôn geh du huê băl amoh Y-Jêhônadap, kon Y-Simêa, jêng nâu Y-Đavit. Y-Jêhônadap jêng du huê bunuyh blau plĕch rlăm ngăn.

⁴ Păng lah ma Y-Amnôn: “Hơi kon bu klâu hađăch, mâm ƀư ăp nar may rgay rdjoh tâm ban pônây? Mâu mbơh ma gâp gĭt?” Y-Amnôn lah ma păng: “Gâp rŏng ma H'Tamar, oh bu ur Y-Apsalôm jêng oh gâp.”

⁵ Y-Jêhônadap lah ma păng: “Kon bu klâu hađăch lâng bê̆ch hom ta klơ sưng bê̆ch, jan săk ji. Jêh nây tơlah mbơ̆ may hăn chop khâl, lah hom ma păng: ‘Dăn mbơ̆ ăn ma H'Tamar, oh bu ur gâp, văch nkra ndơ sông sa nhêt ma gâp. Oh gâp mra ndrăp ndơ sông sa ra năp măt gâp, gay gâp dơi saơ, jêh ri sŏk sa tă bơh ti păng.’”

⁶ Pônây yơh, Y-Amnôn bê̆ch jan săk ƀư ji. Tơlah hađăch hăn chop khâl, Y-Amnôn lah ma hađăch: “Dăn ma may ăn H'Tamar, oh bu ur gâp, văch jêh ri nkra bar pe glo ƀănh tanăp măt gâp, jêh ri gâp mra dơi sa ƀănh bơh ti oh gâp.”

⁷ Y-Đavit prơh bu hăn tât ma H'Tamar jêh ri lah: “Hăn hom ma ngih Y-Amnôn, jêh ri nkra ndơ sông sa ma păng.”

⁸ Pôri, H'Tamar hăn tât ma ngih nâu păng jêng Y-Amnôn, nôk nâu păng dôl gŭ bê̆ch tâm ngih. Păng sŏk rnih môi, pach ƀư ƀănh jêh ri nđông ƀănh nây tanăp măt păng.

⁹ Păng sŏk glah thaih jêh ri nkhŭt ƀănh tanăp măt păng. Ƀiălah Y-Amnôn dun mâu sa, jêh ri lah: “Lah hom ăn lĕ rngôch bunuyh du luh bơh aơ.” Lĕ rngôch bunuyh luh bơh ntŭk nĕ.

¹⁰ Rnôk nây, Y-Amnôn lah ma H'Tamar: “Djôt leo hom ndơ sông sa ay hŏ ndrăp jêh ma gâp lăp tâm jrô, gay ăn gâp sa păng tă bơh ti ay.” H'Tamar sŏk ƀănh păng hŏ ƀư, leo tâm jrô ma Y-Amnôn, nâu păng.

¹¹ Ƀiălah dôl H'Tamar leo ƀănh hăn văch dăch ăn păng sa, păng rƀiah kuăn păng jêh ri lah: “Hơi oh, văch hom bê̆ch ndrel đah gâp.”

¹² Păng lah. “Mâu ôh, nâu ah! Lơi nchâp gâp ôh, yorlah bu mâu ƀư ôh nau kơt nĕ tâm n'gor Israel. Lơi ƀư lă lêng nau mhĭk aơ!

¹³ Bi gâp, mbah ntŭk gâp mra djôt leo nau bêk prêng? Bi may, may mra jêng nâm bunuyh mhĭk tâm phung Israel. Pôri aƀaơ, gâp vơh vơl ma may, ngơi hom ma hađăch, yorlah păng mâu mra dun ăn gâp ma may ôh.”

¹⁴ Ƀiălah Y-Amnôn mâu ŭch iăt păng ôh, jêh ri yorlah păng jêng dăng lơn, păng hŏ tom bê̆ch ndrel đah păng.

¹⁵ Jêh nau nây, Y-Amnôn tâm rmot hâu ngăn ma H'Tamar kŏ tât nau păng tâm rmot ma păng jêng toyh lơn ma đah nau rŏng ma păng ntơm saơm. Y-Amnôn lah ma păng: “Dâk hom, hăn luh!”

¹⁶ Păng lah: “Mâu! May mprơh gâp hăn jêng ƀư du nau mhĭk toyh lơn ma nau tih may mhe ƀư ma gâp!” Ƀiălah Y-Amnôn mâu ŭch iăt ôh ma păng.

¹⁷ Păng kuăl du huê oh mon pah kan ma păng jêh ri lah: “Mprơh hom bu ur aơ tă bơh tanăp măt gâp, jêh nây ntĭl rnăng mpông ma păng!”

¹⁸ Oh mon Y-Amnôn mprơh păng du luh jêh ri ntĭl rnăng mpông. Nôk nây, păng dôl nsoh du ao jâr jong ti, yorlah phung kon bu ur hađăch vay nsoh ao kơt nĕ da dê dôl hôm e druh tang tat.

¹⁹ H'Tamar sui ŭnh buh ta klơ bôk, nkhêk lơi ao jâr, jêh ri sŏk ti ut klơ bôk, hăn nhĭm rjai rŏ trong.

²⁰ Y-Apsalôm, nâu păng, ôp: “Di lĕ Y-Amnôn, nâu ay, hŏ bê̆ch ndrel đah ay? Aƀaơ hơi oh, gŭ rklăk hom, yorlah păng jêng nâu ay. Lơi ir jâk nuih n'hâm ôh ma nau nây!” Pônây, H'Tamar gŭ tâm ngih Y-Apsalôm, nâu păng, nâm bu du huê bu ur lĕ sai păng lơi jêh.

²¹ Hađăch Đavit tăng lĕ nau nây, păng ji nuih ngăn.

²² Bi Y-Apsalôm mâu ngơi du nau ôh ma Y-Amnôn, nđâp lah nau ueh mâu lah nau mhĭk, yorlah Y-Apsalôm tâm rmot đah Y-Amnôn yorlah nau bê̆ch ndrel đah H'Tamar, oh bu ur păng.

Y-Amnôn khĭt jêh ri Y-Apsalôm nchuăt du

²³ Bar năm jêh nây, dôl Y-Apsalôm nkhôm bunuyh kreh rsau biăp păng ta ƀon Baal-Hasôr dăch n'gor Êphraim, păng jă lĕ rngôch phung kon bu klâu hađăch.

²⁴ Y-Apsalôm hăn ma hađăch jêh ri lah: “Oh mon hađăch geh nkhôm phung kreh rsau biăp. Dăn ma hađăch jêh ri phung oh mon păng hăn ndrel ma oh mon may.”

²⁵ Ƀiălah hađăch plơ̆ sĭt lah ma Y-Apsalôm: “Mâu dơi ôh, hơi kon! Mâu dơi hăn lĕ rngôch, yorlah mra ƀư jâk ma may.” Nđâp tơlah Y-Apsalôm sŏl dăn hađăch, ƀiălah Y-Đavit mâu ŭch hăn, knŏng ăn nau ueh uĭn ma păng.

²⁶ Y-Apsalôm lah tay: “Tơlah may mâu dơi ôh, dăn ăn ma Y-Amnôn, nâu gâp, hăn ndrel ma hên.” Hađăch ôp: “Mâm ƀư păng hăn văch ma may?”

²⁷ Ƀiălah Y-Apsalôm sŏl dăn kŏ tât hađăch ăn Y-Amnôn jêh ri lĕ rngôch kon bu klâu hađăch hăn văch ma păng.

²⁸ Y-Apsalôm ntĭnh ma phung oh mon păng: “Kâp uănh tơlah nuih n'hâm Y-Amnôn maak yor ndrănh, jêh ri tơlah gâp lah ma khân may: ‘dong hom Y-Amnôn,’ pônây nkhĭt hom păng ro yơh. Lơi klach ôh! Mâu di hĕ gâp nơm yơh đă ma khân may ƀư nau nây? Ăn khân may nănh janh jêh ri mpơl nau janh ktang!”

²⁹ Pôri, lĕ phung oh mon Y-Apsalôm ƀư ma Y-Amnôn di tĭng nâm nau Y-Apsalôm hŏ ntĭnh jêh. Rnôk nây, lĕ rngôch phung kon bu klâu hađăch dâk da dê, ăp nơm ncho seh bri păng nchuăt du.

³⁰ Tơlah phung kon hađăch dôl nchuăt du rŏ trong, geh bu mbơh ma Y-Đavit pô aơ: “Y-Apsalôm nkhĭt jêh lĕ rngôch phung kon bu klâu hađăch, mâu om du huê nuyh hôm klen.”

³¹ Hađăch dâk nkhêk ao păng jêh ri kuen bê̆ch ta neh. Lĕ rngôch phung oh mon hađăch gŭ êp tâm ban đŏng nkhêk ao khân păng nơm.

³² Ƀiălah Y-Jêhônadap, kon bu klâu Y-Simêa, nâu Y-Đavit, lah: “Dăn kôranh gâp lơi mĭn ôh khân păng lĕ nkhĭt jêh lĕ rngôch phung kon klâu hađăch. Knŏng êng Y-Amnôn dơm khĭt, yorlah Y-Apsalôm hŏ ŭch ƀư nau aơ jêh ntơm bơh nar Y-Amnôn tom bê̆ch ndrel đah H'Tamar, oh bu ur păng.

³³ Pônây, dăn hađăch jêng kôranh gâp lơi ir jâk nuih n'hâm ma nau aơ ôh, dôl mĭn ma lĕ rngôch kon bu klâu hađăch khĭt jêh; knŏng êng Y-Amnôn dơm khĭt.”

³⁴ Nôk nây, Y-Apsalôm nchuăt du. Bunuyh tahan ndăm dôl gŭ gak, n'gơr măt, uănh saơ geh âk bunuyh văch tă bơh trong pakơi păng nơm, êp pŭng yôk.

³⁵ Y-Jêhônadap lah ma hađăch: “Aơ! Phung kon bu klâu hađăch tât jêh, tĭng nâm oh mon may lah jêh, tât di nâm oh mon hađăch hŏ lah jêh.”

³⁶ Tơlah păng ngơi lôch jêh, aơ phung kon bu klâu hađăch tât; khăn păng nhhiăng nhĭm. Hađăch jêh ri lĕ rngôch phung oh mon păng nhĭm rngot ngăn.

³⁷ Y-Apsalôm nchuăt du jêh ri hăn văch ma Y-Talmai, kon bu klâu Y-Amihut, jêng hađăch n'gor bri Gêsur. Bi Y-Đavit nhhiăng nhĭm ma kon bu klâu păng ăp nar.

³⁸ Pônây, Y-Apsalôm nchuăt du tât ta n'gor Gêsur, jêh ri gŭ ta nây pe năm.

³⁹ Nôk nây, hađăch Đavit kah gĭt ma Y-Apsalôm; yorlah hađăch geh nau bonh leng jêh ma nau Y-Amnôn hŏ khĭt.