II Samuel 12 - Nau Brah Ndu Ngơi 2023

Y-Nathan nduyh Y-Đavit

¹ Brah Yêhôva prơh Y-Nathan hăn tât ma Y-Đavit. Păng tât jêh ri lah ma hađăch: “Tâm du ƀon ri, geh bar bunuyh, du huê ndrŏng jêh ri geh du huê o ach.

² Bunuyh ndrŏng geh biăp, ndrôk âk ngăn,

³ ƀiălah bunuyh o ach, geh knŏng du mlâm kon biăp me jê̆ păng rvăt jêh. Păng mât rong biăp nây văch ma toyh ndrel ma păng jêh ri ndrel ma phung kon păng. Păng sa ndơ sông sa, nhêt dak nhêt ndrel păng jêh ri bê̆ch klơ ntang ntơh păng. Păng jêng nâm bu du huê kon bu ur păng.

⁴ Du nar, geh du huê bu năch hăn tât chop khâl ma bunuyh ndrŏng. Bunuyh ndrŏng nhhuach drăp ndơ, mâu ŭch sŏk ôh biăp ndrôk bơh păng nơm gay ndrăp du tơ̆ sông sa ăn ma bu năch hŏ tât, ƀiălah sŏk biăp kon bơh bunuyh o ach jêh ri ndrăp ăn ma bu năch hŏ tât khâl păng.”

⁵ Y-Đavit hao ji nuih ngăn ma bunuyh ndrŏng nây, jêh ri lah ma Y-Nathan: “Nanê̆ tĭng nâm Brah Yêhôva gŭ rêh mro mrăng, bunuyh hŏ ƀư nau nây khư nau khĭt yơh!

⁶ Ăn păng ntrok puăn tơ̆ rnoh biăp kon, yorlah hŏ ƀư jêh nau aơ jêh ri yorlah mâu geh nau yô̆ nđach ôh.”

⁷ Rnôk nây, Y-Nathan ngơi lah ma Y-Đavit: “Hađăch yơh jêng bunuyh nây! Yêhôva Brah Ndu phung Israel geh lah: ‘Gâp hŏ tŏ dak ƀâu kah njêng may jêng hađăch Israel, Gâp hŏ rklaih jêh may tă bơh ti Y-Sôl.

⁸ Gâp hŏ ăn lĕ ma may ngih kôranh may, jêh ri jao phung ur kôranh may ma ntang ntơh may. Gâp ăn jêh ma may lĕ ngih Israel jêh ri ngih Yuđa; jêh ri tơlah nau nây hôm djê̆ ir, nanê̆ Gâp mra ăn ntop ma may geh âk lơn đŏng.

⁹ Mâm ƀư may mưch rmot nau Brah Yêhôva ngơi, ŭch ƀư nau mhĭk tanăp măt Păng? May hŏ sŏk đao phung Ammôn nkhĭt Y-Uri, bunuyh Hitit, sŏk jêh ur păng njêng ur may.

¹⁰ Aƀaơ, yorlah may mưch rmot Gâp, jêh ri ntŭng ur Y-Uri, bunuyh Hitit, njêng ur may, pôri đao mâu mra rlu ôh ƀư roh-rai tât ma ngih may.’

¹¹ Pô aơ Brah Yêhôva lah: ‘Aơ, tă bơh ngih may nơm, Gâp mra ƀư ăn nau mhĭk tât ma may. Gâp mra nhŭp phung ur may tanăp măt may jêh ri jao khân păng ma nơm chiau meng may, păng mra bê̆ch ndrel đah phung ur may ta nôk nar.

¹² May ƀư jêh nau nây ma nau ndâp, ƀiălah Gâp mra ƀư kan aơ tanăp măt lĕ rngôch phung Israel ta nôk nar.’”

Y-Đavit rmal nau tih

¹³ Y-Đavit lah ma Y-Nathan: “Gâp hŏ ƀư tih đah Brah Yêhôva.” Y-Nathan lah ma Y-Đavit: “Brah Yêhôva jut lơi jêh nau tih hađăch, hađăch mâu mra khĭt ôh.

¹⁴ Ƀiălah, yorlah ma nau aơ, hađăch njêng ma phung rlăng Brah Yêhôva ngơi sưr ma Păng, rĭ dĭng kon bu klâu deh jêh ma hađăch mra khĭt.”

¹⁵ Jêh nây, Y-Nathan plơ̆ sĭt ma ngih păng nơm. Brah Yêhôva dong kon ur Y-Uri deh jêh ăn ma Y-Đavit, jêh ri păng geh nau ji.

Kon bơh H'Batsêba khĭt

¹⁶ Yor ma kon Y-Đavit mbơh sơm ma Brah Ndu, hađăch ver ât sông sa jêh ri lăp tâm jrô kuen ta neh du năng kŏ ang.

¹⁷ Phung bu ranh tâm ngih hađăch dâk êp meng gay rdâk păng tă tâm neh, ƀiălah păng mâu ŭch, jêh ri mâu sông sa n'hanh khân păng.

¹⁸ Tât nar tal pơh, kon se jê̆ nây khĭt. Phung oh mon Y-Đavit kam ngăn lah ma păng gĭt kon se jê̆ lĕ khĭt; yorlah khân păng lah: “Dôl kon se jê̆ hôm rêh, hên hŏ lah ma hađăch, jêh ri păng mâu iăt he ôh. Pônây mâm ƀư he nănh mbơh ma păng ma kon se jê̆ nây khĭt jêh? Gĭt lah păng klăp lah ƀư mhĭk ma păng nơm!”

¹⁹ Ƀiălah nôk saơ phung oh mon păng lah ndrăng khân păng, Y-Đavit gĭt ngăn ma kon se jê̆ hŏ khĭt jêh, pôri Y-Đavit ôp ma khân păng: “Kon se jê̆ khĭt jêh hĕ?” Khân păng lah: “Ơ, păng khĭt jêh.”

²⁰ Rnôk nây, Y-Đavit dâk, ŭm rao, mhĭng dak ƀâu kah, jêh ri tơh rgâl kho ao păng, jêh nây păng hăn lăp ma ngih brah Brah Yêhôva jêh ri yơk mbah. Jêh nau nây, hađăch plơ̆ sĭt ma ngih hađăch, jêh ri đah bu ndrăp ndơ sông sa ma păng.

²¹ Phung oh mon păng ôp ma păng: “Moh nau bu ntĭt hađăch ƀư nau nây? Nôk kon se jê̆ hôm rêh, hađăch ver ât sông sa jêh ri nhĭm yorlah păng; ƀiălah dôl păng lĕ khĭt, hađăch dâk jêh ri sông sa nhêt!”

²² Hađăch plơ̆ lah: “Nôk kon se jê̆ hôm rêh, gâp ver ât sông sa jêh ri nhĭm yorlah gŭ mĭn pô aơ: ‘Klăp lah Brah Yêhôva mra yô̆ nđach gâp, jêh ri ăn ma păng hôm e rêh!’

²³ Ƀiălah aƀaơ ri păng khĭt jêh; moh khlay gâp mra ver ât sông sa? Dơi lĕ gâp ndâk păng rêh đŏng? Gâp mra hăn ma păng, ƀiălah păng mâu mra plơ̆ tay ma gâp ôh.”

Deh ma Y-Salômôn

²⁴ Y-Đavit bonh leng H'Batsêba, ur păng, jêh ri tât bê̆ch ndrel đah păng. Păng deh ma du huê kon bu klâu, hađăch ntơ amoh Y-Salômôn. Brah Yêhôva rŏng ma kon se jê̆ nây,

²⁵ pôri Păng prơh nơm mbơh lor Y-Nathan hăn tât ntơ amoh ăn păng jêng Y-Jêdidia, yorlah Brah Yêhôva rŏng păng.

Y-Đavit pit sŏk ƀon Raba

²⁶ Nôk nây taơ, Y-Jôap tâm lơh đah ƀon Raba, phung Ammôn, jêh ri dăch dơi sŏk jêh ƀon hađăch nây.

²⁷ Y-Jôap prơh bunuyh hăn tât mbơh ma Y-Đavit: “Gâp lơh jêh đah ƀon Raba jêh ri dơi pit tu dak ƀon nây.

²⁸ Aƀaơ ri, hađăch tâm rƀŭn hom phung ƀon lan hôm e, hăn tât tanăp ƀon jêh ri pit sŏk păng, tơlah gâp sŏk ƀon nây, klach lah lư amoh gâp.”

²⁹ Pônây, Y-Đavit rgum lĕ rngôch phung tahan, hăn hao ma ƀon Raba, rduh lơh jêh ri pit sŏk păng.

³⁰ Hađăch sŏk lơi đon hađăch ta klơ bôk hađăch phung Ammôn jêh ri ndô ta klơ bôk păng. Đon hađăch nây njing jâk klăp lah pe jât puăn kilô mah, geh ndop lŭ khlay. Y-Đavit leo ndô ndơ sŏk gro tă bơh ƀon nây âk ngăn ngên.

³¹ Bi phung ƀon lan gŭ tâm ƀon nây hađăch ăn bu njŭn leo khăn păng hăn pah kan jâk, dŏng ndruyh, kau loih, sung loih, jêh ri pah kan tâm năk ƀư ƀrĭk. Tâm ban ƀư pônây păng ƀư ma lĕ rngôch ƀon phung Ammôn. Jêh nây, Y-Đavit jêh ri lĕ rngôch phung tahan plơ̆ sĭt ma Yêrusalem.