II Samuel 11 - Nau Brah Ndu Ngơi 2023

Y-Đavit văng tĭr jêh ri nkhĭt bunuyh

¹ Lăp yan kao jêng rnôk phung hađăch vay hăn tâm lơh. Y-Đavit prơh Y-Jôap ndrel phung tahan păng jêh ri lĕ rngôch phung Israel hăn tâm lơh; khân păng lơh rai phung Ammôn jêh ri nchueng jŭm ƀon Raba. Ƀiălah Y-Đavit hôm gŭ ta Yêrusalem.

² Du mhaơ ri, Y-Đavit dâk tă bơh sưng bê̆ch păng nơm jêh ri hăn nsong pâl klơ chor ntŭk ngih hađăch. Ntơm bơh chor ngih nây, hađăch saơ du huê bu ur ueh ngăn dôl gŭ ŭm.

³ Y-Đavit prơh bu hăn ôp bu ur nây mbu moh, bu lah: “Nây jêng H'Batsêba, kon bu ur Y-Êliam, ur Y-Uri, bunuyh Hitit.”

⁴ Y-Đavit prơh bunuyh hăn sŏk bu ur nây văch tât ta ngih hađăch. Tơlah păng văch, hađăch bê̆ch ndrel đah păng. (Jêh ta nây păng ƀư ăn kloh nau ƀơ̆ păng nơm). Jêh nây păng plơ̆ sĭt ngih păng.

⁵ Bu ur aơ ntreo. Păng prơh bunuyh hăn nkoch ma Y-Đavit: “Gâp ntreo jêh.”

⁶ Y-Đavit prơh bu hăn ntuh nau ma Y-Jôap: “Lah hom Y-Uri, bunuyh Hitit, văch tât ma gâp.” Pônây, Y-Jôap prơh Y-Uri hăn tât ma Y-Đavit.

⁷ Tơlah Y-Uri lĕ tât jêh, Y-Đavit ôp mâm nau tât ma Y-Jôap jêh ri ma phung tahan geh đăp mpăn lĕ, jêh ri nđâp nau tâm lơh mâm jêng.

⁸ Jêh nây Đavit lah ma Y-Uri pô aơ: “Hăn hom ma ngih may jêh ri rao lơi jâng may.” Pônây, Y-Uri hăn luh bơh ngih hađăch jêh ri geh du huê bunuyh djôt leo ndrel păng du drăp ndơ hađăch tĭng pakơi păng.

⁹ Ƀiălah Y-Uri bê̆ch ta mpông pêr ngih hađăch ndrel ma lĕ rngôch phung tahan hađăch păng nơm, mâu sĭt ma ngih păng.

¹⁰ Tơlah bu nkoch nau nây ma Y-Đavit pô aơ: “Y-Uri mâu hăn trŭnh ôh ma ngih vâl păng nơm,” Y-Đavit lah ma Y-Uri: “May mâu ŭch hăn sĭt hĕ? Moh nau dĭng may mâu sĭt ma ngih may nơm?”

¹¹ Y-Uri plơ̆ lah ma Y-Đavit: “Hip Nau Tâm Rnglăp nâm bu phung ƀon lan Israel jêh ri phung Yuđa dôl gŭ tâm ngih bok, kôranh gâp jêng Y-Jôap ndrel ma phung oh mon kôranh gâp gŭ njơh tâm mir, bi gâp plơ̆ sĭt tâm ngih gâp gay sông sa nhêt jêh ri bê̆ch ndrel ma ur gâp lĕ? Nanê̆ tĭng nâm hađăch jêh ri huêng hađăch ăt hôm rêh, gâp mâu mra ƀư nau nây ôh!”

¹² Y-Đavit lah ma Y-Uri: “Nar aơ gŭ hom ta aơ, jêh nây ôi taơ gâp mra prơh may hăn.” Pônây, Y-Uri gŭ ta ƀon Yêrusalem nar nây jêh ri nar ôi taơ.

¹³ Y-Đavit jă păng sông sa nhêt ndrel ma păng, jêh ri nchâp păng nhêt kŏ tât nhŭl. Ƀiălah tât kêng măng, Y-Uri hăn bê̆ch klơ sưng ndrel phung oh mon kôranh păng nơm, ƀiălah mâu hăn sĭt ôh ma ngih păng.

Y-Đavit ƀư ma Y-Uri khĭt

¹⁴ Ang ôi taơ, Y-Đavit nchih njuăl samƀŭt ma Y-Jôap, jêh ri njuăl ta ti Y-Uri gay djôt hăn.

¹⁵ Tâm samƀŭt hađăch nchih pô aơ: “Dơm hom Y-Uri lor panăp, ntŭk tâm lơh ktang lơn, jêh nây rŭch hom pakơi ngai đah păng, gay ăn bu lơh păng jêh ri păng khĭt.”

¹⁶ Pônây dôl nchueng ƀon, Y-Jôap dơm Y-Uri ta ntŭk păng hŏ gĭt jêh geh phung tahan rlăng ktang ngăn.

¹⁷ Phung tahan tă bơh ƀon du luh tâm lơh đah Y-Jôap, jêh ri geh du rnoh bunuyh tâm phung oh mon Y-Đavit cha lôt khĭt. Y-Uri, bunuyh Hitit, lĕ khĭt đŏng.

¹⁸ Y-Jôap prơh bunuyh hăn mbơh ma Y-Đavit gĭt lĕ rngôch ntơm saơm tât lôch nau tâm lơh nây.

¹⁹ Jêh ri păng ntĭnh ma bunuyh ntuh nau: “Tơlah may hŏ mbơh jêh ma hađăch lĕ ntil nau tât ta ntŭk tâm lơh jêh,

²⁰ tơlah hađăch ji nuih lah ma may: ‘Moh nau khân may hăn dăch ir ŭch nchueng lơh ƀon? Khân may mâu gĭt hĕ bu gŭ ta klơ mpêr ƀon prêh pănh ntâng ma hăr?

²¹ Kăl e mbu nkhĭt jêh Y-Abimêlek, kon bu klâu Y-Jêrubêset? Mâu hĕ di du huê bu ur gŭ ta klơ mpêr ƀon klŭp du mlâm mpăl lŭ geh ta păng, jêh ri păng khĭt ta ƀon Thêbes? Mâm ƀư khân may hăn văch dăch ir ma mpêr pônây?’ Rnôk nây, may mra lah: ‘Oh mon hađăch jêng Y-Uri, bunuyh Hitit, khĭt tâm ban lĕ.’”

²² Pônây, nơm ntuh nau hăn jêh ri mbơh ma Y-Đavit lĕ nau Y-Jôap ntĭnh jêh.

²³ Nơm ntuh nau nkoch ma Y-Đavit: “Ntơm bơh saơm phung tahan rlăng ktang lơn ma hên, rduh luh lơh hên tâm mir; ƀiălah hên nsot khân păng tât ta ntŭk lăp mpông ƀon.

²⁴ Ntơm bơh klơ mpêr ƀon, phung tahan djôt na pănh phung oh mon hađăch, geh bar pe bunuyh khĭt jêh; oh mon hađăch jêng Y-Uri, bunuyh Hitit, khĭt tâm ban lĕ.”

²⁵ Y-Đavit lah ma nơm mbơh: “May lah hom ma Y-Jôap kơt aơ: ‘Lơi ir rngot mơ nau aơ, yorlah đao geh tơ̆ nkhĭt nơm aơ, geh tơ̆ nkhĭt nơm ri. Nsrôih nsram hom gay dơi lơh ƀon nây jêh ri ƀư rai păng. Bi may sŭk nsôr păng ăn nâp nau mĭn n'hao nuih păng.’”

²⁶ Tơlah ur Y-Uri tăng nau ma Y-Uri, sai păng nơm, lĕ khĭt, pôri păng nhĭm vơl ma sai păng.

²⁷ Tơlah nau ndrê klâng lĕ jêh, Y-Đavit prơh bu hăn leo păng ma ngih hađăch; păng dơi jêng ur hađăch jêh ri deh ăn ma hađăch du huê kon bu klâu. Ƀiălah nau Y-Đavit ƀư nây rngot ma Brah Yêhôva.