II Samuel 10 - Nau Brah Ndu Ngơi 2023

Hađăch phung Ammôn ƀư bêk prêng phung mbơh Y-Đavit

¹ Jêh nau nây, hađăch phung Ammôn khĭt; kon bu klâu hađăch jêng Y-Hanun chiă uănh ntrok păng.

² Y-Đavit lah: “Gâp ŭch mpơl nau rŏng dơh dăch ma Y-Hanun, kon Y-Nahas, nâm bu mbơ̆ păng nơm ƀư nau ueh ma gâp.” Pônây Y-Đavit prơh phung oh mon păng gay bonh leng hađăch nĕ yor nau khĭt mbơ̆ păng. Pônây, phung oh mon Y-Đavit hăn tât tâm n'gor phung Ammôn.

³ Ƀiălah phung kôranh chiă uănh ma phung Ammôn mbơh ma Y-Hanun, kôranh khân păng: “Hađăch mĭn lĕ ma Y-Đavit prơh jêh phung mbơh hăn tât gay bonh leng may yorlah nau păng yơk ma mbơ̆ may? Mâu di hĕ Y-Đavit prơh hăn phung oh mon păng văch ma hađăch gay ŭch sek uănh ƀon, n'hut uănh jêh ri gay ƀư rai lơi lĕ ƀon?”

⁴ Pôri Y-Hanun nhŭp phung oh mon Y-Đavit, poih du ding têp ta kang khân păng, koh gleh ao jong khân păng tât ta gang bŭt, jêh nây mprơh khân păng sĭt.

⁵ Bu nkoch tay nau nây ma Y-Đavit; păng prơh hăn phung tâm mâp đah khân păng, yorlah khân păng bêng ma nau prêng. Hađăch lah ma khân păng: “Gŭ hom ta ƀon Yêrikô kŏ tât têp khân may hon tay, jêh nây plơ̆ sĭt hom.”

Phung Ammôn jêh ri phung Aram roh nau dơi

⁶ Tơlah phung Ammôn saơ ma khân păng nơm lĕ phung Y-Đavit tâm rmot, khân păng prơh phung tahan hăn lơh nkhôm klăp lah bar rmưn nuyh tahan hăn jâng bơh phung Aram ta Bêt-Rêhôp jêh ri ta Sôba, du rbăn nuyh bơh hađăch phung Maka jêh ri du rmưn bar rbăn nuyh bơh n'gor bri Tôp.

⁷ Y-Đavit tăng nau nây, păng prơh ro Y-Jôap ndrel ma phung tahan dăng ktang hăn tâm lơh đah khân păng.

⁸ Phung Ammôn hăn luh, nkrĭp dăp tahan ta ntŭk mpông ƀon, bi phung tahan Aram ta Sôba jêh ri Rêhôp, phung tahan tă bơh n'gor Tôp jêh ri hađăch phung Maka gŭ êng da dê tâm mir.

⁹ Y-Jôap saơ phung rlăng hăn bra ŭch lơh panăp jêh ri pakơi păng, păng săch phung ƀaƀă tahan tâm phung tahan janh ktang Israel, jêh ri nkrĭp dăp tahan gay tâm lơh đah phung tahan Aram;

¹⁰ phung tahan hôm e, păng jao ăn ma Y-Abisai, oh păng, gay nkrĭp dăp tahan panăp đah phung Ammôn.

¹¹ Păng lah ma Y-Abisai: “Tơlah phung tahan Aram ktang ir ma gâp, may mra kơl gâp; ƀiălah tơlah phung Ammôn ktang lơn may, gâp mra văch kơl may.

¹² Ktang hom jêh ri tâm lơh janh ktang yor phung ƀon lan he jêh ri yor lĕ ƀon Brah Ndu he. Dăn Brah Yêhôva ƀư tĭng nâm nau Păng mĭn ueh!”

¹³ Y-Jôap nđâp ma phung tahan hăn tĭng păng văch dăch, tâm lơh đah phung tahan Aram jêh ri khân păng nchuăt du bơh păng.

¹⁴ Tơlah saơ phung tahan Aram nchuăt du, pôri phung tahan Ammôn tâm ban lĕ nchuăt du bơh Y-Abisai, jêh ri lăp tâm ƀon. Jêh nây dơi tâm lơh đah phung Ammôn, Y-Jôap plơ̆ sĭt ta Yêrusalem.

¹⁵ Phung Aram saơ phung Israel dơi jêh đah khân păng, khân păng tâm rƀŭn ndrel.

¹⁶ Y-Hadadêser prơh bu hăn rgum phung tahan Aram gŭ đah ri dak krong Ơphrat; jêh ri Y-Sôbach, kôranh chiă uănh toyh phung tahan Y-Hadadêser, njŭn leo khân păng tât ta Hêlam.

¹⁷ Tăng lư nau nây, Y-Đavit tâm rgum ndrel lĕ rngôch phung Israel, rgăn dak krong Yurdan, hăn tât ta Hêlam. Phung tahan Aram nkrĭp dăp tahan tâm lơh đah Y-Đavit.

¹⁸ Ƀiălah phung Siri nchuăt du panăp phung Israel. Y-Đavit ƀư rai pơh rhiăng ndeh seh phung tahan Aram jêh ri puăn rmưn nuyh tahan ncho seh. Ta nây, hađăch nkhĭt đŏng Y-Sôbach, kôranh chiă uănh ma phung tahan khân păng.

¹⁹ Tơlah lĕ rngôch phung hađăch jêng phung oh mon Y-Hadadêser saơ phung Israel dơi jêh đah khân păng, khân păng ƀư nau đăp mpăn đah phung Israel jêh ri pah kan phung Israel. Phung Aram mâu hôm ŭch kơl ôh ma phung Ammôn.