II Samuel 1 - Nau Brah Ndu Ngơi 2023

Y-Đavit tăng lư nau Y-Saul jêh ri Y-Jônathan khĭt jêh

¹ Jêh Y-Sôl khĭt, Y-Đavit hŏ dơi jêh đah phung Amalek lĕ plơ̆ sĭt jêh ri gŭ ta Siklak bar nar.

² Tât nar rơh pe, geh du huê bu klâu văch tât tă bơh pôih Y-Sôl, kho ao păng lĕ hêk, bôk tôr păng krêp neh muy. Nôk tât tanăp Y-Đavit, păng chon mon ta neh jêh ri mbah.

³ Y-Đavit ôp ma păng: “Mbah ntŭk tă may tât?” Păng plơ̆ lah: “Gâp nchuăt du klaih tă bơh pôih tahan Israel.”

⁴ Y-Đavit lah: “Moh nau hŏ tât? Nkoch tay hom ma gâp.” Păng plơ̆ lah đŏng: “Phung ƀon lan nchuăt du tă bơh nau tâm lơh, geh âk bunuyh phung he lĕ cha lôt khĭt jêh, hađăch Y-Sôl jêh ri kon bu klâu păng Y-Jônathan lĕ khĭt đŏng.”

⁵ Y-Đavit ôp ma nơm ndăm nkoch bri ma păng nây: “Mâm may gĭt ma Y-Sôl jêh ri kon bu klâu păng Y-Jônathan lĕ khĭt jêh?”

⁶ Nơm ndăm nây lah: “Nkhêp gâp gŭ ta klơ yôk Gilbôa jêh ri saơ hađăch Y-Sôl gŭ ta nây nsing ta tak păng, tâm nôk ndeh seh jêh ri phung tahan ncho seh phung rlăng tĭng ban dăch păng.

⁷ Păng n'gĭl saơ gâp jêh ri kuăl gâp. Gâp lah: ‘Ta aơ gâp.’

⁸ Păng ôp ma gâp: ‘Mbu may?’ Gâp plơ̆ lah: ‘Gâp jêng du huê Amalek.’

⁹ Păng lah tay: ‘Hăn dăch hom nkhĭt gâp, yorlah gâp rngot ngăn, ƀiălah nau rêh gâp hôm e.’

¹⁰ Pônây, gâp hăn văch dăch jêh ri nkhĭt păng, yorlah gâp gĭt păng mâu hôm rêh jêh nây păng lĕ cha lôt jêh. Jêh nau nây, gâp sŏk đon hađăch klơ bôk păng jêh ri kông ta ti păng gay djôt leo sĭt ma kôranh gâp ta aơ.”

¹¹ Y-Đavit khêk ao păng nơm; lĕ rngôch phung tĭng ndô̆ păng tâm ban lĕ ƀư pônây da dê.

¹² Khân păng gŭ klâng rngot, nhĭm, jêh ri ver ât sông sa kŏ tât kêng măng yorlah Y-Sôl jêh ri Y-Jônathan, kon bu klâu păng, yor phung ƀon lan Brah Yêhôva jêh ri yor ngih Israel, yorlah phung hŏ cha lôt khĭt jêh đah đao.

¹³ Y-Đavit ôp ma nơm ndăm mbơh ma păng: “Mbah ntŭk tă may tât?” Păng plơ̆ lah: “Gâp jêng kon bu klâu du huê nơm gŭ njơh ƀât lât, phung ƀon lan Amalek.”

¹⁴ Y-Đavit lah: “Mâm ƀư may mâu klach ôh yơr ti may nkhĭt bunuyh Brah Yêhôva tŏ jêh dak ƀâu kah?”

¹⁵ Jêh nây Y-Đavit kuăl du huê ndăm jêh ri lah: “Hăn dăch, lơh khĭt hom nơm nây!” Nơm nây dong păng, jêh ri păng khĭt.

¹⁶ Y-Đavit lah ma păng: “Ăn mham may nkhŭt tay ta klơ bôk may nơm! Yorlah trôm mbung may nơm lĕ nkoch ma nau tih may nơm, yorlah may hŏ lah pô aơ: ‘Gâp nkhĭt jêh nơm Brah Yêhôva tŏ jêh ma dak ƀâu kah.’”

Nau mprơ Y-Đavit

¹⁷ Rnôk nây, Y-Đavit nchih nau mprơ rngot gay nhĭm ma Y-Sôl jêh ri Y-Jônathan, kon bu Y-Sôl,

¹⁸ jêh ri ntĭm nti ma phung ƀon lan Yuđa: Aơ jêng nau mprơ Na, hŏ nchih tâm ndrom samƀŭt Y-Jasar:

¹⁹ “Ơ Israel! Bunuyh lư n'găr may bu nkhĭt jêh ta ntŭk klơ dor prêh! Mâm ƀư phung janh ktang nây cha lôt!

²⁰ Lơi nkoch ôh nau nây tâm Gat, Lơi mbơh ôh nau nây tâm lĕ trong Askalôn, Klach lah phung kon druh phung Philistin răm maak, Jêh ri phung kon bu ur phung mâu koh ntâu dơi răm rhơn!

²¹ Hơi phung yôk Gilbôa! Lơi ăn geh dak ngom jêh ri mih ta klơ khân may, Jêh ri mir mâu geh ba, ndơ ƀư brah mâu geh; Yorlah ta ntŭk nây, khêl phung janh ktang ƀơ̆ jêh, Nây jêng khêl Y-Sôl, bu mâu hôm mhĭng dak ngi ôh.

²² Na Y-Jônathan Mâu hôm plơ̆ sĭt jêh ri mâu hôm saơ krêp puăch mham bunuyh khĭt, Jêh ri ngi phung janh ktang; Đao Y-Sôl mâu đŏng plơ̆ sĭt dơm dam.

²³ Y-Sôl jêh ri Y-Jônathan rŏng ndrăng khân păng âk ngăn, Tâm nau rêh jêh ri tâm nau khĭt, khân păng mâu tâm nkhah ôh: Khân păng prăl lơn klang lêl, Ktang lơn yau mŭr!

²⁴ Hơi phung kon bu ur Israel, nhhiăng nhĭm hom ma Y-Sôl! Păng hŏ nsoh ao chăng ueh ngăn ma khân ay, Chuh ta ao khân ay ndơ nkrơ̆ ma mah.

²⁵ Mâm dĭng phung tahan janh ktang Cha lôt ta nklang nau tâm lơh! Y-Jônathan chôt khĭt ta klơ yôk prêh.

²⁶ Y-Jônathan, hơi nâu gâp! Nuih n'hâm gâp rngot klâng yor may. May hŏ ƀư maak jêh ma gâp âk ngăn; Nau may rŏng gâp jêng khlay ngăn, Rlau lơn ma nau rŏng phung bu ur.

²⁷ Mâm dĭng phung janh ktang lĕ chôt jêh, Jêh ri ndơ tâm lơh khân păng jêng mâu khlay, mƀăr lơi!”