II Phung Hađăch 9 - Nau Brah Ndu Ngơi 2023

Y-Jêhu ƀư hađăch Israel

¹ Nơm mbơh lor Y-Êlisê kuăl du huê tâm phung oh mon phung nơm mbơh lor jêh ri lah: “Vân hom bŭt jêh ri sŏk leo du gri dak ƀâu kah aơ hăn rlet ma ƀon Ramôt-Gilêat.

² Tơlah may tât ta nây, joi hom Y-Jêhu jêng kon Y-Jôsaphat, sau Y-Nimsi. May văch tât jă păng dâk bơh oh nâu păng, jêh ri leo păng lăp tâm trôm jrô ndâp.

³ Nôk nây, may mra sŏk gri dak ƀâu kah, tŏ klơ bôk păng jêh ri lah: ‘Brah Yêhôva lah: Gâp tŏ dak ƀâu kah ma may ƀư hađăch Israel.’ Jêh nây pơk hom mpông bloh jêh ri nchuăt du ro, lơi gŭ jŏ ôh!”

⁴ Pôri bu klâu ndăm jêng nơm mbơh lor ndăm hăn rlet ma ƀon Ramôt-Gilêat.

⁵ Tơlah păng tât ta aơ, phung kôranh ma phung tahan dôl tâm rƀŭn. Păng lah: “Hơi kôranh tahan, gâp geh du kan ŭch lah ma may.” Y-Jêhu ôp: “Ma mbu moh tâm phung hên?” Păng plơ̆ lah: “Ma may yơh, hơi kôranh tahan.”

⁶ Y-Jêhu dâk jêh ri hăn lăp tâm ngih. Nơm mbơh lor nây tŏ dak ƀâu kah klơ bôk păng, jêh ri lah: “Yêhôva Brah Ndu phung Israel lah: ‘Gâp tŏ dak ƀâu kah ma may ƀư hađăch Israel, jêng phung ƀon lan Brah Yêhôva.

⁷ May mra lơh nkhĭt ngih Y-Ahap, kôranh may; pônây Gâp mra mplơ̆ plơng ma H'Jêsêbel ma nau mham phung oh mon Gâp jêng nơm mbơh lor, nđâp mham lĕ rngôch phung oh mon Brah Yêhôva.

⁸ Lĕ ngih Y-Ahap mra rai lôch. Gâp mra ƀư rai lĕ rngôch phung bu klâu bơh ngih Y-Ahap, mâu chrê dĭk bu mâu lah kon me tâm n'gor Israel.

⁹ Gâp mra ƀư ma ngih Y-Ahap tâm ban ma ngih Y-Jêrôbôam, kon bu klâu Y-Nêbat, jêh ri nâm bu ngih Y-Baêsa, kon bu klâu Y-Ahija.

¹⁰ So mra sa puăch H'Jêsêbel tâm mir Jesrêel, mâu geh bunuyh tâp păng ôh.’” Lah lôch jêh, nơm mbơh lor pơk mpông bloh jêh ri nchuăt du.

¹¹ Y-Jêhu plơ̆ luh hăn ma phung kôranh tahan kôranh păng. Khân păng ôp ma păng: “Lĕ rngôch nau jêng nau đăp mpăn lĕ? Mâm ƀư bunuyh rluk nây văch tât joi may?” Y-Jêhu plơ̆ lah ma khân păng: “Khân may gĭt năl bu klâu nây jêh ri gĭt đŏng lĕ nau păng ngơi jêh.”

¹² Ƀiălah khân păng lah: “Lơi dĭng mƀruh! Mbơh hom ma hên tăng.” Pônây păng lah: “Bunuyh nây lah ma gâp kơt aơ, kơt ri: ‘Brah Yêhôva lah: Gâp tŏ dak ƀâu kah ma may ƀư hađăch Israel.’”

¹³ Ăp nơm sŏk ndal ao jâr păng nơm lăk tâm dâng jâng Y-Jêhu, ta klơ ntung gung. Jêh nây khân păng uh nŭng jêh ri mbơh pô aơ: “Y-Jêhu jêng hađăch!”

Y-Jêhu nkhĭt hađăch Israel jêh ri hađăch Yuđa

¹⁴ Pônây yơh, Y-Jêhu kon Y-Jôsaphat, sau Y-Nimsi, tâm chră rdâng đah Y-Jôram. Nôk nây, Y-Jôram jêh ri lĕ rngôch tahan Israel gŭ king n'gang Ramôt-Gilêat tâm rdâng đah Y-Hasael, hađăch Aram.

¹⁵ Ƀiălah hađăch Jôram hŏ plơ̆ sĭt jêh ma Jesrêel gay săm lĕ ntŭk sôt phung Aram hŏ lơh jêh tâm nôk păng tâm lơh đah Y-Hasael, hađăch Aram. Y-Jêhu lah: “Tơlah khân may ŭch, lơi ăn du huê klaih bơh ƀon gay hăn mbơh nau mhe aơ tâm Jesrêel.”

¹⁶ Pônây Y-Jêhu hao ndeh seh hăn tât ta Jesrêel, yorlah Y-Jôram gŭ săm ta nây. Jêh ri Y-Ahasia, hađăch Yuđa, hăn trŭnh đŏng ta nây gay khâl đah Y-Jôram.

¹⁷ Bunuyh tahan gŭ gak dôl dâk ta klơ ngih gung Jesrêel, păng saơ phung tahan Y-Jêhu dôl văch tât jêh ri nter huy: “Gâp saơ du phung tahan hăn văch.” Y-Jôram lah ro: “Săch hom du huê tahan ncho seh, prơh hăn tâm mâp đah phung nây jêh ri ăn păng ôp: ‘Nau đăp mpăn lĕ?’”

¹⁸ Pôri du huê tahan ncho seh hăn tâm mâp đah Y-Jêhu jêh ri lah: “Hađăch ôp: ‘Nau đăp mpăn lĕ?’” Y-Jêhu plơ̆ lah: “Đăp mpăn mâu lah mâu ndơ ƀư tât ma may? Rŭch plơ̆ hom pakơi gâp.” Bunuyh tahan gŭ gak mbơh: “Nơm mbơh hŏ hăn mâp khân păng jêh, ƀiălah mâu plơ̆ sĭt ôh.”

¹⁹ Y-Jôram prơh đŏng du huê tahan ncho seh tal bar tât ma khân păng jêh ri lah: “Hađăch ôp: ‘Nau đăp mpăn lĕ?’” Y-Jêhu plơ̆ sĭt lah: “Đăp mpăn mâu lah mâu ndơ ƀư tât ma may? Rŭch plơ̆ hom pakơi gâp.”

²⁰ Bunuyh tahan gŭ gak mbơh đŏng: “Bunuyh mbơh hŏ hăn mâp jêh ma khân păng, ƀiălah mâu plơ̆ sĭt ôh. Nơm ƀĭt ndeh seh jêng nâm bu Y-Jêhu, kon Y-Nimsi, yorlah păng ƀĭt ndeh seh ma nau janh hâng.”

²¹ Y-Jôram lah: “Nkra hom ndeh seh!” Bu nkra ndeh seh ma păng. Jêh nây Y-Jôram, hađăch Israel, jêh ri Y-Ahasia hađăch Yuđa, ăp nơm ncho ndeh seh păng da dê, jêh ri hăn tâm mâp đah Y-Jêhu tâm neh mir Y-Nabôt, bunuyh Jesrêel.

²² Tơlah Y-Jôram lĕ saơ jêh Y-Jêhu, păng ôp: “Hơi Y-Jêhu, nau đăp mpăn lĕ?” Ƀiălah Y-Jêhu plơ̆ lah: “Mâm dơi geh nau đăp mpăn dôl mê̆ may H'Jêsêbel ƀư âk nau ka n'hong jêh ri nau n'hŭm?”

²³ Y-Jôram plĕch ro ndeh seh nchuăt du, jêh ri mbơh ma Y-Ahasia: “Hơi Y-Ahasia, geh nau tâm rdâng jêh!”

²⁴ Y-Jêhu van na dôl djôt tâm ti, pănh Y-Jôram di ta n'gul bar săng nglik. Hăr rho sôr play nuih păng, ƀư ăn păng cha lôt tâm ndeh seh păng.

²⁵ Y-Jêhu lah ma Y-Bitkar, kôranh kâp kơl păng: “Djôt leo hom săk jăn păng mƀăr lơi tâm mir Y-Nabôt, bunuyh Jesrêel. Yorlah ăn ma may kah gĭt tay kăl e ri gâp jêh ri may ncho seh ndrel tĭng pakơi Y-Ahap mbơ̆ păng Brah Yêhôva ngơi nau mbơh tâm rdâng aơ đah păng:

²⁶ ‘Brah Yêhôva lah: Nanê̆ ngăn, yorlah nđaơ Gâp hŏ saơ jêh mham Y-Nabôt jêh ri phung kon bu klâu păng pling mham, pôri Gâp mra nhŭp may mplơ̆ hom nau tih ƀư nkhŭt mham ta mir nây.’ Brah Yêhôva phat dôih kơt nĕ. Pôri aƀaơ djôt leo hom săk jăn păng mƀăr lơi tâm mir nây, di nâm Brah Yêhôva ngơi jêh.”

Y-Ahasia, hađăch Yuđa, khĭt

²⁷ Tơlah Y-Ahasia, hađăch Yuđa, saơ nau nây, păng nchuăt du rlet ma mpeh ƀon Bet-Hagan. Ƀiălah Y-Jêhu hăn tĭng jêh ri ntăm: “Lơh nkhĭt hom păng dôl gŭ ta klơ ndeh seh, ta sop Gur, dăch ƀon Iblêam!” Y-Ahasia sôt jêh ri nchuăt du tât ta Mêgidô, jêh ri khĭt ta nây.

²⁸ Phung oh mon păng dơm săk jăn păng ta klơ ndeh seh rdeng ma ƀon Yêrusalem, jêh ri tâp păng tâm môch ndrel ma phung chô yau păng tâm ƀon Đavit.

²⁹ Y-Ahasia gŭ ta sưng hađăch Yuđa tâm năm rơh jât ma nguay rnôk rô̆ Y-Jôram chiă uănh, kon hađăch Ahap.

So sa puăch H'Jêsêbel

³⁰ Jêh nau nây, Y-Jêhu tât ta Jesrêel. Tơlah H'Jêsêbel tăng nau nây, păng mhĭng măt păng, nkrơ̆ sŏk bôk păng, jêh nây gŭ uănh bơh mpông bloh.

³¹ Dôl Y-Jêhu lăp mpông ƀon păng ôp: “Hơi Y-Simri, nơm nkhĭt kôranh may nơm! Nau đăp mpăn lĕ?”

³² Y-Jêhu n'gơr măt hao ma mpeh mpông bloh jêh ri ôp: “Mbu nơm gŭ mpeh ma gâp? Mbu moh?” Geh bar mâu lah pe kôranh bu char uănh ma păng.

³³ Păng lah: “Mƀăr hom păng tŭp ta neh!” Khân păng mƀăr păng tâm neh, ƀaƀă mham mprănh ta mpir jêh ri ta seh, jêh ri jâng seh jot klơ păng.

³⁴ Y-Jêhu hăn lăp, sông sa nhêt lôch jêh, păng lah: “Aƀaơ ri hăn uănh hom ma bu ur bu rak rtăp jêh ri tâp brôi păng, yorlah păng jêng kon bu ur hađăch.”

³⁵ Ƀiălah dôl khân păng tâp brôi păng, ƀiălah khân păng saơ knŏng hôm nting bôk, bar đah jâng, jêh ri bar mpang ti dơm.

³⁶ Khân păng plơ̆ sĭt mbơh ma Y-Jêhu. Păng lah: “Aơ jêng nau Brah Yêhôva ngơi đah oh mon Păng jêng Y-Êli, bunuyh Tisbê, jêh ri lah pô aơ: ‘So mra sa puăch H'Jêsêbel tâm mir Jesrêel.

³⁷ Săk jăn khĭt H'Jêsêbel mra tâm ban ma ek klơ neh tâm mir Jesrêel, kŏ tât bu mâu lah: Aơ yơh jêng H'Jêsêbel.’”