II Phung Hađăch 8 - Nau Brah Ndu Ngơi 2023

Bu mplơ̆ tay drăp ndơn ma bu ur Sunem

¹ Rnôk nây, Y-Êlisê lah jêh ma bu ur geh kon bu klâu păng hŏ ƀư dâk rêh tay: “Dâk hăn hom, ndrel ma bunuyh ngih vâl ay, jêh ri gŭ njơh ta ntŭk ay dơi, yorlah Brah Yêhôva ƀư ăn nau ji ngot toyh tât geh tâm n'gor, jêh ri mra jŏ jong kŏ tât pơh năm.”

² Bu ur nây ƀư ro tĭng nâm nau bunuyh Brah Ndu hŏ lah, păng ndrel ma rnăk vâl păng hăn tât jêh ri gŭ njưh tâm neh Philistin pơh năm.

³ Lôch pơh năm, bu ur nây plơ̆ sĭt tă bơh neh Philistin. Păng hăn vơl dăn ma hađăch yor ma ngih jêh ri lŏ sre păng nơm.

⁴ Nôk nây, hađăch dôl ngơi ndrel đah Y-Gêhasi, oh mon bunuyh Brah Ndu. Hađăch lah: “Nkoch bri hom ma gâp tăng lĕ rngôch nau kan toyh Y-Êlisê ƀư jêh.”

⁵ Y-Gêhasi dôl nkoch bri ma hađăch tĭng mâm nau Y-Êlisê hŏ ƀư ăn ma bunuyh khĭt dâk rêh tay, ri, bu ur geh kon bu klâu Y-Êlisê hŏ ƀư dâk rêh tay, văch tât vơl dăn ma hađăch ma nau ngih jêh ri tâm lŏ sre păng. Y-Gêhasi lah ro: “Hơi hađăch jêng kôranh gâp! Aơ jêng du huê bu ur nây, jêh ri aơ jêng kon bu klâu păng Y-Êlisê hŏ ƀư ăn dâk rêh tay.”

⁶ Hađăch ôp ma bu ur, jêh ri păng nkoch bri lĕ nau nây ma hađăch tăng. Jêh nây, hađăch nchŏng ma du huê kôranh tâm ngih hađăch nkra nau păng vơl dăn, jêh ri ntĭnh pô aơ: “Kơl hom bu ur nây sŏk tay lĕ rngôch drăp ndơ păng, ndrel ma lĕ kao play tâm lŏ sre, ntơm bơh nar păng du luh bơh n'gor tât ta nar aơ.”

Y-Hasael nkhĭt Y-Ben-Hadat

⁷ Y-Êlisê hăn tât ma ƀon Damas tâm nôk nây hađăch Aram jêng Y-Ben-Hadat dôl ji. Tơlah geh bunuyh nkoch ma hađăch: “Geh bunuyh Brah Ndu mhe tât ta aơ,”

⁸ hađăch lah ma Y-Hasael: “Djôt leo hom ndrel ma may ndơ nhhơr jêh ri hăn mâp ma bunuyh Brah Ndu. May mra dăn ma păng ôp ma Brah Yêhôva pô aơ gâp mra dơi bah lĕ nau ji aơ?”

⁹ Pônây Y-Hasael hăn mâp bunuyh Brah Ndu, djôt leo ndrel păng du ndơ nhhơr, geh lĕ rngôch ntil ndơ ueh lơn ngăn ta Damas, dơm bêng klơ puăn jât seh samô. Păng hăn tât jêh ri mpơl măt tanăp Y-Êlisê jêh ri lah: “Kon bu klâu may Y-Ben-Hadat, hađăch Aram, prơh gâp hăn ma may gay ôp pô aơ: ‘Gâp mra dơi bah lĕ bơh nau ji aơ?’”

¹⁰ Y-Êlisê plơ̆ lah: “Hăn hom lah ma păng: ‘Nanê̆ hađăch mra dơi bah nau ji.’ Ƀiălah, Brah Yêhôva hŏ tâm mpơl ma gâp pô aơ nanê̆ păng mra khĭt.”

¹¹ Y-Êlisê rnam muh măt, n'gơr uănh Y-Hasael jŏ ngăn kŏ tât păng prêng. Jêh nây bunuyh Brah Ndu luh nhĭm.

¹² Y-Hasael ôp păng: “Moh nau dĭng kôranh gâp nhĭm?” Y-Êlisê plơ̆ lah: “Yorlah gâp gĭt may mra ƀư nau mhĭk ma phung ƀon lan Israel. May mra su ma ŭnh lĕ ƀon nâp ngăn khân păng, sŏk đao nkhĭt phung mom ndăm, jêh ri choh hăch phung kon se khân păng, jêh ri roch lơi proch bu ur dôl geh ntreo.”

¹³ Y-Hasael ôp: “Ƀiălah mbu nơm oh mon may jêng, gâp jêng du mlâm kon so dơm, mâm dĭng gâp dơi ƀư lĕ kan toyh nây?” Y-Êlisê plơ̆ lah: “Brah Yêhôva hŏ tâm mpơl jêh ma gâp ma may mra jêng hađăch Aram.”

¹⁴ Y-Hasael du tă bơh Y-Êlisê jêh ri plơ̆ sĭt ma kôranh păng. Hađăch ôp: “Mâm nau Y-Êlisê hŏ lah ma may?” Y-Hasael lah: “Y-Êlisê mbơh ma gâp pô aơ nanê̆ may mra bah ji.”

¹⁵ Ƀiălah ôi taơ, Y-Hasael sŏk phôi mbŭk ma dak jêh ri nkŭm ta muh măt Y-Ben-Hadat kŏ tât hađăch khĭt. Jêh nây Y-Hasael chiă uănh thoi ntrok păng.

Y-Jôram ƀư hađăch Yuđa

¹⁶ Năm rơh prăm rnôk rô̆ Y-Jôram chiă uănh, kon Y-Ahap, hađăch Israel, tơlah Y-Jôsaphat hôm ƀư hađăch Yuđa, Y-Jôram kon Y-Jôsaphat, ntơm chiă uănh.

¹⁷ Y-Jôram ntơm jêng hađăch nôk geh pe jât ma bar năm, jêh ri chiă uănh pham năm ta ƀon Yêrusalem.

¹⁸ Păng hăn tĭng ndô̆ trong phung hađăch Israel, nâm bu ngih Y-Ahap hŏ ƀư jêh; yorlah păng sŏk kon bu ur Y-Ahap jêng ur păng. Păng ƀư nau mhĭk tanăp măt Brah Yêhôva.

¹⁹ Ƀiălah yor Y-Đavit oh mon Brah Yêhôva, rĭ dĭng Păng mâu ŭch ƀư rai ôh phung Yuđa, tĭng nâm nau Păng hŏ ton ma Y-Đavit gay prăp ma păng du mlâm ŭnh kađen tanăp măt păng kŏ tât ƀaƀơ n'ho ro.

²⁰ Tâm rnôk rô̆ Y-Jôram chiă uănh, phung Êđôm dâk tâm rdâng đah phung Yuđa, jêh ri njêng ma khân păng nơm du huê hađăch.

²¹ Nôk nây, Y-Jôram hăn ta ƀon Sar ndrel ma lĕ rngôch ndeh seh păng. Păng dâk hăn dôl măng, păng dâk hăn, tâm lơh đah phung tahan Êđôm lĕ gŭ nchueng jêh păng jêh ri phung kôranh ndeh seh, ƀiălah phung tahan păng nchuăt rklaih sĭt ma ngih khân păng.

²² Pônây, phung Êđôm dâk tâm rdâng jêh ri mâu hôm tông bâr phung Yuđa kŏ tât ta nar aơ. Rnôk nây ƀon Lipna dâk đŏng tâm rdâng.

²³ Mâu di hĕ lĕ nau kan êng Y-Jôram, jêh ri lĕ rngôch nau păng ƀư, bu hŏ nchih da dê tâm ndrom samƀŭt nau rêh jêng ma phung hađăch Yuđa lĕ?

²⁴ Y-Jôram khĭt hăn ndrel ma phung chô yau păng jêh ri bu tâp păng ndrel ma khân păng tâm ƀon Đavit. Y-Ahasia, kon bu klâu păng, gŭ ta sưng hađăch chiă uănh ntrok păng.

Y-Ahasia ƀư hađăch Yuđa

²⁵ Tâm năm rơh jât ma bar, rnôk rô̆ Y-Jôram chiă uănh, kon bu klâu Y-Ahap, hađăch Israel, Y-Ahasia kon bu klâu Y-Jôram hađăch Yuđa, ntơm chiă uănh.

²⁶ Y-Ahasia ntơm jêng hađăch nôk bar jât ma bar năm, jêh ri păng chiă uănh du năm tâm Yêrusalem. Mê̆ păng amoh jêng H'Athali, jêng sau bu ur Y-Ômri, hađăch Israel.

²⁷ Păng ăt hăn tĭng trong ndô̆ ngih Y-Ahap, ƀư nau mhĭk tanăp măt Brah Yêhôva, nâm bu ngih Y-Ahap hŏ ƀư jêh. Yorlah păng jêng klay ma ngih Y-Ahap.

²⁸ Păng hăn ndrel ma Y-Jôram, kon bu klâu Y-Ahap, gay tâm lơh đah Y-Hasael, hađăch Aram, ta Ramôt-Gilêat. Ƀiălah phung tahan Aram ƀư sôt rmanh Y-Jôram.

²⁹ Pônây, hađăch Jôram plơ̆ sĭt ta Jesrêel gay săm lĕ sôt rmanh phung tahan Aram ƀư ma păng ta Rama, rnôk păng tâm lơh đah Y-Hasael, hađăch Aram. Y-Ahasia kon bu klâu Y-Jôram, hađăch Yuđa hăn jŭr ta Jesrêel gay khâl Y-Jôram, kon Y-Ahap, dôl hôm păm nau ji ta nây.