II Phung Hađăch 7 - Nau Brah Ndu Ngơi 2023

Nau tâm rklaih Samari

¹ Y-Êlisê lah: “Iăt hom nau Brah Yêhôva! Brah Yêhôva lah kơt aơ: ‘Nar ôi taơ, di mông aơ, ta mpông ƀon Samari, pơh lit rnih môi bu mra tăch jât ma nguay gram prăk, jêh ri jât ma puăn lit ba ôrgơ mra tăch jât ma nguay gram prăk.’”

² Kôranh tahan rgong kơl, jêng nơm hađăch nsing tâm ti păng, plơ̆ lah ma bunuyh Brah Ndu pô aơ: “Nđâp tơlah Brah Yêhôva geh pơk lĕ mpông bloh klơ trôk, nau nây dơi tât lĕ?” Y-Êlisê plơ̆ lah: “Măt may nơm ro yơh saơ nau nây, ƀiălah may mâu mra sa ndơ nây ôh.”

³ Nôk nây, ta ntŭk lăp mpông ƀon geh puăn nuyh phŭng sa. Khân păng lah ndrăng khân păng: “Mâm ƀư he gŭ ta aơ kâp khĭt?

⁴ Tơlah lăp tâm ƀon he mra khĭt ji ngot ta nây, yorlah tâm ƀon geh nau ji ngot toyh; bi tơlah gŭ ta aơ, he mra khĭt. Pôri aƀaơ, he hăn rlet ma pôih phung tahan Aram jêh ri hăn lăp mpeh khân păng. Tơlah khân păng ăn ma he gŭ rêh, pôri he mra rêh, jêh ri tơlah khân păng nkhĭt he, pôri he mra khĭt dơm.”

⁵ Tâm nôk ƀhit rvi ang, phung phŭng hăn trong tât ta pôih phung tahan Aram. Ƀiălah dôl tât jêh ta bôk pôih tahan, khân păng mâu saơ bunuyh gŭ ta nây.

⁶ Yorlah Kôranh Brah hŏ ƀư ăn ma phung tahan Aram tăng nteh ndeh seh, nteh seh jêh ri nteh du phung tahan toyh ngăn, pôri khân păng lah ndrăng khân păng pô aơ: “Aơ, hađăch Israel hŏ manh phung hađăch Hitit jêh ri Êjipt gay văch lơh he.”

⁷ Yor nây khân păng dâk ro jêh ri nchuăt du dôl nsrŭp rŭp măng, chalơi lĕ ngih bok, seh jêh ri seh bri. Khân păng chalơi pôih hôm e ta nây jêh ri nchuăt du rklaih nau rêh khân păng.

⁸ Tơlah phung geh phŭng tât ta bôk dŭt pôih tahan, khân păng lăp tâm du pôih sa jêh ri nhêt, jêh nây khân păng sŏk prăk, mah, jêh ri kho ao leo pôn lơi ndơ nây. Khân păng plơ̆ tay, lăp tâm du pôih êng jêh ri sŏk đŏng drăp ndơ ta nây hăn pôn lơi ndơ nây đŏng.

⁹ Nôk nây, khân păng tâm lah ndrăng khân păng: “He ƀư mâu di ôh. Nar aơ jêng nar geh nau mhe mhan ueh, mâm he dơi gŭ rklăk! Tơlah he kâp tât ƀhit rvi ang, nanê̆ nau tâm rmal mra tât ma he. Pôri, aƀaơ he hăn hom mbơh nau aơ ma ngih hađăch.”

¹⁰ Khân păng hăn ro, kuăl phung tahan gak mpông ƀon, jêh ri mbơh nau nây: “Hên geh hăn tât ta pôih tahan phung Aram, mâu saơ du huê gŭ ta nây jêh ri ăt mâu tăng nteh n'găr lĕ. Hên knŏng saơ phung seh jêh ri seh bri hôm kât ta n'gâng, bi lĕ ngih bok chalơi ăt hôm nâm bu saơm.”

¹¹ Phung tahan gak mpông pêr kuăl bunuyh hăn mbơh nau aơ lăp tâm ngih hađăch.

¹² Dôl măng hađăch dâk, lah ma phung oh mon păng nơm: “Gâp mra mbơh ma khân may moh nau phung tahan Aram tâm nal ƀư gay ƀư mhĭk ma he. Khân păng gĭt ma he ji ngot. Yor nây khân păng du luh jêh tă bơh pôih tahan gay gŭ kâp tâm mir. Khân păng gŭ mĭn: ‘Tơlah phung Israel luh tă bơh ƀon, he mra nhŭp rêh khân păng, jêh nây khân păng mra lăp pit sŏk ƀon.’”

¹³ Du huê tâm phung oh mon hađăch lah: “Dăn ma may ntrŭnh ma bar pe bunuyh sŏk prăm mlâm tâm phung seh hôm e hăn n'hut uănh gay gĭt nanê̆. Lah mâu khân păng mra khĭt nâm bu phung ƀon lan Israel hôm e khĭt mbrơi tâm ƀon dơm.”

¹⁴ Pônây, khân păng sŏk bar bôk ndeh jêh ri kât seh lăp, jêh nây hađăch prơh khân păng hăn tĭng phung tahan Aram jêh ri lah: “Hăn uănh hom mâm nau!”

¹⁵ Khân păng hăn tĭng phung tahan Aram kŏ tât ta dak krong Yurdan. Dôl tâm du njăr trong nây, khân păng saơ bêng ma kho ao jêh ri ndô ndơ phung tahan Aram mƀăr lơi tâm nôk nchuăt du. Phung prơh hăn plơ̆ sĭt jêh ri mbơh ma hađăch.

¹⁶ Phung ƀon lan hăn luh ro jêh ri sŏk pit lĕ ndô ndơ tâm pôih phung tahan Aram. Yor ri pơh lit rnih môi tăch jât ma nguay gram prăk, jêh ri jât ma puăn lit ba ôrgơ tăch đŏng jât ma nguay gram prăk, di tĭng nâm nau Brah Yêhôva ngơi jêh.

¹⁷ Nôk nây, hađăch ntĭnh jêh ma kôranh rgong kơl jêng nơm păng nsing, chiă uănh mpông ƀon. Phung ƀon lan jot mpet păng khĭt ta mpông ƀon, di nâm nau bunuyh Brah Ndu hŏ lah lor jêh nôk hađăch hăn mâp păng.

¹⁸ Di ngăn, tơlah bunuyh Brah Ndu hŏ ngơi ma hađăch pô aơ: “Nar ôi taơ, ta mông aơ, ta mpông ƀon Samari, jât ma puăn lit ba ôrgơ mra tăch jât ma nguay gram prăk, jêh ri pơh lit rnih môi tăch đŏng jât ma nguay gram prăk,”

¹⁹ jêh nây kôranh rgong kơl plơ̆ lah bunuyh Brah Ndu pô aơ: “Nđâp tơlah Brah Yêhôva geh pơk lĕ mpông bloh klơ trôk, nau nây dơi tât lĕ?” Y-Êlisê lah: “Măt may nơm mra saơ nau nây, ƀiălah may mâu mra sa ndơ nây ôh.”

²⁰ Jêh ri nau nây hŏ tât ma kôranh nây di nâm kơt nĕ, phung ƀon lan jot păng khĭt ta mpông ƀon.