II Phung Hađăch 6 - Nau Brah Ndu Ngơi 2023

Măt sung nđông klơ mpiăt dak

¹ Phung oh mon ma phung nơm mbơh lor lah ma Y-Êlisê: “Uănh hom, ntŭk hên gŭ iăt nau may ntĭm nti, rhăt ngăn ma hên.

² Dăn ăn hên hăn tât ma kơh dak krong Yurdan, gay ăp nơm mra kăl du tơm si, jêh nây ƀư du ntŭk gŭ ma he.” Y-Êlisê plơ̆ lah: “Hăn hom!”

³ Du huê oh mon lah: “Dăn ma may hăn ndrel ma phung oh mon may.” Păng lah: “Gâp mra hăn.”

⁴ Pôri păng hăn ndrel ma khân păng. Tơlah tât ta kơh dak krong Yurdan, khân păng ntơm kăl tơm si.

⁵ Ƀiălah geh du huê dôl kăl tơm si, măt sung păng tŭp tâm dak. Păng nter huy: “Hơi, kôranh gâp! Sung nây gâp manh ndơ bu.”

⁶ Bunuyh Brah Ndu lah: “Mbah ntŭk păng tŭp?” Păng nchŏng ntŭk sung nây tŭp. Y-Êlisê koh du gâl tơm si mƀăr tŭp ntŭk nây, ƀư ma măt sung nđông klơ.

⁷ Păng lah ma nơm nây: “Djôt hom!” Nơm nây yơr ti jêh ri djôt sŏk sung nây.

Phung tahan Aram chieh măt

⁸ Nôk nây, hađăch Aram tâm lơh đah phung Israel. Hađăch tâm chră ndrel ma phung kôranh tahan păng: “Gâp mra ƀư pôih rmlak ta ntŭk aơ, ta ntŭk ri.”

⁹ Bunuyh Brah Ndu njuăl bunuyh hăn lah ma hađăch Israel: “Njrăng hom, lơi hăn rgăn prot ntŭk aơ ôh, yorlah phung tahan Aram dôl hăn trŭnh ta nây.”

¹⁰ Pônây, hađăch Israel prơh bunuyh hăn tât ma ntŭk bunuyh Brah Ndu hŏ mbơh ma păng, jêh ri njrăng ta lĕ ntŭk nây. Y-Êlisê vay mbơh lor kơt nĕ, mâu di knŏng du tơ̆ mâu lah bar tơ̆.

¹¹ Nau nây ƀư ma hađăch Aram uh ah ngăn tâm nau mĭn, pôri păng kuăl phung oh mon păng jêh ri lah: “Khân may mra tâm mpơl lĕ ma gâp, mbu nơm tâm phung he gŭ mpeh ma hađăch Israel?”

¹² Du huê tâm phung oh mon păng lah: “Hơi hađăch jêng kôranh gâp, mâu geh tâm hên ôh. Ƀiălah Y-Êlisê, nơm mbơh lor phung Israel, ăn ma hađăch Israel gĭt lĕ nau may ngơi tâm jrô may bê̆ch.”

¹³ Hađăch lah: “Hăn hom joi uănh ta ntŭk păng gŭ, gay ma gâp prơh bunuyh hăn nhŭp păng.” Geh bu nkoch ma hađăch gĭt: “Păng gŭ tâm ƀon Dôthan.”

¹⁴ Yor nây, păng prơh hăn tât ta nây du phung tahan ktang ndrel ma seh jêh ri ndeh seh. Khân păng tât ntŭk nây dôl măng jêh ri nchueng jŭm ƀon nây.

¹⁵ Phung oh mon bunuyh Brah Ndu kah rngăl ơm ôi jêh ri hăn luh du padih, saơ du phung tahan ndrel ma seh jêh ri ndeh seh dôl nchueng jŭm ƀon. Păng lah đah Y-Êlisê: “Hơi kôranh gâp! Mâm he mra ƀư?”

¹⁶ Păng lah: “Lơi klach ôh, yorlah phung gŭ ndrel he jêng âk lơn ma phung gŭ ndrel ma khân păng.”

¹⁷ Jêh nây Y-Êlisê mbơh sơm: “Hơi Brah Yêhôva, dăn ma may pơk măt ma oh mon gâp, gay păng dơi saơ.” Brah Yêhôva pơk măt oh mon nây, jêh nây păng dơi saơ klơ yôk bêng ma seh jêh ri ndeh seh ma ŭnh dôl gŭ jŭm Y-Êlisê.

¹⁸ Nôk phung tahan Aram n'hoch trŭnh rlet ma ntŭk Y-Êlisê, păng mbơh sơm ma Brah Yêhôva pô aơ: “Dăn ma Kôranh Brah ƀư ăn ma phung tahan aơ ma nau chieh măt.” Păng ƀư ăn phung nây ma nau chieh măt tĭng nâm nau Y-Êlisê mbơh sơm.

¹⁹ Y-Êlisê lah ma khân păng: “Aơ mâu di trong ôh, jêh ri mâu di ƀon lĕ. Tĭng ndô̆ hom gâp, gâp mra njŭn leo khân may tât bunuyh khân may ŭch joi.” Jêh nây păng leo khân păng tât ta ƀon Samari.

²⁰ Tơlah khân păng lĕ tât jêh tâm trôm ƀon Samari, Y-Êlisê mbơh sơm: “Hơi Brah Yêhôva, dăn pơk măt ma phung bunuyh aơ gay khân păng dơi saơ.” Brah Yêhôva pơk măt khân păng, jêh ri khân păng saơ khân păng nơm dôl gŭ ta nklang ƀon Samari.

²¹ Tơlah saơ khân păng, hađăch Israel ôp ma Y-Êlisê: “Hơi mbơ̆, dơi lĕ gâp nkhĭt lơi khân păng? Dơi lĕ gâp nkhĭt lơi khân păng?”

²² Y-Êlisê plơ̆ lah: “Lơi nkhĭt khân păng ôh! May mra nkhĭt lĕ ma phung may dŏng ma tak đao jêh ri hăr na ƀư ăn jêng bu nă? Rep ndrăp hom piăng let jêh ri dak ma khân păng sa jêh ri nhêt, jêh nây ăn ma khân păng plơ̆ sĭt ma kôranh khân păng.”

²³ Pônây hađăch rep ndrăp ndơ sông sa toyh ăn ma khân păng. Tơlah khân păng sông sa nhêt lôch jêh, hađăch mƀơk khân păng plơ̆ sĭt ma kôranh khân păng nơm. Ntơm bơh nây phung tahan Aram mâu hôm hăn lơh ntŭng tâm n'gor Israel ôh.

Nau bu nchueng jŭm ƀon Samari

²⁴ Ƀiălah jŏ djê̆ pakơi, Y-Ben-Hadat, hađăch Aram tâm rƀŭn lĕ phung tahan păng n'hoch hao nchueng ƀon Samari.

²⁵ Yorlah ƀon lĕ bu nchueng jŏ nar jêh, pôri ta ƀon Samari tât geh nau ji ngot toyh ngăn kŏ tât du bôk seh bri bu tăch pham jât glo prăk, jêh ri du khăl jê̆ ek sĭm plŭk bu tăch prăm glo prăk.

²⁶ Dôl hađăch Israel hăn rgăn ta klơ mpêr ƀon, geh du huê bu ur nter ma păng: “Hơi hađăch jêng kôranh gâp, dăn kơl an gâp!”

²⁷ Hađăch plơ̆ lah: “Tơlah Brah Yêhôva mâu kơl ôh ay, mâm gâp dơi kơl ay? Hŏ hôm geh ndơ tă bơh ntŭk mprah ba mâu lah tă bơh ntŭk kĭn păt ndrănh krăk ƀâu?”

²⁸ Jêh nây hađăch ôp ma păng: “Moh nau ay geh?” Păng plơ̆ lah: “Bu ur aơ lah ma gâp: ‘Nar aơ djôt leo hom kon bu klâu ay văch ta aơ gay he sa puăch păng, jêh nây nar ôi taơ he mra sa puăch kon bu klâu gâp.’

²⁹ Pôri hên gâm kon bu klâu gâp jêh ri sa puăch păng. Ôi taơ, gâp geh lah ma păng: ‘Djôt leo hom kon ay văch ta aơ gay he sa puăch păng.’ Ƀiălah păng pôn lơi jêh kon bu klâu păng.”

³⁰ Tơlah hađăch tăng lĕ nau bu ur nây ngơi lôch jêh, păng nkhêk lơi ro bok ao păng nơm. Nôk nây, păng dôl hăn rgăn ta klơ mpêr ƀon, phung ƀon lan saơ, păng nsoh ao ƀau.

³¹ Hađăch sơm ton pô aơ: “Mbơh sơm Brah Ndu rmal gâp jâk ngăn, tơlah nar aơ bôk Y-Êlisê, kon Y-Saphat, hôm e klơ săng nglik păng.”

³² Tâm nôk Y-Êlisê dôl gŭ tâm ngih păng nơm nđâp ma phung kôranh bu ranh. Hađăch prơh du huê bunuyh tâm phung oh mon hăn joi păng. Ƀiălah êlor bunuyh mbơh nây tât, Y-Êlisê lah ma phung kôranh bu ranh: “Khân may saơ lĕ nơm nkhĭt bunuyh nây prơh bunuyh hăn tât gay koh trô ko gâp? Uănh hom, tơlah nơm mbơh văch tât, nchăng mpông hom jêh ri kuăn ăn nâp mpông, lơi ăn păng lăp ôh. Mâu di hĕ khân may mâu tăng nteh nhuat jâng kôranh păng groi pakơi păng?”

³³ Tâm nôk Y-Êlisê hôm e ngơi ndrel ma khân păng, bunuyh mbơh văch tât jêh ri lah ma păng: “Nau mhĭk aơ luh tă bơh Brah Yêhôva. Pôri, mâm ƀư gâp hôm kâp gân ma Brah Yêhôva?”