II Phung Hađăch 5 - Nau Brah Ndu Ngơi 2023

Y-Êlisê ƀư bah ji phŭng ma Y-Naaman

¹ Y-Naaman, kôranh chiă uănh ma phung tahan hađăch Aram, jêng du huê bunuyh geh nau ktang jêh ri geh nau yơk ngăn tanăp kôranh păng nơm, yorlah ma păng, Brah Yêhôva ăn nau dơi ma phung Aram. Nđâp tơlah păng jêng du huê tahan janh ktang, ƀiălah Y-Naaman geh ji phŭng.

² Nôk nây, phung tahan phung Aram hăn luh jêh ri nhŭp du huê bu ur druh rah tă bơh n'gor Israel djôt leo sĭt ƀư oh mon bu ur ma ur Y-Naaman.

³ Geh du nar, păng lah ma kôranh bu ur păng: “Ơ! Ueh lơn kôranh gâp hăn tât ma nơm mbơh lor gŭ ta ƀon Samari! Nơm nây mra sâm ƀư bah nau ji phŭng ma kôranh gâp.”

⁴ Y-Naaman nkoch lĕ nau ngơi nây ma kôranh păng pô aơ: “Oh mon bu ur bơh n'gor Israel geh lah kơt aơ, kơt aơ.”

⁵ Hađăch Aram lah: “Pôri may hăn hom, gâp mra njuăl samƀŭt ma hađăch Israel.” Pônây, Y-Naaman hăn, djôt leo ndrel păng pe rhiăng kilô prăk, prao rbăn prăk mah, jêh ri jât gu kho ao.

⁶ Păng djôt samƀŭt njuăl nây ma hađăch Israel. Tâm samƀŭt njuăl nây lah pô aơ: “Tơlah samƀŭt aơ njuăl tât jêh ma may, gâp hŏ prơh Y-Naaman, jêng oh mon gâp, văch ma may gay may ƀư bah nau ji phŭng ma păng.”

⁷ Tơlah jêh hađăch Israel răk samƀŭt nây lôch jêh, păng nkhêk ro bok ao păng jêh ri lah: “Păng prơh nơm văch ma gâp gay gâp ƀư bah ji phŭng. Gâp mâu di jêng Brah Ndu lĕ, dĭng dơi nkhĭt jêh ri ăn dâk rêh? Ăn khân may gĭt jêh ri saơ pô aơ păng joi nau gay ƀư jêr đah gâp.”

⁸ Tơlah Y-Êlisê, bunuyh Brah Ndu, tăng lư ma hađăch Israel hŏ nkhêk jêh ao păng, păng prơh bunuyh hăn lah ma hađăch: “Mâm ƀư may nkhêk ao may? Lah hom Y-Naaman văch ma gâp, gay ma păng mra gĭt tâm n'gor Israel geh du huê nơm mbơh lor.”

⁹ Pônây Y-Naaman văch tât ndrel ma seh jêh ri ndeh seh nsrâng ta mpông ngih Y-Êlisê.

¹⁰ Y-Êlisê prơh bunuyh mbơh gay lah ma păng: “Hăn ŭm hom pơh tơ̆ tâm dak krong Yurdan, nglay săk may mra bah, jêh ri may mra jêng kloh.”

¹¹ Ƀiălah Y-Naaman ji nuih, dâk sĭt jêh ri lah: “Gâp gŭ mĭn păng nơm mra hăn luh chuă vơt gâp jêh ri vơl dăn amoh Yêhôva Brah Ndu păng, yơr ti păng prot găn ta klơ ntŭk geh phŭng jêh ri ƀư bah ma gâp.

¹² Mâu hĕ geh bar dak krong ta ƀon Damas jêng Amana jêh ri Pharpar mâu ueh lơn ma lĕ rngôch dak tâm n'gor Israel? Gâp mâu dơi hĕ ŭm tâm dak krong ta nây jêh ri jêng kloh?” Pônây, păng ndôn kơi jêh ri ji nuih hâu ngăn hăn plơ̆ sĭt.

¹³ Ƀiălah phung oh mon păng văch êp păng, jêh ri lah: “Ơ mbơ̆, tơlah nơm mbơh lor geh ntĭnh ma may ƀư du nau jêr, mâm may mâu mra ƀư? Rlau lơn ma aƀaơ păng knŏng lah ma may: ‘Ŭm hom jêh ri jêng kloh!’”

¹⁴ Pônây, păng ntrŭnh tâm dak krong Yurdan, ŭm pơh tơ̆, tĭng nâm nau bunuyh Brah Ndu ngơi jêh. Păng jêng kloh ro jêh ri nglay săk păng plơ̆ tay nâm bu saơm, nâm bu nglay săk du huê kon se jê̆.

¹⁵ Y-Naaman ndrel ma lĕ phung hăn tĭng păng plơ̆ tay tâm mâp đah bunuyh Brah Ndu. Păng tât dâk panăp Y-Êlisê jêh ri lah: “Aƀaơ aơ, gâp gĭt năl lam klơ neh ntu, mâu geh ôh brah êng rlau lơn Brah Ndu phung Israel. Pônây, dăn ma may sŏk dơn hom ndơ nhhơr aơ bơh oh mon may.”

¹⁶ Ƀiălah Y-Êlisê lah: “Gâp sŏk amoh Brah Yêhôva gŭ rêh mro mrăng, jêng Nơm gâp pah kan, gay sơm ton pô aơ gâp mâu dơn du ntil ndơ ôh.” Y-Naaman bonh leng Y-Êlisê dơn ndơ nây, ƀiălah păng dun.

¹⁷ Nglĕ dŭt, Y-Naaman lah: “Tơlah may dun, dăn ma may ăn ma oh mon may djôt neh di ma suan bar mlâm seh bri dơi rdeng. Yorlah ntơm bơh aƀaơ, oh mon may mâu mra hôm ôh nhhơr ndơ ƀư brah gŭch jêh ri mpa ƀư brah ma brah êng ôh, ƀiălah knŏng ma Brah Yêhôva.

¹⁸ Ƀiălah dăn ma Brah Yêhôva yô̆ an ma oh mon may nau aơ: Ăp tơ̆ kôranh gâp lăp tâm ngih brah Rimôn gay yơk mbah ta nây, nsing ndăl ma ti gâp, pôri gâp ăt chon kômâk tâm ngih brah Rimôn. Pônây, dăn ma Brah Yêhôva yô̆ an nau nây ma oh mon may.”

¹⁹ Y-Êlisê plơ̆ lah: “Hăn hom ma nau đăp mpăn.” Tơlah Y-Naaman hŏ du bơh Y-Êlisê, hăn lĕ ƀah ngai jêh

Y-Gêhasi tưp ji phŭng

²⁰ oh mon Y-Êlisê, bunuyh Brah Ndu, jêng Y-Gêhasi mĭn tâm nuih n'hâm: “Aơ, kôranh gâp hŏ njrăng jêh mâu ŭch dơn ôh ndơ Y-Naaman, bunuyh Aram, bơh ti păng nơm djôt tât. Gâp sŏk amoh Brah Yêhôva gŭ rêh mro mrăng gay sơm ton pô aơ gâp mra nchuăt tĭng Y-Naaman gay sŏk dơn ndơ păng!”

²¹ Pônây Y-Gêhasi nchuăt tĭng pakơi Y-Naaman. Tơlah Y-Naaman saơ Y-Gêhasi nchuăt tĭng pakơi păng nơm, păng jŭr bơh ndeh seh, gay tâm mâp đah nơm nây, jêh ri ôp: “Lĕ rngôch nau jêng nau đăp mpăn lĕ?”

²² Y-Gêhasi plơ̆ lah: “Lĕ rngôch nau jêng nau đăp mpăn. Kôranh gâp prơh gâp hăn lah ma may: ‘Ndơh nơh, geh bar hê phung bu klâu ndăm, jêng oh mon phung nơm mbơh lor, tă bơh n'gor klơ dor yôk Êphraim văch tât. Gâp dăn ma may ăn ma khân păng pe jât kilô prăk jêh ri bar gu kho ao.’”

²³ Y-Naaman sŏl dăn: “Dăn ma may maak sŏk dơn prao jât kilô prăk.” Jêh nây păng sŏk prao jât kilô prăk jêh ri bar gu kho ao tâm dŭng, jao ma bar hê oh mon păng djôt leo tât tanăp Y-Gêhasi.

²⁴ Tơlah hăn tât jêh ta dor yôk, Y-Gêhasi sŏk lơi bar dŭng nây tă bơh ti khân păng, djôt prăp tâm ngih păng nơm, jêh ri păng ăn phung nây hăn sĭt.

²⁵ Y-Gêhasi lăp kơl kan ma kôranh păng, Y-Êlisê ôp: “Hơi Y-Gêhasi, mbah ntŭk may hăn ndơh?” Păng plơ̆ lah: “Oh mon may mâu geh ntŭk hăn ôh.”

²⁶ Ƀiălah Y-Êlisê lah ma păng: “Tơlah bu klâu nây jŭr tă klơ ndeh seh gay hăn chuă may, mâu di hĕ huêng gâp hăn ndrel may? Aƀaơ aơ, di lĕ jêng mông, hŏ sŏk dơn prăk, kho ao, đang play ôlive, đang krăk ƀâu, biăp, ndrôk, oh mon bu klâu jêh ri oh mon bu ur?

²⁷ Yor ri, ji phŭng Y-Naaman mra tưp ma may jêh ri ma phung kon sau may n'ho ro.” Y-Gêhasi luh tă bơh Y-Êlisê, jêh ri tưp ji phŭng nglang nâm bu pler.