II Phung Hađăch 4 - Nau Brah Ndu Ngơi 2023

Y-Êlisê njêng dak ngi ôlive âk ngăn

¹ Nôk nây, ur du huê tâm phung oh mon phung nơm mbơh lor vơl ma Y-Êlisê: “Sai gâp jêng oh mon may lĕ khĭt jêh, jêh ri may gĭt jêh ma oh mon may klach yơk jêh ma Brah Yêhôva. Aƀaơ aơ, nơm tơm rnon văch gay nhŭp lơi bar hê kon bu klâu gâp gay ƀư dĭk.”

² Y-Êlisê lah ma păng: “Moh ndơ gâp mra ƀư ma ay? Mbơh ma gâp gĭt, moh ndơ ay hôm geh tâm ngih?” Păng lah: “Oh mon bu ur may mâu hôm geh ndơ ôh tâm ngih, knŏng du yăng jê̆ geh dak ngi ôlive.”

³ Păng lah tay: “Hăn manh hom lĕ yăng nsoih phung chiau meng ay, lơi manh ôh djê̆.

⁴ Tơlah plơ̆ sĭt, ay jêh ri phung kon ay hăn lăp ndrel hom tâm ngih, nchăng mpông, jêh nây nkhŭt dak ngi ôlive tâm lĕ rngôch yăng nây; yăng lĕ bêng jêh, ăn ay prăp êng du ntŭk.”

⁵ Păng tâm nkhah đah nơm mbơh lor. Jêh nau nây, păng jêh ri phung kon păng lăp tâm ngih, nchăng mpông. Khân păng djôt leo yăng tât ma păng troch dak ngi ôlive.

⁶ Tơlah lĕ rngôch yăng lĕ bêng dak ngi jêh, păng lah ma kon bu klâu păng: “Djôt ma gâp du yăng êng đŏng.” Ƀiălah păng plơ̆ lah: “Mâu hôm geh yăng êng ôh.” Dak ngi ôlive nây mâu hôm truh ôh.

⁷ Nôk nây, păng hăn nkoch ma bunuyh Brah Ndu. Păng lah: “Djôt leo hom dak ngi ôlive hăn tăch jêh ri mplơ̆ rnon ay, jêh nây ay jêh ri phung kon ay mra sŏk dak ngi ôlive hôm e nây siăm nau rêh khân ay nơm.”

Y-Êlisê ƀư ăn du huê kon jê̆ bu ur Sunem dâk rêh tay

⁸ Du nar ri, Y-Êlisê hăn rlet ma Sunem. Ta nây geh du huê bu ur ndrŏng ngăn, jêh ri bu ur nây srôih jă păng gŭ sông sa. Ntơm bơh nây, ăp tơ̆ păng hăn rgăn trong nây, păng veh lăp ƀaƀơ ta ngih bu ur nây gay sông sa.

⁹ Bu ur nây lah ma sai păng: “Aơ, gâp gĭt ma nơm vay veh lăp ngih he jêng du huê bunuyh kloh ueh Brah Ndu.

¹⁰ He ƀư hom ma păng du jrô jê̆ prêh ta klơ chor, geh mpir; jêh nây n'gân ta nây du mlâm sưng bê̆ch, du mlâm sưng sông, du mlâm rnơl nsing, jêh ri du mlâm ŭnh kađen. Pôri, ăp tơ̆ păng tât ma ngih he păng mra gŭ ta nây.”

¹¹ Du nar, Y-Êlisê tât ta Sunem, lăp tâm jrô prêh klơ nây jêh ri rlu ta nây.

¹² Păng lah ma Y-Gêhasi, oh mon păng: “Kuăl hom bu ur ƀon Sunem văch ta aơ.” Y-Gêhasi hăn kuăl păng, jêh ri păng hăn tât dâk tanăp Y-Êlisê.

¹³ Y-Êlisê lah ma oh mon păng: “Lah hom ma păng: ‘Aơ, ay ƀư jêh lĕ kan dŭt jâk râng an ma hên. Pônây, moh ndơ hên ƀư ma ay? Moh nau ay ŭch hên ngơi an ma hađăch mâu lah ma kôranh chiă uănh ma phung tahan?’” Păng plơ̆ lah: “Gâp gŭ ta nklang phung ƀon lan gâp nơm.”

¹⁴ Y-Êlisê ôp tay: “Pônây, moh ndơ he mra ƀư ăn păng?” Y-Gêhasi plơ̆ lah: “Bu ur nây mâu geh du huê kon bu klâu ôh, ƀiălah sai păng lĕ ranh jêh.”

¹⁵ Y-Êlisê lah: “Hăn kuăl hom păng.” Y-Gêhasi hăn kuăl păng, jêh ri păng văch tât dâk ta padih mpông.

¹⁶ Y-Êlisê lah ma păng: “Năm pakơi taơ, tâm nôk aơ, ay mra chông ra-u du huê kon bu klâu.” Păng plơ̆ lah: “Mâu ôh, hơi kôranh jêng bunuyh Brah Ndu! Lơi ngơi mƀruh ma oh mon bu ur may ôh.”

¹⁷ Ƀiălah, bu ur nây ntreo jêh; jêh ri năm pakơi, ay deh du huê kon bu klâu, di tâm nôk Y-Êlisê hŏ lah lor jêh ma păng.

¹⁸ Kon se jê̆ nây văch ma toyh jêh. Du nar, păng hăn tât ma mbơ̆ păng ta ntŭk bu rek ba

¹⁹ jêh ri lah pô aơ: “Gâp ji bôk! Gâp ji bôk!” Mbơ̆ păng lah ma oh mon: “Djôt leo hom păng sĭt ăn mê̆ păng.”

²⁰ Oh mon păng chông păng sĭt jao ma mê̆ păng. Kon se jê̆ gŭ klơ kômâk mê̆ păng kŏ tât nklang bôk nar păng khĭt.

²¹ Me păng hao klơ sưng lâng păng ta sưng bê̆ch bunuyh Brah Ndu, jêh nây du luh padih, nchăng mpông.

²² Jêh nau nây, păng kuăl sai păng jêh ri lah: “Dăn ma may ăn ma gâp du huê oh mon jêh ri du mlâm seh bri me, gay gâp nchuăt tât ma bunuyh Brah Ndu, jêh nây gâp mra plơ̆ sĭt.”

²³ Sai păng ôp: “Nar aơ mâu di hĕ jêng nar năng nguay, mâu đŏng di jêng nar Saƀat. Pônây, mâm ƀư ay hăn mâp păng?” Păng plơ̆ lah: “May ăt gŭ đăp mpăn!”

²⁴ Păng dăp ưn seh bri jêh ri ntĭnh ma oh mon păng: “Ntrŭt hom seh bri hăn ngăch, knŏng tơlah gâp lah ri mơ may nsrŭng.”

²⁵ Pônây, bu ur nây hăn trong văch ma bunuyh Brah Ndu ta klơ yôk Karmel. Bunuyh Brah Ndu saơ păng ntơm bơh ngai, păng lah ma Y-Gêhasi, oh mon păng: “Ri, bu ur ƀon Sunem văch tât!

²⁶ Nchuăt hăn ran hom jêh ri ôp păng: ‘Ay geh nau đăp mpăn lĕ? Sai ay jêh ri kon se ay geh nau đăp mpăn lĕ?’” Păng plơ̆ lah: “Đăp mpăn.”

²⁷ Tơlah bu ur nây hăn mâp ma bunuyh Brah Ndu ta klơ yôk, bu ur nây ut kuăn ta jâng păng. Y-Gêhasi văch dăch gay mprơh lơi păng, ƀiălah bunuyh Brah Ndu lah: “Kđôi păng, yorlah nuih n'hâm păng geh nau rngot hâu ngăn; Brah Yêhôva hŏ pôn ma gâp nau nây, jêh ri mâu ăn ma gâp gĭt.”

²⁸ Nôk nây, bu ur nây lah: “Hơi kôranh, gâp geh dăn lĕ ma kôranh gâp gay ŭch geh du huê kon bu klâu? Mâu hĕ gâp hŏ lah: ‘Lơi ta ngơi mƀruh gâp’ ƀơh?”

²⁹ Y-Êlisê lah ma Y-Gêhasi: “Vân hom rse bŭt may, djôt leo mâng jra gâp tâm ti jêh ri hăn. Tơlah rŏ trong may mâp bu, lơi mbah; tơlah bu mbah may, lơi plơng tay. May mra dơm mâng jra gâp ta klơ muh măt kon se jê̆.”

³⁰ Ƀiălah mê̆ kon se jê̆ nây lah: “Gâp sŏk amoh Brah Yêhôva gŭ rêh mro mrăng, jêh ri sŏk amoh nau rêh may gay sơm ton pô aơ, gâp mâu mra du tă bơh may ôh.” Pôri, Y-Êlisê dâk jêh ri hăn tĭng ndô̆ păng.

³¹ Y-Gêhasi hăn lor panăp phung bar hê, jêh ri dơm mâng jra ta klơ muh măt kon se jê̆, ƀiălah mâu tăng nsôr, mâu lah nau mbên ma nau ŭch rêh ôh. Pônây păng plơ̆ sĭt chuă Y-Êlisê, jêh ri nkoch ăn păng: “Kon se jê̆ mâu kah rngăl ôh.”

³² Tơlah Y-Êlisê lăp tâm ngih saơ kon se jê̆ lĕ khĭt jêh, bê̆ch klơ sưng păng.

³³ Y-Êlisê lăp tâm jrô, nchăng mpông, knŏng geh păng jêh ri kon se jê̆, jêh nây gŭ mbơh sơm ma Brah Yêhôva.

³⁴ Jêh nau nây, păng hao klơ sưng bê̆ch dop ta klơ kon se jê̆, n'gân trôm mbung păng klơ trôm mbung kon se, jêh ri măt păng tâm klơ măt kon se, ti păng klơ ti kon se. Tơlah păng bê̆ch dop ta klơ kon se jê̆, jêh ri săk jăn păng răm plơ̆ tay.

³⁵ Y-Êlisê chuat jŭr, hăn rsong dâng lơ tâm trôm jrô; jêh nây hao đŏng klơ sưng bê̆ch, dop klơ kon se jê̆ du tơ̆ đŏng. Nglĕ dŭt, kon se jê̆ si đah pơh tơ̆, jêh ri păng lin măt.

³⁶ Y-Êlisê kuăl Y-Gêhasi jêh ri lah: “Hăn kuăl hom bu ur ƀon Sunem.” Y-Gêhasi hăn kuăl bu ur nây. Tơlah bu ur nây văch jêh, Y-Êlisê lah ma păng: “Chông hom kon bu klâu ay!”

³⁷ Bu ur nây văch dăch, chon mon ta jâng păng jêh ri mbah; jêh nây bu ur nây chông leo kon păng jêh ri hăn luh.

Nau mbên khlay Y-Êlisê ƀư tâm nau ji ngot toyh

³⁸ Y-Êlisê plơ̆ sĭt ma Gilgal. Nôk nây, tâm n'gor bri dôl geh nau ji ngot toyh. Phung oh mon phung nơm mbơh lor dôl gŭ panăp Y-Êlisê. Păng lah ma phung oh mon păng: “Sŏk hom glah ƀŭng toyh, gâm trao ăn ma phung oh mon phung nơm mbơh lor sa.”

³⁹ Du huê tâm phung khân păng hăn luh tâm mir gay pĕ trau, saơ du rse rtau tâm krŏng tâm ban ma play krăk ƀâu bri, pĕ lĕ play rpŭng bri nây, djôt leo bêng ntôr ao păng nơm. Tơlah păng plơ̆ sĭt, siăt jêng âk glo, dơm tâm glah ƀŭng ƀư trau ƀiălah mâu gĭt ôh nây jêng moh play.

⁴⁰ Khân păng sŏk trau ăn lĕ rngôch bunuyh sa. Ƀiălah dôl khân păng mhe gŭ sa trau nây, khân păng nter: “Hơi bunuyh Brah Ndu, tâm glah ƀŭng nây geh nau kăch nkhĭt bunuyh!” Jêh ri khân păng mâu dơi sa ôh ndơ nây.

⁴¹ Y-Êlisê lah: “Djôt leo hom rnih môi tât ta aơ!” Păng nkhŭt rnih môi tâm glah ƀŭng jêh ri lah: “Sŏk hom ăn ma lĕ rngôch bunuyh sa.” Pônây, biăp tâm glah ƀŭng mâu hôm geh nau kăch ôh.

Y-Êlisê njêng piăng let ma du rhiăng bunuyh sa

⁴² Du huê bu klâu văch tă bơh Baal-Salisa, djôt leo ma bunuyh Brah Ndu piăng let bu ƀư ma play dak bôk, geh bar jât mpơng piăng let ba ôrgơ, jêh ri ba hôm nkong tâm ƀau păng. Y-Êlisê lah: “Ăn hom ma lĕ rngôch bunuyh sa.”

⁴³ Oh mon păng lah: “Mâm ƀư gâp pă ndơ nây ma du rhiăng bunuyh sa?” Ƀiălah Y-Êlisê lah: “Pă hom lĕ piăng let nĕ ma khân păng sa, yorlah Brah Yêhôva lah: ‘Khân păng mra sa jêh ri hôm rmeh.’”

⁴⁴ Pôri, oh mon păng pă piăng let nây ma lĕ rngôch bunuyh. Khân păng sa jêh ri hôm rmeh, di nâm nau Brah Yêhôva ngơi jêh.