II Phung Hađăch 3 - Nau Brah Ndu Ngơi 2023

Y-Jôram chiă uănh phung Israel

¹ Tâm năm rơh jât ma pham rnôk rô̆ Y-Jôsaphat, hađăch Yuđa chiă uănh, Y-Jôram, kon Y-Ahap, hao ƀư hađăch Israel ta Samari jêh ri chiă uănh tâm jât ma bar năm.

² Hađăch ƀư nau mhĭk tanăp măt Brah Yêhôva, ƀiălah mâu di ôh nâm bu mbơ̆ jêh ri mê̆ păng, yorlah hađăch hŏ mƀăr lơi meh lŭ mbah brah Baal, ndơ mbơ̆ păng hŏ ndâk jêh.

³ Nđâp tơlah pônây, hađăch ăt hôm djôt prăp nau tih Y-Jêrôbôam, kon bu klâu Y-Nêbat, jêng nau tih nsŭk phung Israel ƀư tih. Hađăch mâu ŭch chalơi ôh nau tih nây.

Y-Jôram jêh ri Y-Jêhôsaphat tâm lơh đah phung Môap

⁴ Nôk nây Y-Mêsa, hađăch n'gor Môap rong âk biăp jêh ri păng chê̆ pi ma hađăch Israel du rsen mlâm biăp kon, jêh ri rsau du rsen mlâm biăp nkuăng.

⁵ Tơlah hađăch Ahap khĭt, hađăch Môap dâk tay tâm rdâng đah hađăch Israel.

⁶ Nôk nây, hađăch Jôram luh du bơh Samari, rgum lĕ rngôch phung Israel.

⁷ Păng prơh đŏng phung mbơh hăn ma Y-Jôsaphat, hađăch Yuđa, pô aơ: “Hađăch Môap hŏ dâk tâm rdâng jêh đah gâp, may ŭch ndrel ma gâp hăn tâm lơh đah phung Môap lĕ?” Y-Jôsaphat plơ̆ lah: “Gâp mra hăn. Gâp jêng nâm bu may, phung ƀon lan gâp jêng nâm bu phung ƀon lan may, seh tâm lơh gâp jêng nâm bu seh tâm lơh may lĕ.”

⁸ Jêh nây hađăch ôp: “Mbah trong he mra hăn?” Y-Jôram plơ̆ lah: “Tĭng trong bri rdah Êđôm.”

⁹ Pônây, hađăch Israel, hađăch Yuđa jêh ri hađăch Êđôm leo phung tahan khân păng hăn. Khân păng hăn ndăch jêh pơh nar trong, mâu hôm geh dak ôh ma phung tahan jêh ri ma mpô mpa rong hăn tĭng ndô̆ khân păng.

¹⁰ Hađăch Israel lah: “Hơi! Brah Yêhôva hŏ kuăl jêh pe nuyh hađăch aơ gay jao khân păng tâm ti phung Môap!”

¹¹ Ƀiălah Y-Jôsaphat ôp: “Mâu geh hĕ nơm mbơh lor Brah Yêhôva ta aơ, bơh păng he dơi ôp ma Brah Yêhôva?” Du huê oh mon hađăch Israel plơ̆ lah: “Ta aơ geh Y-Êlisê, kon bu klâu Y-Saphat, jêng nơm hŏ pah kan ma Y-Êli.”

¹² Y-Jôsaphat lah: “Păng geh nau Brah Yêhôva ngơi.” Pônây, hađăch Israel, Y-Jôsaphat, jêh ri hađăch Êđôm hăn trŭnh mâp Y-Êlisê.

¹³ Y-Êlisê lah ma hađăch Israel: “Moh nau gâp geh đah may? Hăn ôp hom ma phung nơm mbơh lor mbơ̆ may jêh ri phung nơm mbơh lor mê̆ may.” Ƀiălah hađăch Israel plơ̆ lah: “Mâu ôh. Yorlah Brah Yêhôva yơh kuăl jêh pe nuyh hađăch hên văch gay jao ma ti phung Môap.”

¹⁴ Y-Êlisê lah: “Tanăp măt Brah Yêhôva ma phung tahan gŭ rêh mro mrăng, jêng Nơm gâp pah kan, gâp sơm ton pô aơ, tơlah mâu yơk chrê ôh ma Y-Jôsaphat, hađăch Yuđa, gâp mâu ŭch uănh ma may ôh jêh ri mâu ŭch saơ may đŏng.

¹⁵ Ƀiălah aƀaơ ri, njŭn leo ma gâp du huê blau kreh gong rêng.” Ăp tơ̆ nơm nây kreh gong rêng, ti Brah Yêhôva gŭ ta klơ Y-Êlisê.

¹⁶ Păng lah: “Brah Yêhôva lah kơt aơ: ‘Kuyh hom dŭt âk ntu lam tâm rlŭng aơ.’

¹⁷ Yorlah Brah Yêhôva lah: ‘Khân may mâu mra saơ sial, mâu đŏng saơ mih, ƀiălah tâm rlŭng aơ bêng ma dak ăn ma khân may, phung biăp, nđâp mpô mpa rong khân may, mra dơi nhêt dak da dê.’

¹⁸ Ƀiălah nau aơ knŏng jêng nau jê̆ tanăp măt Brah Yêhôva. Păng mra jao phung Môap tâm ti khân may tâm ban lĕ.

¹⁹ Khân may mra dơi ma lĕ rngôch ƀon geh pôih nâp, jêh ri lĕ rngôch ƀon ueh lơn, kăl nchôt lơi lĕ rngôch tơm si ueh, nsêt lơi lĕ rngôch rmlông tu dak, jêh ri sŏk lŭ ƀư rai lĕ rngôch neh mir ueh.”

²⁰ Ang ôi taơ, di ta mông bu nhhơr ndơ ƀư brah, dak hoch luh tă bơh Êđôm, jêh ri lĕ n'gor bêng ma dak.

²¹ Tơlah phung Môap tăng lư ma phung hađăch nây leo phung tahan hăn tâm lơh đah khân păng, pôri lĕ rngôch phung mom ndăm nđâp phung bu ranh jêng phung djôt ndơ tâm lơh, bu kuăl khân păng lăp tâm phung tahan, jêh ri văch ta n'har.

²² Tơlah phung Môap kah rngăl ơm ôi, nchrat nar sol ang tâm dak, khân păng saơ dak tanăp măt khân păng nơm jêng chăng nâm bu mham,

²³ khân păng lah ndrel: “Aơ jêng mham yơh! Nanê̆ pe phung hađăch nây tâm lơh jêh ri nkhĭt jêh ndrăng khân păng nơm. Aƀaơ aơ, hơi phung Môap! Hăn sŏk hom ndô ndơ.”

²⁴ Ƀiălah dôl khân păng hăn tât ta pôih phung tahan Israel, phung Israel dâk, rduh lơh phung Môap, ƀư ăn phung Môap nchuăt du panăp khân păng. Phung tahan hăn lăp tâm n'gor, lơh nkhĭt phung Môap.

²⁵ Khân păng dơi geh âk rplay ƀon, jêh ri ăp nơm klŭp srih lŭ ta lĕ rngôch mir ueh kŏ tât brôi ma lŭ; khân păng nsêt lơi lĕ rngôch rmlông tu dak, jêh ri kăl lơi lĕ rngôch tơm si ueh, kŏ tât hôm e knŏng êng lŭ dơm tâm ƀon Kir-Harêset, jêh ri klŭp đŏng lŭ ma rse ntâu nchueng jŭm jêh ri ƀư rai ma ƀon nây.

²⁶ Tơlah hađăch Môap saơ păng mâu klăp dơi rdâng, păng djôt leo ndrel ma păng pơh rhiăng bunuyh djôt đao, tâm nal hăn lơh ma hađăch Êđôm gay klaih săk jăn, ƀiălah khân păng mâu dơi ôh.

²⁷ Rnôk nây, hađăch Môap sŏk ro kon bu klâu păng bôk rah, jêng nơm mra gŭ ta sưng hađăch chiă uănh thoi ntrok păng, nhhơr jêng ndơ ƀư brah gŭch ta klơ mpêr ƀon. Phung Israel krit toyh ngăn, khân păng du bơh hađăch Môap jêh ri plơ̆ sĭt bri khân păng nơm.