II Phung Hađăch 25 - Nau Brah Ndu Ngơi 2023

Bu nchueng jŭm ƀon Yêrusalem jêh ri roh nau dơi

¹ Tâm năm rơh sĭn rnôk rô̆ hađăch Sêdêkia chiă uănh, lơ jât khay jât, Nêbukatnetsar, hađăch Babilôn, ndrel ma lĕ rngôch phung tahan hăn văch tâm lơh ƀon Yêrusalem. Hađăch ƀư pôih rmlak tanăp ƀon nây jêh ri ntâk ntŭk tâm lơh văr jŭm ƀon nây.

² Bu nchueng jŭm ƀon nây tât năm rơh jât ma nguay rnôk rô̆ chiă uănh hađăch Sêdêkia chiă uănh.

³ Ta nar sĭn khay nây, geh nau ji ngot hâu ngăn tâm ƀon jêng knap ngăn kŏ tât mâu geh piăng let sa ma phung ƀon lan tâm n'gor bri.

⁴ Nôk nây bu kuar trôm tâm mpêr ƀon. Dôl măng, lĕ rngôch phung tahan nchuăt du rŏ trong mpông pêr vah vang bar đah mpêr, dăch n'gar kao hađăch. Tơlah phung Kaldê dôl nchueng jŭm ƀon, hađăch Yuđa nchuăt du tĭng mpeh ma Arabah.

⁵ Phung tahan Kaldê hăn tĭng hađăch jêh ri tĭng ban păng tâm neh lâng Yêrikô. Lĕ rngôch phung tahan păng chalơi păng jêh ri nchuăt du pru.

⁶ Phung tahan Kaldê nhŭp hađăch, njŭn tât ma hađăch Babilôn ta ƀon Ribla. Ta nây, khân păng phat dôih Y-Sêdêkia.

⁷ Khân păng nkhĭt phung kon bu klâu Y-Sêdêkia tanăp măt păng. Jêh nây khân păng rloch lơi măt Y-Sêdêkia, nkông păng ma rse rvăk kông, jêh ri njŭn leo păng ma bri Babilôn.

Nau ƀư rai ngih brah

⁸ Tâm nar pơh tâm khay prăm, năm rơh jât ma sĭn rnôk rô̆ hađăch Nêbukatnetsar chiă uănh, hađăch Babilôn, kôranh phung tahan gak Y-Nêbusaradan, du huê oh mon hađăch Babilôn, tât tâm ƀon Yêrusalem.

⁹ Păng su rai ngih brah Brah Yêhôva, ngih hađăch, jêh ri lĕ rngôch ngih tâm ƀon Yêrusalem; păng su lĕ rngôch ngih phung ndrŏng.

¹⁰ Jêh nây phung tahan Kaldê tông bâr kôranh phung tahan gak ƀư rlâm mpêr ƀon jŭm Yêrusalem.

¹¹ Kôranh phung tahan gak Nêbusaradan njŭn leo phung ƀon lan hôm klen gŭ tâm ƀon, ndrel ma phung du ran lăp jêh ma hađăch Babilôn saơm, jêh ri ndrel ma lĕ rngôch phung ƀon lan hôm e, njŭn leo hăn ƀư bu nă.

¹² Kôranh phung tahan gak knŏng ăn tâm n'gor phung o ach lơn gay khân păng tăm đang krăk ƀâu jêh ri ƀư mir.

¹³ Phung tahan Kaldê dong nchah lĕ meh n'gâng kông, ndơl kông jêh ri drŏng dak kông tâm ngih Brah Yêhôva, jêh nây djôt leo kông nây rlet ma bri Babilôn.

¹⁴ Khân păng djôt leo đŏng lĕ glah ƀŭng kông, ndroh, pêh, kachok, jêh ri lĕ rngôch ndơ dŏng ma kông bu dŏng tâm kan yơk mbah.

¹⁵ Kôranh phung tahan gak sŏk đŏng jêh ri djôt leo lĕ khăl gŭch ndơ ƀâu kah, ngan grưng, jêh ri lĕ ndơ ma mah, ma prăk.

¹⁶ Bi ma bar mlâm meh n'gâng, drŏng dak kông, jêh ri lĕ ndơl ma kông hađăch Salômôn ƀư jêh ma ngih Brah Yêhôva, bu mâu dơi nhueh rnoh kông tâm lĕ ndơ nây, yorlah âk ir.

¹⁷ Ăp mlâm meh n'gâng prêh sĭn met, ta klơ meh n'gâng geh bôk meh ma kông prêh du met n'gul, geh blah dreh jêh ri play pom gra nat bu ƀư lĕ ndơ nây ma kông jŭm bôk. Meh n'gâng tal bar ƀư ueh ma blah dreh tâm ban ma meh ta lor.

¹⁸ Kôranh phung tahan gak nhŭp kôranh ƀư brah toyh lơn Y-Sêraya, kôranh ƀư brah groi Y-Sêphania, jêh ri pe bunuyh mât chiă mpông ngih brah;

¹⁹ nhŭp đŏng tâm ƀon du huê kôranh bu char nơm chiă uănh phung tahan tâm lơh, jêh ri prăm nuyh bu klâu phung nchră ma hađăch bu saơ tâm ƀon; jêh ri kôranh nchih samƀŭt ma kôranh phung tahan, nơm kơp phung ƀon lan tâm n'gor bri; jêh ri prao jât bunuyh ƀon lan tâm n'gor bu saơ tâm ƀon.

²⁰ Kôranh phung tahan gak Y-Nêbusaradan nhŭp jêh ri njŭn leo lĕ rngôch phung nây văch tât ma hađăch Babilôn, ta ƀon Ribla.

²¹ Hađăch Babilôn dong nkhĭt khân păng ta ƀon Ribla tâm n'gor Hamat. Pônây, bu nhŭp veng phung Yuđa tă bơh n'gor bri khân păng nơm.

Y-Gêdalia ƀư kôranh chiă uănh phung Yuđa

²² Bi ma phung ƀon lan Y-Nêbukatnetsar lĕ ăn gŭ tâm n'gor Yuđa, pôri hađăch Babilôn dơm Y-Gêdalia, kon bu klâu Y-Ahikam, sau Y-Saphan, jêng kôranh chiă uănh khân păng.

²³ Tơlah lĕ rngôch phung kôranh tahan jêng Y-Ismaêl, kon bu klâu Y-Nêthania; Y-Jôhanan, kon bu klâu Y-Karêa; Y-Sêraya, kon bu klâu Y-Tanhumet tâm ƀon Nêtôphat; Y-Jasania, kon bu klâu Y-Makatit, jêh ri phung tahan khân păng, gĭt da dê ma hađăch Babilôn hŏ dơm jêh Y-Gêdalia ƀư kôranh chiă uănh, pôri khân păng hăn tât ma păng ta ƀon Mispa.

²⁴ Y-Gêdalia sơm ton ma khân păng jêh ri ma phung tahan khân păng, lah: “Lơi klach ôh phung kôranh Kaldê. Gŭ hom tâm n'gor bri, tông bâr ma hađăch Babilôn ri mơ khân may mra geh nau đăp mpăn.”

²⁵ Ƀiălah khay pơh, Y-Ismaêl, kon bu klâu Y-Nêthania, sau Y-Êlisama bơh noi deh hađăch, djôt leo ndrel jât bunuyh tât ta ƀon Mispa lơh nkhĭt Y-Gêdalia, ndrel ma phung Yuđa jêh ri phung Kaldê gŭ ndrel păng.

²⁶ Lĕ rngôch phung kon se nđâp ma phung toyh, jêh ri phung kôranh tahan dâk hăn rlet ma Êjipt yorlah khân păng klach ma phung Kaldê plơng bôk.

Bu yô̆ an ma Y-Jêhôjakin

²⁷ Tâm nar bar jât ma pơh khay jât ma bar, năm rơh pe jât ma pơh ntơm bơh nar Y-Jêhôjakin, hađăch Yuđa, jêng bu nă, jêng năm Y-Êvil-Mêrôdak, hađăch Babilôn ntơm chiă uănh, hađăch nây yô̆ an ma Y-Jêhôjakin, hađăch Yuđa, njŭn leo luh bơh ndrung bu nă.

²⁸ Hađăch ngơi ueh ndrel ma hađăch Y-Jêhôjachin, jêh ri ăn sưng hađăch păng klơ lơn ma phung hađăch êng gŭ jêh ndrel ma păng tâm ƀon Babilôn.

²⁹ Hađăch Babilôn doh lơi ao ndrung Y-Jêhôjakin jêh ri ăn păng sông sa ta sưng sông hađăch lĕ rnôk rô̆ păng gŭ rêh.

³⁰ Ăp nar, hađăch Babilôn ƀơk pă ƀaƀơ kô̆ ndơ păng sông sa kŏ tât păng khĭt.