II Phung Hađăch 24 - Nau Brah Ndu Ngơi 2023

Nêbukatnetsar hăn lơh bri dak Yuđa

¹ Tâm rnôk Y-Jêhôjakim chiă uănh, hađăch Babilôn jêng Y-Nêbukatnetsar hăn lơh bri dak Yuđa. Y-Jêhôjakim, tông bâr hađăch tâm pe năm, jêh nây Y-Jêhôjakim mĭn plĕch jêh ri dâk tâm rdâng đah hađăch Babilôn.

² Brah Yêhôva ƀư ăn âk phung tahan Kaldê, Aram, Môap jêh ri phung tahan Ammôn văch lơh jêh ri ƀư rai n'gor Yuđa, tĭng nâm nau Brah Yêhôva ngơi lor ma bâr mbung phung nơm mbơh lor jêng phung oh mon Păng.

³ N'hêl nanê̆ nau mhĭk nây tât ngăn ma phung Yuđa tĭng nâm nau ntăm Brah Yêhôva, gay mprơh lơi bri dak Yuđa bơh tanăp măt Păng; yor lĕ nau tih Y-Manasê hŏ ƀư tih, yorlah lĕ nau păng hŏ ƀư jêh,

⁴ jêh ri yor păng hŏ ƀư pling đŏng mham phung mâu geh tih, ƀư ăn ma Yêrusalem bêng mham mâu tih, kŏ tât Brah Yêhôva mâu hôm yô̆ an ôh.

⁵ Mâu di hĕ lĕ kan êng Y-Jêhôjakim jêh ri lĕ nau păng hŏ ƀư jêh, bu hŏ nchih da dê jêh tâm ndrom samƀŭt nau rêh jêng ma phung hađăch Yuđa?

⁶ Y-Jêhôjakim khĭt hăn ndrel ma phung chô yau păng nơm; kon păng jêng Y-Jêhôjakin chiă uănh thoi ntrok păng.

⁷ Hađăch Êjipt mâu hôm du luh tă bơh n'gor bri păng ôh, yorlah hađăch Babilôn pit sŏk jêh lĕ rngôch n'gor jêng ndơ hađăch Êjipt, ntơm bơh dak n'hor Êjipt tât ma dak krong Ơphrat.

Y-Jêhôjakin chiă uănh. – Yuđa jêng bu nă tơ̆ tal nguay ta Babilôn

⁸ Y-Jêhôjakin ntơm jêng hađăch tơlah geh jât ma pham năm, jêh ri chiă uănh pe khay ta ƀon Yêrusalem. Amoh mê̆ păng jêng H'Nêhusta, kon bu ur Y-Êlnathan bơh Yêrusalem.

⁹ Păng ƀư nau mhĭk tanăp măt Brah Yêhôva tâm ban ma lĕ rngôch nau mbơ̆ păng hŏ ƀư jêh.

¹⁰ Tâm rnôk nây, phung tahan Nêbukatnetsar, hađăch Babilôn hăn hao nchueng jŭm ƀon Yêrusalem.

¹¹ Nêbukatnetsar, hađăch Babilôn, tâm ban lĕ văch lơh tâm ƀon dôl phung tahan păng nchueng jŭm ƀon.

¹² Y-Jêhôjakin, hađăch Yuđa, nđâp mê̆ păng, phung oh mon păng, phung kôranh tahan păng, jêh ri phung kôranh bu char, jao săk khân păng nơm ma hađăch Babilôn. Hađăch Babilôn nhŭp Y-Jêhôjakin tâm năm rơh pham bri hađăch Babilôn.

Phung ƀon lan Yêrusalem jêng bu nă

¹³ Di ngăn nâm bu nau Brah Yêhôva hŏ lah, hađăch Babilôn sŏk lĕ rngôch drăp ndơ khlay tâm ngih Brah Yêhôva jêh ri lĕ drăp ndơ khlay tâm ngih hađăch, mbang nchah lĕ ndơ dŏng ma mah, Y-Salômôn, hađăch Israel, hŏ ƀư jêh ngih brah ma Brah Yêhôva.

¹⁴ Hađăch nhŭp lĕ rngôch bunuyh ƀon lan Yêrusalem hăn jêng bu nă, nđâp lĕ rngôch phung kôranh tahan jêh ri lĕ tahan janh ktang, lĕ rngôch jêng du rmưn bunuyh. Hađăch nhŭp đŏng lĕ rngôch phung trah meh jêh ri phung kan chiăr, mâu geh du huê hôm klen ôh, knŏng phung ƀon lan o ach lơn tâm n'gor bri.

¹⁵ Păng njŭn leo Y-Jêhôjakin ma ƀon Babilôn ndrel ma mê̆ hađăch, phung ur hađăch, phung kôranh bu char, phung geh nau ktang lơn tâm n'gor bri,

¹⁶ nđâp ma pơh rbăn bunuyh tahan, lĕ rngôch jêng phung dăng janh jêh ri geh nau dơi hăn tâm lơh, jêh ri du rbăn phung trah meh, phung kan chiăr. Nây jêng phung hađăch Babilôn nhŭp jêh ri veng tât ta Babilôn.

¹⁷ Hađăch Babilôn njêng Y-Matania, kônh va Y-Jêhôjakin, ƀư hađăch ntrok păng, jêh ri rgâl amoh săk Y-Matania jêng Y-Sêdêkia.

Nau Y-Sêdêkia chiă uănh Yuđa

¹⁸ Y-Sêdêkia ntơm ƀư hađăch tơlah geh bar jât ma nguay năm, jêh ri păng chiă uănh jât ma nguay năm ta ƀon Yêrusalem. Amoh mê̆ păng jêng H'Hamutal, kon bu ur Y-Yêrêmi bơh Lipna.

¹⁹ Hađăch ƀư nau mhĭk tanăp măt Brah Yêhôva nâm bu lĕ rngôch nau Y-Jêhôjakim hŏ ƀư jêh.

²⁰ Yorlah nau Brah Yêhôva ji nuih tât jêh ta ƀon Yêrusalem jêh ri n'gor Yuđa, kŏ ma tât Păng mprơh khân păng du bơh tanăp măt Păng. Jêh nau nây, Y-Sêdêkia hao tâm rdâng đah hađăch Babilôn.