II Phung Hađăch 23 - Nau Brah Ndu Ngơi 2023

Nau rgâl mhe Y-Jôsia

¹ Hađăch Jôsia đă bu hăn tâm rgum lĕ rngôch phung kôranh bu ranh Yuđa jêh ri ƀon Yêrusalem.

² Jêh nây hađăch hăn hao rlet ma ngih Brah Yêhôva ndrel ma lĕ rngôch phung Yuđa, lĕ rngôch phung ƀon lan tâm ƀon Yêrusalem, phung kôranh ƀư brah, nơm mbơh lor, nđâp lĕ rngôch phung ƀon lan, jê̆ mâu lah toyh. Păng răk ăn khân păng tăng lĕ rngôch nau ngơi tâm ndrom samƀŭt nau tâm rnglăp bu joi saơ jêh tâm ngih Brah Yêhôva.

³ Hađăch dâk tâm knưl prêh jêh ri ƀư nau tâm rnglăp tanăp Brah Yêhôva, ton chuat tĭng Brah Yêhôva, jêh ri ma lĕ nuih n'hâm, ma lĕ huêng djôt prăp lĕ nau vay ntăm, nau ntrŭnh, jêh ri nau vay dăp bơh Păng, gay ƀư tĭng nau ngơi ma nau tâm rnglăp hŏ nchih jêh tâm ndrom samƀŭt aơ. Lĕ rngôch phung ƀon lan ton nanê̆ da dê ƀư nau tâm rnglăp nây.

⁴ Hađăch ntĭnh ma Y-Hilkia kôranh ƀư brah toyh lơn jêh ri phung kôranh ƀư brah groi, jêh nây ma phung chiă uănh mpông ngih brah, sŏk ngluh lơi lĕ rngôch tă bơh ngih Brah Yêhôva, lĕ rngôch khăl ngan bu ƀư jêh ma brah Baal, ma brah Asêra, jêh ri ma lĕ rngôch phung tâm trôk. Păng su lơi ndơ nây padih mpâr ƀon Yêrusalem tâm mir Kidrôn, jêh ri djôt leo ŭnh buh ndơ nây ma ƀon Bêthel.

⁵ Păng mprơh lơi phung kôranh ƀư brah nây, jêng lĕ phung hađăch Yuđa hŏ njêng jêh, gây ma su ndơ ƀâu kah ta klơ lĕ ntŭk prêh tâm lĕ rngôch ƀon tâm n'gor Yuđa jêh ri tâm ăp ntŭk jŭm ƀon Yêrusalem. Hađăch mprơh đŏng phung kôranh ƀư brah su ndơ ƀâu kah ma brah Baal, ma nar, ma khay, ma mănh, jêh ri ma lĕ rngôch mănh mbing.

⁶ Păng sŏk lĕ rup brah Asêrah tă bơh ngih Brah Yêhôva luh padih ƀon Yêrusalem, tât ta n'hor dak Kidrôn, ta nây lĕ su ndơ nây ma ŭnh jêh ri juh se tât lêk, jêh nây mƀăr lơi ndơ môi nây ta klơ môch phung ƀon lan.

⁷ Păng ƀư rlâm lơi ngih phung bu klâu văng tĭr tâm ngih Brah Yêhôva, ta ntŭk nây phung bu ur tanh vâl bok ma rup Asêra.

⁸ Hađăch Jôsia rƀŭn rgum lĕ rngôch phung kôranh ƀư brah tă bơh lĕ rngôch ƀon Yuđa, jêh ri ƀư ƀơ̆ lơi lĕ ntŭk prêh klơ, ta nây phung kôranh ƀư brah hŏ su ndơ ƀâu kah, ntơm bơh Gêba tât ma Bêr-Sêba. Hađăch ƀư rlâm lơi nơng ntŭk mbah bu hŏ njêng jêh ta mpông ƀon, êp kêng mpông pêr Y-Yôsuê, kôranh chiă uănh ƀon, gŭ ta mpeh pa chiau, ntŭk lăp mpông ƀon.

⁹ Ƀiălah phung hŏ jêng kôranh ƀư brah ma ntŭk prêh klơ, pôri mâu dơi hao ôh ma nơng Brah Yêhôva tâm ƀon Yêrusalem, ƀiălah khân păng dơi sa piăng let mâu geh ndrui nđâp ma phung oh nâu khân păng nơm.

¹⁰ Păng ƀư ƀơ̆ đŏng ntŭk Tôphet, tâm rlŭng Ben-Hinôm, gay mâu hôm geh ôh du huê dŏng ntŭk nây gay gŭch kon bu klâu păng mâu lah kon bu ur păng tâm ŭnh gay ƀư ndơ nhhơr ma brah Môlek.

¹¹ Păng mƀăr lơi lĕ rngôch rup seh phung hađăch Yuđa prăp nhhơr ma nar, ta ntŭk mpông lăp ngih Brah Yêhôva, dăch jrô kôranh bu char Y-Nathan-Mêlek, tâm ndring ngih brah. Hađăch su ma ŭnh ndeh seh hŏ prăp nhhơr ma nar.

¹² Hađăch Jôsia ƀư rai lơi lĕ nơng ƀư brah phung hađăch Yuđa hŏ ƀư jêh ta klơ chor bôk phok jrô prêh klơ ma Y-Ahas. Bi lĕ nơng ƀư brah Y-Manasê ƀư jêh tâm bar nkual ngih Brah Yêhôva, păng ƀư rai lơi, mbang nchah lơi hăch rhên jêh ri mƀăr ndơ chah hăch môi nây tâm n'hor dak Kidrôn.

¹³ Hađăch ƀư ƀơ̆ lĕ ntŭk prêh klơ mpeh luh nar ƀon Yêrusalem, mpeh rđŭng ma yôk Ôm-Rai, jêng lĕ ntŭk prêh Y-Salômôn, hađăch Israel ndâk jêh gay nhhơr mbah ma brah Astarôt, rup brah dŭt ƀơ̆ ƀơch phung ƀon lan Sidôn; Chêmôs, rup brah dŭt ƀơ̆ ƀơch phung ƀon lan Môap; jêh ri Milkôm, rup brah dŭt ƀơ̆ ƀơch phung ƀon lan Ammôn.

¹⁴ Păng nchah lơi hăch rhên lĕ n'gâng mbah, kăl lơi lĕ rup Asêrim, jêh ri bun bêng nting ta lĕ ntŭk nây.

¹⁵ Rmeh ma nây, hađăch ƀư rai đŏng nơng ƀư brah ta ƀon Bêthel jêh ri ntŭk prêh klơ Y-Jêrôbôam, kon bu klâu Y-Nêbat, ndâk jêh, jêng nơm nsŭk jêh phung Israel ƀư tih. Hađăch mbang nchah lơi nơng ƀư brah, su ma ŭnh ntŭk prêh klơ jêh ri juh ndơ nây kŏ tât môi; păng su ma ŭnh rup Asêrah tâm ban lĕ.

¹⁶ Y-Jôsia rle n'gĭl uănh pakơi saơ lĕ môch ta klơ yôk. Hađăch prơh bunuyh hăn sŏk nting tâm lĕ môch nây, jêh nây gŭch nting nây ta klơ nơng ƀư brah, ƀư ƀơ̆ nơng ƀư brah, tĭng nâm nau Brah Yêhôva ngơi jêh bơh bunuyh Brah Ndu, nơm mbơh lor jêh nau nây, dôl Y-Jêrôbôam gŭ nsrâng ta nơng ƀư brah tâm nau nar rƀŭn. Hađăch Jôsia rle n'gĭl n'gơr uănh môch bunuyh Brah Ndu, jêng nơm hŏ lah lor ma lĕ nau nây.

¹⁷ Hađăch ôp: “Mbu moh môch gâp saơ đah ri?” Phung bunuyh tâm ƀon nây lah: “Nây jêng môch bunuyh Brah Ndu, văch tă bơh n'gor Yuđa, mbơh lor lĕ nau hađăch Jêrôbôam ƀư jêh ma nơng ƀư brah ta ƀon Bêthel.”

¹⁸ Hađăch lah: “Ăn hom nting nây gŭ đăp mpăn, mâu geh bunuyh dơi trơn păng ôh.” Pôri bu lơi nting păng nđâp nting nơm mbơh lor văch tât bơh Samari.

¹⁹ Y-Jôsia rơih đŏng lĕ rngôch ntŭk yơk mbah ta lĕ ntŭk prêh klơ tâm lĕ rngôch ƀon n'gor Samari, ndơ nây jêng phung hađăch Israel ndâk jêh gay nsônh nau ji nuih Brah Yêhôva, hađăch ƀư rai lĕ ntŭk nây nâm bu păng hŏ ƀư ta Bêthel.

²⁰ Hađăch nkhĭt lĕ rngôch phung kôranh ƀư brah ma lĕ ntŭk prêh klơ ta lĕ nơng ƀư brah, jêh ri gŭch nting khân păng ta klơ nây, jêh nây plơ̆ sĭt ma ƀon Yêrusalem.

Ndray rƀŭn nau găn

²¹ Hađăch Jôsia ntĭnh ma lĕ rngôch phung ƀon lan: “Kah gĭt ndray hom rƀŭn Nau Găn ma Yêhôva Brah Ndu khân may, tĭng nâm bu nchih jêh tâm ndrom samƀŭt nau tâm rnglăp aơ.”

²² Ntơm bơh rnôk phung kôranh phat dôih chiă uănh ma phung Israel, rnôk phung hađăch Israel jêh ri hađăch phung Yuđa tât ta nar aơ, bu mâu mâp kah gĭt ndray ôh Rƀŭn Nau Găn tâm ban pônây.

²³ Kŏ tât ta năm rơh jât ma pham rnôk rô̆ hađăch Jôsia chiă uănh, bu ntơm ndray prăp rƀŭn Nau Găn tâm ban pônây ma Brah Yêhôva ta Yêrusalem.

²⁴ Rlau ma nây, Y-Jôsia mprơh du lĕ rngôch phung gru rƀên jêh ri phung n'hŭm, lĕ rup brah jê̆ tâm ngih jêh ri lĕ rup brah êng, nđâp lĕ rngôch ndơ dŭt ƀơ̆ ƀơch bu saơ tâm n'gor Yuđa jêh ri tâm ƀon Yêrusalem. Hađăch ƀư lĕ nau nây gay ƀư tĭng kơt lĕ nau ngơi tâm nau vay hŏ nchih jêh tâm ndrom samƀŭt, kôranh ƀư brah Y-Hilkia joi saơ tâm ngih Brah Yêhôva.

²⁵ Lor panăp Y-Jôsia, mâu mâp geh ôh du huê hađăch tâm ban ma păng, nơm plơ̆ sĭt ma Brah Yêhôva ma lĕ nuih n'hâm, ma lĕ huêng, jêh ri ma lĕ nau ktang păng, tĭng nâm lĕ nau vay Y-Môis tâm ban ma păng; jêh ri pakơi Y-Jôsia mâu đŏng geh nơm ƀư tâm ban kơt nây.

²⁶ Nđâp lah pônây, Brah Yêhôva mâu rngơt ôh nau Păng ji nuih, jêng nau ji nuih tâm rdâng đah phung Yuđa, yorlah lĕ rngôch nau tih toyh bơh Y-Manasê lok lôr Păng.

²⁷ Brah Yêhôva lah: “Gâp mra mprơh du phung Yuđa tă bơh tanăp măt Gâp, nâm bu Gâp mprơh jêh phung Israel. Gâp mra chalơi ƀon Yêrusalem, ƀon Gâp hŏ săch jêh, tâm ban đŏng ngih brah Gâp lah ma păng pô aơ: ‘Amoh Gâp mra gŭ ta nây.’”

²⁸ Mâu di hĕ lĕ kan êng Y-Jôsia jêh ri lĕ nau păng ƀư jêh, bu hŏ nchih da dê jêh tâm ndrom samƀŭt nau rêh jêng ma phung hađăch Yuđa?

Nau Y-Jôsia khĭt

²⁹ Tâm rnôk rô̆ Y-Jôsia, Pharaôn Nêkô, hađăch Êjipt, hăn hao lơh hađăch Asiri ta bơh dak krong Ơphrat. Hađăch Jôsia leo phung tahan păng hăn tâm lơh. Ƀiălah Pharaôn Nêkô lĕ saơ jêh Y-Jôsia, nkhĭt ro păng ta ƀon Mêgidô.

³⁰ Bơh ƀon Mêgidô, phung oh mon Y-Jôsia rdeng săk jăn khĭt păng tâm ndeh seh plơ̆ sĭt ma ƀon Yêrusalem, jêh nây bu tâp păng tâm môch păng nơm. Phung ƀon lan păng tâm n'gor săch Y-Jôacha, kon hađăch Jôsia, tŏ dak ƀâu kah ma păng, jêh ri njêng păng ƀư hađăch chiă uănh thoi ntrok mbơ̆ păng.

Nau Y-Jôacha jêh ri Y-Jêhôjakim chiă uănh

³¹ Y-Jôacha ntơm jêng hađăch ta lah geh bar jât ma pe năm, jêh ri păng chiă uănh pe khay ta ƀon Yêrusalem. Amoh mê̆ păng jêng H'Hamutal, kon bu ur Y-Yêrêmi ta Lipna.

³² Păng ƀư nau mhĭk tanăp măt Brah Yêhôva tâm ban ma phung chô yau păng hŏ ƀư jêh.

³³ Pharaôn Nêkô nhŭp krŭng Y-Jôacha ta ƀon Ribla, tâm n'gor Hamat, gay ma păng mâu dơi ƀư hađăch tâm ƀon Yêrusalem đŏng ôh, jêh ri păng nchâp n'gor Yuđa chê̆ pi pe rbăn kilô prăk jêh ri pe jât kilô mah.

³⁴ Pharaôn Nêkô njêng Y-Êliakim, du huê kon Y-Jôsia, gŭ ta sưng hađăch chiă uănh thoi ntrok mbơ̆ păng; Pharaôn rgâl amoh Y-Êliakim jêng Y-Jêhôjakim. Ƀiălah bu nhŭp Y-Jôacha djôt leo sĭt ma n'gor bri Êjipt jêh ri păng khĭt ta nây.

³⁵ Ăn Y-Jêhôjakim chê̆ rnoh prăk jêh ri mah ma Pharaôn. Ƀiălah gây geh rnoh prăk jêh ri mah nây, păng sŏk tâm n'gor, jêh ri nchâp ăp nơm tâm phung ƀon lan chê̆ prăk jêh ri mah tĭng nâm drăp ndơ khân păng geh, gay hađăch ăn ma Pharaôn Nêkô.

Y-Jêhôjakim ƀư hađăch Yuđa

³⁶ Y-Jêhôjakim ntơm jêng hađăch tơlah geh bar jât ma prăm năm, jêh ri chiă uănh jât ma nguay năm ta ƀon Yêrusalem. Amoh mê̆ păng jêng H'Sêbida, kon bu ur Y-Pêdaya ta Ruma.

³⁷ Păng ƀư nau mhĭk tanăp măt Brah Yêhôva tâm ban ma phung chô yau păng hŏ ƀư jêh.