II Phung Hađăch 22 - Nau Brah Ndu Ngơi 2023

Y-Jôsia ƀư hađăch Yuđa

¹ Y-Jôsia gŭ ta sưng hađăch tơlah geh pham năm, jêh ri chiă uănh pe jât ma nguay năm ta ƀon Yêrusalem. Amoh mê̆ păng jêng H'Jêdida, kon bu ur Y-Adaya, sau Y-Bôskat.

² Păng ƀư nau sŏng tanăp măt Brah Yêhôva, hăn tĭng tâm lĕ trong Y-Đavit, chô yau păng, jêh ri păng mâu teng mpeh pa ma mâu lah mpeh pa chiau ôh.

Y-Hilkia joi saơ ndrom samƀŭt nau vay tâm ngih brah

³ Tâm năm rơh jât ma pham rnôk rô̆ Y-Jôsia chiă uănh, hađăch prơh kôranh nchih samƀŭt Y-Saphan, kon bu klâu Y-Asalia, sau Y-Mêsulam, hăn tât ta ngih Brah Yêhôva, jêh ri ntĭnh pô aơ:

⁴ “Hăn hao hom tâm mâp ma kôranh ƀư brah toyh lơn Y-Hilkia, jêh ri dăn ma păng kơp prăk bu nhhơr jêh ma ngih Brah Yêhôva, jêng prăk phung mât mray mpông ngih brah hŏ sŏk jêh tă bơh phung ƀon lan.

⁵ Jao hom prăk nây ma phung ƀư kan nkra tay ngih Brah Yêhôva; gay ma khân păng jao tay ma phung nkra lĕ ntŭk bluh sat tâm ngih brah,

⁶ jêng phung trah si, phung ndâk jêh ri phung ndâk lŭ. Khân păng dŏng đŏng prăk nây rvăt tơm si jêh ri lŭ trah jêh gay nkra ngih brah.

⁷ Ƀiălah bu mâu mêt uănh ôh prăk jao jêh ma phung khân păng, yorlah khân păng ƀư ma nau di.”

⁸ Kôranh ƀư brah toyh lơn Y-Hilkia lah ma kôranh nchih samƀŭt Y-Saphan: “Gâp joi saơ jêh ndrom samƀŭt nau vay tâm ngih Brah Yêhôva.” Y-Hilkia jao ndrom samƀŭt nây ma Y-Saphan răk.

⁹ Jêh nau nây, kôranh nchih samƀŭt Y-Saphan hăn mâp ma hađăch jêh ri mbơh: “Phung oh mon may sŏk jêh prăk tâm ngih brah, jêh ri jao jêh prăk nây ma phung ƀư kan nkra tay ngih Brah Yêhôva.”

¹⁰ Kôranh nchih samƀŭt Y-Saphan lah tay: “Kôranh ƀư brah toyh lơn Y-Hilkia ăn ma gâp du ndrom samƀŭt.” Jêh nây Y-Saphan răk ndrom samƀŭt nây ma hađăch tăng.

¹¹ Lah tăng lĕ nau ngơi tă bơh ndrom samƀŭt nau vay, hađăch nkhêk ro ao păng nơm.

¹² Hađăch ntĭnh ma kôranh ƀư brah toyh Y-Hilkia, ma Y-Ahikam kon bu klâu Y-Saphan, ma Y-Akbôr, kon bu klâu Y-Mikaya, ma kôranh nchih samƀŭt Y-Saphan, jêh ri ma Y-Asaya, oh mon hađăch, kơt aơ:

¹³ “Hăn hom ôp ma Brah Yêhôva ăn ma gâp, ma phung ƀon lan, jêh ri ma lĕ rngôch phung Yuđa, ma lĕ nau nchih tâm ndrom samƀŭt hŏ joi saơ jêh. Brah Yêhôva ji nuih hâu ngăn ma he, yorlah phung chô yau he mâu tông ôh ma lĕ nau ngơi tâm ndrom samƀŭt aơ, jêh ri mâu ƀư tĭng nâm nau hŏ ntăm jêh ma phung he.”

¹⁴ Pônây, kôranh ƀư brah Y-Hilkia, Y-Ahikam, Y-Akbôr, Y-Saphan, jêh ri Y-Asaya hăn mâp ma H'Hulda nơm mbơh lor bu ur, ur Y-Salum, nơm mât mray ao nau rƀŭn, kon Y-Tikva, sau Y-Harhas. Bu ur nây gŭ tâm nkual mrô bar ta ƀon Yêrusalem. Khân păng mbơh nau kan ma păng.

¹⁵ Jêh ri bu ur nây lah ma khân păng: “Yêhôva Brah Ndu phung Israel lah kơt aơ: Lah hom ma nơm hŏ đă jêh khân păng văch tât ma gâp

¹⁶ Brah Yêhôva lah: ‘Gâp mra ăn tât nau mhĭk ma ntŭk aơ jêh ri ma phung ƀon lan păng, di tĭng nâm lĕ rngôch nau ngơi bu hŏ nchih tâm ndrom samƀŭt hađăch Yuđa hŏ răk.

¹⁷ Yorlah Phung ƀon lan aơ hŏ chalơi jêh Gâp, gŭch ndơ ƀâu kah ăn ma phung brah êng jêh ri nsônh nau Gâp ji nuih ma lĕ rngôch kan ti khân păng ƀư, pôri Gâp hao ji nuih hâu ngăn nđâp ma ntŭk aơ, mâu rngơt ôh.’

¹⁸ Bi ma hađăch Yuđa hŏ đă jêh khân may hăn ôp ma Brah Yêhôva, lah hom ma păng lĕ nau ngơi păng hŏ tăng Yêhôva Brah Ndu Israel lah tâm ban pônây:

¹⁹ ‘Tơlah may tăng nau Gâp lah tâm rdâng đah ntŭk aơ jêh ri tâm rdâng đah phung ƀon lan păng pô aơ, ntŭk aơ mra jêng rngol, phung ƀon lan bu rak rtăp, yorlah may geh nuih n'hâm rmal, trŭnh săk may nơm tanăp măt Brah Yêhôva, nkhêk ao may nơm jêh ri nhhiăng nhĭm tanăp măt Gâp. Yor ri, Gâp hŏ tăng jêh nau may mbơh sơm.

²⁰ Aơ, Gâp mra ăn ma may rgum ndrel ma phung chô yau may, jêh ri bu mra tâp may tâm môch ma nau đăp mpăn. Măt may mâu mra saơ ôh lĕ rngôch nau mhĭk Gâp mra ăn tât ma ntŭk aơ.’” Khân păng plơ̆ mbơh tay ma hađăch lĕ nau ngơi nây.