II Phung Hađăch 21 - Nau Brah Ndu Ngơi 2023

Hađăch Manasê mbah rup brah

¹ Y-Manasê geh jât ma bar năm tơlah păng ntơm chiă uănh, jêh ri păng chiă uănh prăm jât ma prăm năm ta ƀon Yêrusalem. Amoh mê̆ păng jêng H'Hepsiba.

² Păng ƀư nau mhĭk tanăp măt Brah Yêhôva, jêh ri tĭng lĕ nau vay dŭt ƀơ̆ ƀơch tâm phung ndŭl mpôl Brah Yêhôva hŏ mprơh du jêh tă bơh phung ƀon lan Israel.

³ Păng ndâk tay lĕ ntŭk prêh klơ mbơ̆ păng jêng Y-Hêsêkia ƀư rai jêh, ndâk tay đŏng nơng ƀư brah ma Baal, ndâk rup brah Asêrah nâm bu Y-Ahap, hađăch Israel, ƀư jêh. Păng chon mbah jêh ri yơk mbah ma lĕ rngôch mănh mbing.

⁴ Păng ndâk lĕ nơng ƀư brah tâm ngih Brah Yêhôva, jêng ntŭk Brah Yêhôva lah jêh pô aơ: “Tâm ƀon Yêrusalem, Gâp mra dơm amoh Gâp ta nây.”

⁵ Tâm bar ndring nhuang ngih brah Brah Yêhôva, păng ndâk nơng ƀư brah ma phung mănh mbing.

⁶ Păng nhhơr kon păng tâm ŭnh gay ndơ ƀư brah ma brah, ƀư nau sek uănh mănh jêh ri nau ƀŭk rƀên, dăn ôp phung gru rƀên jêh ri phung n'hŭm. Păng ƀư âk nau djơh tanăp măt Brah Yêhôva gay nsônh Păng ji nuih.

⁷ Bi ma rup brah Asêrah păng hŏ ƀư, pôri păng ndâk tâm trôm ngih Brah Yêhôva lah jêh ma Y-Đavit jêh ri Y-Salômôn, kon bu klâu păng, pô aơ: “Tâm ngih aơ jêh ri ta ƀon Yêrusalem, ntŭk Gâp lĕ săch jêh tâm lĕ rngôch ndŭl mpôl phung Israel, jêng ntŭk Gâp mra dơm amoh Gâp gŭ n'ho ro.

⁸ Tơlah phung Israel djôt prăp lĕ rngôch nau vay Gâp hŏ ntĭm nti, jêng lĕ nau vay, Y-Môis, oh mon Gâp, ntĭnh jêh ma khân păng, pôri Gâp mâu mra ăn phung Israel hăn nsong mblêng tă bơh n'gor Gâp hŏ ăn jêh ma phung chô yau khân păng.”

⁹ Ƀiălah khân păng mâu tông bâr ôh; Y-Manasê nsŭk nsôr khân păng ƀư lĕ nau djơh mhĭk âk lơn ma phung ndŭl mpôl Brah Yêhôva hŏ ƀư rai jêh tanăp phung ƀon lan Israel.

¹⁰ Brah Yêhôva hŏ dŏng nơm mbơh lor, jêng phung oh mon Păng lah pô aơ:

¹¹ “Yorlah Y-Manasê, hađăch Yuđa, hŏ ƀư tih jêh lĕ nau dŭt ƀơ̆ ƀơch nây, ƀư nau djơh mhĭk lơn ma lĕ rngôch nau phung Amôrit hŏ ƀư jêh lor ma păng, jêh ri tâm ban lĕ nsŭk nsôr jêh phung Yuđa ƀư tih mbah rup brah,

¹² pôri Yêhôva Brah Ndu Israel lah pô aơ: ‘Aơ, Gâp mra ăn nau tât ma ƀon Yêrusalem jêh ri ma phung Yuđa nau mhĭk kŏ tât ăp nơm tăng nau nây mra ƀư tê̆k lĕ bar đah tôr.

¹³ Gâp mra nthăng ta klơ Yêrusalem rse veh ƀon Samari jêh ri rse yông ndơ jâk ngih Y-Ahap. Gâp mra pih kloh ƀon Yêrusalem tâm ban bu jut du mlâm ngan pala, jêh nây kŭp tâm dâng, klơ jêh rao kŭp lơi păng.

¹⁴ Gâp mra chalơi kô̆ drăp ndơn Gâp hôm e klen, jao khân păng tâm ti phung rlăng. Khân păng mra jêng ndơ pit in jêh ri jêng ndơ sa ma lĕ rngôch phung rlăng,

¹⁵ yorlah ntơm bơh nar phung chô yau khân păng du luh bơh Êjipt tât ma nar aơ, khân păng ƀư jêh nau mhĭk tanăp măt Gâp jêh ri nsônh nau ji nuih Gâp.’”

¹⁶ Rlau ma nây, lĕ nau tih Y-Manasê hŏ ƀư tih jêh ri ƀư ăn ma phung Yuđa ƀư tih, nsŭk ma khân păng ƀư nau mhĭk tanăp măt Brah Yêhôva, păng hŏ ƀư đŏng nau nkhŭt mham âk bunuyh mâu tih, kŏ tât mham nây bêng ƀon Yêrusalem bơh bôl aơ tât bôl ri.

¹⁷ Mâu di hĕ lĕ kan êng Y-Manasê, lĕ nau păng ƀư jêh ri nau tih păng ƀư tih jêh bu hŏ nchih da dê tâm ndrom samƀŭt nau rêh jêng ma phung hađăch Yuđa?

¹⁸ Y-Manasê khĭt hăn gŭ ndrel ma phung chô yau păng jêh ri bu tâp păng tâm n'gar kao ngih păng nơm, tâm n'gar kao Y-Usa. Kon păng jêng Y-Amôn chiă uănh ntrok păng.

Y-Amôn chiă uănh thoi ntrok Y-Manasê

¹⁹ Y-Amôn ntơm jêng hađăch tơlah geh bar jât ma bar năm, jêh ri chiă uănh bar năm tâm ƀon Yêrusalem. Amoh mê̆ păng jêng H'Mêsulêmet, kon bu ur Y-Harus, sau Y-Jôtba.

²⁰ Păng ƀư nau mhĭk tanăp măt Brah Yêhôva, nâm bu Y-Manasê, mbơ̆ păng ƀư jêh.

²¹ Tâm lĕ nau, păng hăn tĭng lĕ trong mbơ̆ păng hăn jêh, mbah ma phung rup brah mbơ̆ păng hŏ mbah jêh ri chon mbah tanăp măt khân păng.

²² Păng chalơi Yêhôva Brah Ndu phung chô-yau păng, jêh ri mâu chuat ôh tâm trong Brah Yêhôva.

²³ Phung oh mon Y-Amôn tâm rdâng đah păng jêh ri nkhĭt păng tâm ngih hađăch păng nơm.

²⁴ Ƀiălah phung ƀon lan tâm n'gor nkhĭt lơi lĕ rngôch phung tâm rdâng ma hađăch Amôn, jêh ri khân păng njêng kon Y-Amôn jêng Y-Jôsia chiă uănh thoi ntrok.

²⁵ Mâu di hĕ lĕ kan êng Y-Amôn, lĕ nau kan păng ƀư jêh bu hŏ nchih da dê tâm ndrom samƀŭt nau rêh jêng ma phung hađăch Yuđa?

²⁶ Bu tâp Y-Amôn tâm môch păng nơm tâm n'gar kao Y-Usa. Jêh nây kon păng jêng Y-Jôsia chiă uănh thoi ntrok păng.