II Phung Hađăch 20 - Nau Brah Ndu Ngơi 2023

Nau Y-Hêsêkia ji jêh ri geh nau ƀư bah

¹ Tâm lĕ nar nây, Y-Hêsêkia ji dăch khĭt. Nơm mbơh lor Y-Êsai, kon bu klâu Y-Amôt, hăn tâm mâp păng jêh ri lah: “Brah Yêhôva lah kơt aơ: ‘Dăp nkra hom kan tâm ngih may, yorlah may mra khĭt, mâu hôm dơi rêh ôh.’”

² Y-Hêsêkia rle măt păng mpeh ta mpir jêh ri păng mbơh sơm ma Brah Yêhôva:

³ “Ơ Brah Yêhôva, dăn kah gĭt hom pô aơ gâp hôm chuat hăn tanăp măt May ma nau răp jăp lĕ nuih n'hâm, jêh ri ƀư jêh nau ueh tanăp măt May.” Jêh nây Y-Hêsêkia nhĭm rngot ngăn.

⁴ Y-Êsai ê hŏ luh ôh bơh nkual ngih ta nklang ngih hađăch, geh nau Brah Yêhôva ngơi ma păng:

⁵ “Plơ̆ tay hom lah ma Y-Hêsêkia, kôranh ma phung ƀon lan Gâp, pô aơ Yêhôva Brah Ndu Y-Đavit, chô yau may, lah kơt aơ: ‘Gâp tăng jêh nau may mbơh sơm jêh ri saơ jêh dak măt may hoch. Aơ, Gâp mra ƀư bah may; tât nar rơh pe, may mra hăn hao ma ngih Brah Yêhôva.

⁶ Gâp mra ăn ma may gŭ rêh ntop jât ma prăm năm đŏng. Gâp mra tâm rklaih may jêh ri ƀon aơ tă bơh ti hađăch Asiri. Yor Gâp jêh ri yor oh mon gâp jêng Y-Đavit, Gâp mra king n'gang ƀon aơ.’”

⁷ Y-Êsai lah: “Sŏk hom du glo ƀănh play rvi dơm ta ntŭk ji eh nây, păng mra dơi rêh.”

⁸ Y-Hêsêkia ôp ma Y-Êsai: “Moh nau tâm mbên ma gâp gĭt pô aơ Brah Yêhôva mra ƀư bah ma gâp, jêh ri tât nar rơh pe gâp mra hăn hao ma ngih Brah Yêhôva?”

⁹ Y-Êsai lah: “Aơ jêng nau mbên bơh Brah Yêhôva ăn ma may gay tâm mpơl Păng mra ƀư nau Păng ton jêh: May ŭch gui n'hâm nar mra hăn rlet panăp jât nhuat mâu lah rŭch plơ̆ pakơi jât nhuat?”

¹⁰ Y-Hêsêkia plơ̆ lah: “Gui n'hâm hăn rlet panăp jât nhuat jêng mâu geh jêr ôh. Mâu! Dăn gui n'hâm hŏ hăn rlet panăp jât nhuat rŭch plơ̆ pakơi jât nhuat.”

¹¹ Jêh ri Y-Êsai nơm mbơh lor vơh vơl ma Brah Yêhôva; jêh ri Brah Yêhôva mplơ̆ gui rŭch pakơi jât nhuat, ma nau nây nar rŭch plơ̆ pakơi ta mông Y-Ahas.

Phung mbơh tă bơh Babilôn tât

¹² Tâm rnôk nây, hađăch Babilôn jêng Y-Bêrôdak Baladan, kon Y-Baladan, prơh bunuyh hăn njŭn samƀŭt jêh ri ndơ nhhơr ăn ma hađăch Hêsêkia, yorlah păng tăng lư păng ji.

¹³ Jêh iăt nau phung mbơh nkoch jêh, Y-Hêsêkia ăn ma khân păng uănh lĕ rngôch jay prăp drăp ndơ khlay păng tâm ban ma prăk, mah, dak si ƀâu kah, dak ngi khlay, jay prăp ndơ tâm lơh, jêh ri lĕ rngôch ndơ tâm lĕ jay prăp drăp ndơ păng. Mâu hôm geh du ntil ndơ ôh tâm ngih hađăch jêh ri tâm lĕ ƀon bri hađăch păng, dĭng Y-Hêsêkia mâu ăn khân păng uănh.

¹⁴ Nơm mbơh lor Y-Êsai hăn mâp ma hađăch Hêsêkia jêh ri lah: “Moh nau phung nây lah, jêh ri mbah tă phung nây văch tât ma may?” Y-Hêsêkia plơ̆ lah: “Khân păng văch tât tă bơh n'gor Babilôn ngai ngăn.”

¹⁵ Y-Êsai ôp tay: “Moh ndơ khân păng saơ jêh tâm ngih hađăch may?” Y-Hêsêkia plơ̆ lah: “Khân păng lĕ saơ jêh lĕ rngôch ndơ ngih hađăch gâp. Mâu geh du ntil ndơ tâm lĕ jay prăp drăp ndơ khlay dĭng gâp mâu tâm mpơl ăn ma khân păng saơ.”

¹⁶ Nôk nây, Y-Êsai lah ma Y-Hêsêkia: “Dăn ma may iăt nau Brah Yêhôva ngơi:

¹⁷ ‘Aơ, tâm lĕ nar mra tât, lĕ rngôch ndơ tâm ngih hađăch may, lĕ rngôch ndơ phung chô yau may hŏ prăp jêh tâm lĕ jay prăp drăp ndơ khlay kŏ tât ta nar aơ, bu mra djôt leo ta Babilôn, mâu hôm geh du ntil ndơ ôh!’ Brah Yêhôva lah kơt nây.

¹⁸ ‘Tâm phung kon may, phung bu deh jêh ăn ma may, bu mra nhŭp djôt leo khân păng mra jêng kôranh bu char tâm ngih hađăch Babilôn.’”

¹⁹ Y-Hêsêkia plơ̆ lah ma Y-Êsai: “Nau Brah Yêhôva may mhe ngơi jêng ueh.” Yor păng mĭn êng: “Mâu di hĕ tâm nau rêh gâp mra geh nau đăp mpăn jêh ri nau rnơm ƀơh?”

Nau Y-Hêsêkia khĭt

²⁰ Lĕ nau kan êng Y-Hêsêkia ƀư, nau ktang păng, nau păng ƀư nglao dak, jêh ri ƀư rmlông dak jêh ri n'hoch ăn tât dak tâm ƀon, mâu di hĕ bu hŏ nchih da dê tâm ndrom samƀŭt nau rêh jêng ma phung hađăch Yuđa?

²¹ Y-Hêsêkia khĭt hăn gŭ ndrel ma phung chô yau păng. Kon păng jêng Y-Manasê chiă uănh thoi ntrok păng.