II Phung Hađăch 2 - Nau Brah Ndu Ngơi 2023

Y-Êli hao klơ trôk

¹ Tơlah Brah Yêhôva dăch djôt leo Y-Êli hao klơ trôk tâm trôm sial vănh blông, Y-Êli jêh ri Y-Êlisê hăn luh bơh Gilgal.

² Y-Êli lah ma Y-Êlisê: “Gŭ hom ta aơ, yorlah Brah Yêhôva prơh gâp hăn tât ma Bêthel.” Ƀiălah Y-Êlisê lah: “Gâp sŏk amoh Brah Yêhôva gŭ rêh mro mrăng jêh ri sŏk amoh nau rêh may gay sơm ton, gâp mâu du tă bơh may ôh.” Pôri, khân păng hăn trŭnh ma Bêthel.

³ Phung oh mon phung nơm mbơh lor gŭ ta Bêthel hăn tât ôp ma Y-Êlisê: “May gĭt lĕ ma nar aơ Brah Yêhôva mra djôt kôranh may hao bơh may?” Păng plơ̆ lah: “Gâp gĭt nau nây! Khân may gŭ rklăk hom.”

⁴ Y-Êli lah tay ma Y-Êlisê: “Hơi Y-Êlisê, gŭ hom ta aơ, yorlah Brah Yêhôva prơh gâp hăn tât ma ƀon Yêrikô.” Ƀiălah Y-Êlisê lah: “Gâp sŏk amoh Brah Yêhôva gŭ rêh mro mrăng jêh ri sŏk amoh nau rêh may gay sơm ton, gâp mâu mra du tă bơh may ôh.” Pôri, khân păng hăn tât ma Yêrikô.

⁵ Phung oh mon phung nơm mbơh lor gŭ ta Yêrikô hăn văch dăch Y-Êlisê, jêh ri ôp: “May gĭt lĕ ma nar aơ Brah Yêhôva mra djôt kôranh may hao bơh may?” Păng plơ̆ lah: “Gâp gĭt nau nây! Khân may gŭ rklăk hom.”

⁶ Y-Êli lah ma Y-Êlisê: “Gŭ hom ta aơ, yorlah Brah Yêhôva prơh gâp hăn tât dak krong Yurdan.” Ƀiălah Y-Êlisê lah: “Gâp sŏk amoh Brah Yêhôva gŭ rêh mro mrăng jêh ri sŏk amoh nau rêh may gay sơm ton, gâp mâu mra du tă bơh may ôh.” Pôri, bar hê khân păng hăn đŏng.

⁷ Geh prăm jât nuyh tâm phung oh mon phung nơm mbơh lor hăn ndrel tâm ban lĕ, gŭ râng ngai ƀah, panăp đah ntŭk Y-Êli jêh ri Y-Êlisê dôl dâk êp kơh dak krong Yurdan.

⁸ Y-Êli sŏk ao jâr păng nơm, klôn păng jêh ri dong klơ n'ha dak. Dak krong tâm pă rnglah bar đah ding jêh ri lĕ bar hê hăn rgăn ta neh sơh.

⁹ Tơlah lĕ rgăn jêh kơh tê̆, Y-Êli lah ma Y-Êlisê pô aơ: “Dăn hom moh nau may ŭch ma gâp ƀư ma may, êlor ma bu leo gâp hao tă bơh may.” Y-Êlisê lah: “Gâp dăn ma may, ăn gâp ndơn bar tơ̆ rlau lơn huêng brah may.”

¹⁰ Y-Êli lah: “May dăn du ntil ndơ jêr. Ƀiălah tơlah may saơ gâp dôl bu leo gâp hao tă bơh may, may mra geh tâm ban pônây lĕ; tơlah mâu, may mâu dơi geh.”

¹¹ Dôl khân păng hăn n'ho ma ngơi, aơ, geh du bôk ndeh seh ŭnh jêh ri seh ŭnh tâm nkhah bar hê khân păng, jêh nây Y-Êli hao rlet klơ trôk tâm sial vănh blông.

¹² Y-Êlisê uănh saơ nau nây jêh ri nter huy: “Mbơ̆ gâp! Mbơ̆ gâp! Ndeh seh jêh ri seh ndơ tâm lơh phung Israel!” Jêh nây păng mâu hôm saơ Y-Êli ôh. Păng kuăn ta ao păng nơm khêk jêng bar nchroi.

Y-Êlisê thoi tĭng nau pah kan Y-Êli

¹³ Y-Êlisê dônh du mlâm ao jâr bơh Y-Êli tŭp jêh. Păng plơ̆ sĭt jêh ri gŭ nsrâng dâk êp kơh dak krong Yurdan.

¹⁴ Pôri păng sŏk du mlâm ao jâr tŭp jêh bơh Y-Êli, dong ta klơ n'ha dak jêh ri lah: “Ta ntŭk Yêhôva Brah Ndu Y-Êli?” Tơlah Y-Êlisê hŏ dong ta klơ n'ha dak jêh tâm ban Y-Êli, dak tâm pă rnglah bar đah ding, jêh nây Y-Êlisê hăn rgăn.

¹⁵ Tơlah phung oh mon phung nơm mbơh lor gŭ ta Yêrikô saơ Y-Êlisê bơh ngai jêh ri lah: “Huêng brah Y-Êli gŭ jêh ta Y-Êlisê.” Khân păng hăn chuă vơt păng, chon mon ta neh tanăp măt păng

¹⁶ jêh ri lah: “Aơ, tâm phung oh mon may geh prăm jât bunuyh dăng ktang. Dăn ăn khân păng hăn joi kôranh may. Klăp lah Huêng Brah Yêhôva djôt leo jêh păng hao jêh nây dơm păng ta klơ yôk mâu lah tâm rlŭng?” Y-Êlisê plơ̆ lah: “Lơi đă khân păng hăn.”

¹⁷ Ƀiălah khân păng ăt sŏl dăn mro kŏ tât păng prêng jêh ri lah: “Prơh hom khân păng hăn!” Khân păng prơh ro prăm jât nuyh hăn joi tâm pe nar, ƀiălah mâu joi saơ Y-Êli ôh.

¹⁸ Tơlah khân păng plơ̆ sĭt, Y-Êlisê ăt hôm gŭ kâp ta Yêrikô. Păng lah ma khân păng: “Mâu di hĕ gâp hŏ lah jêh ma khân may lơi hăn ôh ƀơh?”

Y-Êlisê ƀư nau mbên khlay ngăn

¹⁹ Phung ƀon lan tâm ƀon Yêrikô lah ma Y-Êlisê: “Tĭng nâm kôranh lĕ saơ, ntŭk ƀon aơ jêng ueh, ƀiălah dak jêng kăch jêh ri neh mâu jêng ndơ ôh.”

²⁰ Păng lah: “Djôt leo hom ma gâp du khăl mhe jêh ri ăn boh tâm nây.” Pônây khân păng djôt leo khăl boh ma păng.

²¹ Păng hăn tât ta tu dak, nkhŭt boh ta nây jêh ri lah: “Brah Yêhôva lah kơt aơ: ‘Gâp hŏ ƀư bah jêh tu dak aơ, păng mâu mra hôm ôh ƀư nau khĭt mâu lah ƀư ma neh mâu jêng ndơ ôh.’”

²² Pônây, dak nây jêng ueh tât ma nar aơ, tĭng nâm Y-Êlisê ngơi jêh.

Phung kon se kau kăp

²³ Tă bơh nây, Y-Êlisê hăn hao tât ta Bêthel. Păng dôl hăn rŏ trong, geh phung kon se luh tă bơh ƀon jêh ri gơm mpray ma păng lah: “Hơi bu klâu hil bôk, hăn hao hom! Hơi bu klâu hil bôk, hăn hao hom!”

²⁴ Păng n'gĭl uănh pakơi jêh ri sŏk amoh Brah Yêhôva gay rak rtăp khân păng. Ta nây ro geh bar mlâm kau me luh tă bơh tâm krŏng, kăp nkhêk puăn jât ma bar nuyh tâm phung kon se ndăm nây.

²⁵ Ntơm bơh nây, Y-Êlisê hăn tât ta yôk Karmel, jêh nây plơ̆ sĭt ma Samari.