II Phung Hađăch 19 - Nau Brah Ndu Ngơi 2023

Nau mbơh lor ma nau tâm rklaih ƀon Yêrusalem

¹ Tơlah tăng nau nây, hađăch Hêsêkia nkhêk bok ao păng ro, nsoh ao ƀau jêh ri lăp tâm ngih Brah Yêhôva.

² Păng prơh kôranh mât uănh ngih hađăch jêng Y-Êliakim, kôranh nchih samƀŭt Y-Sêpna jêh ri phung kôranh ƀư brah ranh rlau lơn nsoh ao ƀau hăn mâp ma nơm mbơh lor Y-Êsai, kon bu klâu Y-Amôt.

³ Khân păng lah ma păng: “Hađăch Hêsêkia lah kơt aơ: ‘Nar aơ jêng nar rŭng răng, nau nduyh, jêh ri nau bêk prêng; tâm ban bu ur lĕ tât nôk deh kon jêh, ƀiălah mâu tŏng suan gay deh kon ôh.

⁴ N'hêl nanê̆ Yêhôva Brah Ndu may hŏ tăng jêh lĕ rngôch nau Y-Rabshakeh ngơi jêh ri kôranh păng jêng hađăch Asiri hŏ prơh păng hăn tât gay mưch rmot Brah Ndu gŭ rêh mro mrăng, jêh ri Yêhôva Brah Ndu may mra rmal ma khân păng yor lĕ nau ngơi Păng hŏ tăng jêh. Yor ri, dăn ma may mbơh sơm hom ma phung hôm klen.’”

⁵ Tơlah phung oh mon hađăch Hêsêkia hăn mâp ma Y-Êsai

⁶ jêh ri Y-Êsai lah ma khân păng: “Khân may plơ̆ sĭt mbơh hom ma kôranh khân may pô aơ Brah Yêhôva lah kơt aơ: ‘Lơi klach ôh yor nau ngơi khân may hŏ tăng jêh, jêng lĕ nau phung oh mon hađăch bri Asiri ngơi djơh tât Gâp.

⁷ Aơ, Gâp mra dơm du huêng tâm păng, ƀư ăn păng tăng nau bu nkoch bri jêh ri rŭch tahan plơ̆ sĭt ta bri păng nơm. Gâp mra ăn păng cha lôt khĭt tâm dâng mpiăt đao tâm bri păng.’”

Nau nkrit nhhu bơh Y-Sênakêrip

⁸ Tơlah Y-Rabshakeh plơ̆ sĭt tâm mâp hađăch bri Asiri dôl tâm lơh đah ƀon Lipna, yorlah păng tăng lư hađăch hŏ du jêh bơh Lakis.

⁹ Nôk nây, hađăch Asiri tăng bu mbơh ma Y-Tirhaka, hađăch Kus, pô aơ: “Aơ, hađăch nĕ leo phung tahan văch ŭch tâm lơh đah hađăch.” Tăng nau nây, hađăch Asiri prơh đŏng phung mbơh hăn tâm mâp ma hađăch Hêsêkia, jêh ri ntĭnh pô aơ:

¹⁰ “Khân may ngơi hom ma Y-Hêsêkia, hađăch Yuđa, pô aơ: ‘Lơi ăn Brah Ndu may, jêng Nơm may rnơm nsing, ndơm mƀruh may ôh pô aơ Yêrusalem mâu mra tŭp tâm ti hađăch Asiri.’

¹¹ Aơ, nanê̆ may hŏ tăng jêh moh nau phung hađăch Asiri ƀư jêh ma lĕ rngôch bri dak, bu ƀư rai jêh lĕ khân păng. Bi may, may mra dơi klaih lĕ?

¹² Lĕ rngôch phung brah tâm lĕ bri dak phung chô yau gâp hŏ ƀư rai jêh, jêng phung brah n'gor Gôsan, Charan, Rêsep, jêh ri phung Êđen gŭ ta ƀon Têlasar, mâp dơi tâm rklaih khân păng lĕ?

¹³ Phung hađăch ƀon Hamat, hađăch ƀon Arpat, hađăch ƀon Sêpharvaim, hađăch ƀon Hêna, hađăch ƀon Iva mbah ntŭk khân păng gŭ?”

Y-Hêsêkia mbơh sơm

¹⁴ Y-Hêsêkia sŏk dơn samƀŭt bơh phung mbơh jao tâm ti păng. Răk lôch jêh, hađăch hăn hao ro ma ngih Brah Yêhôva, jêh ri ling samƀŭt tanăp Brah Yêhôva.

¹⁵ Y-Hêsêkia mbơh sơm tanăp Brah Yêhôva: “Ơ Brah Yêhôva, Brah Ndu Israel! Nơm gŭ ta klơ phung chêrubim, knŏng êng du huê May jêng Brah Ndu ma lĕ rngôch ƀon bri hađăch ta neh ntu. May yơh hŏ rhăk njêng jêh trôk jêh ri neh ntu.

¹⁶ Ơ Brah Yêhôva, dăn ma may rkêng hom tôr jêh ri iăt! Ơ Brah Yêhôva, dăn ma may lin hom măt jêh ri uănh treng! Iăt hom lĕ nau ngơi Y-Sênakêrip njuăl tât gay mưch rmot ma Brah Ndu gŭ rêh mro mrăng.

¹⁷ Ơ Brah Yêhôva, n'hêl nanê̆ phung hađăch Asiri hŏ ƀư rai jêh lĕ bri dak jêh ri n'gor neh khân păng,

¹⁸ mƀăr lơi phung brah khân păng tâm ŭnh, yorlah khân păng mâu jêng brah ôh, knŏng jêng ndơ ma si jêh ri ma lŭ bơh ti kon bunuyh ƀư, pôri bu ƀư rai lơi khân păng.

¹⁹ Pôri aƀaơ, ơ Yêhôva Brah Ndu hên, tâm rklaih hom hên bơh ti Y-Sênakêrip, gay ma lĕ rngôch ƀon bri hađăch ta neh ntu dơi gĭt pô aơ knŏng êng Brah Yêhôva jêng Brah Ndu.”

Nau mbơh lor ma Y-Sênakêrip mâu geh nau dơi

²⁰ Y-Êsai, kon bu klâu Y-Amôt, njuăl bunuyh hăn tât ngơi ma hađăch Hêsêkia pô aơ: “Yêhôva Brah Ndu Israel lah: Gâp tăng jêh nau may mbơh sơm yor nau Y-Sênakêrip, hađăch Asiri.

²¹ Aơ jêng nau Brah Yêhôva hŏ lah ma păng: ‘Bu ur druh ƀon Siôn Tâm rmot ma păng, gơm mưch ma may; Kon bu ur ƀon Yêrusalem Rteh bôk pakơi may.

²² Ma mbu nơm may mưch rmot jêh ri ngơi djơh tât? Ma mbu nơm may nter Jêh ri n'gơr măt ma nau sưr tâm rdâng? Janh tâm rdâng đah Nơm Kloh Ueh phung Israel!

²³ May prơh jêh phung mbơh hăn gay mưch rmot ma Kôranh Brah. May lah: “Ma âk ir ndeh seh, Gâp hao lĕ ta klơ n'gơn yôk prêh, Tât n'gơn yôk prêh lơn tâm bri Liban; Gâp mra kăl lĕ tơm si Sêdar prêh lơn, Jêh ri lĕ tơm si chiprơ dŭt ueh lơn; Gâp mra tât ta ntŭk ngai, Tâm krŏng tơm si dŭt pŭm.

²⁴ Gâp kuyh jêh ntu dak Jêh ri nhêt jêh dak phung bu năch; Gâp ƀư suăt jêh lĕ rngôch n'hor dak n'gor Êjipt Ma bar mpang jâng gâp.”

²⁵ Di lĕ may mâu mâp tăng pô aơ Gâp hŏ nal jêh nau aơ bơh jŏ jêh? Lĕ nau Gâp hŏ ndrăp ơm bơh kăl e, Aơ ri Gâp ƀư ăn tât nau nây, Gay ma may ƀư lĕ ƀon nâp Jêng lĕ mbŭch rlâm rai nchah rngot njăp jêh.

²⁶ Phung ƀon lan gŭ tâm lĕ ƀon nây mâu hôm geh nau ktang ôh, Klach krit jêh ri bêk prêng; Khân păng jêng nâm bu tơm si gơ̆ rêp tâm mir, Nâm bu gơ̆ ndrêh, Nâm bu gơ̆ nse hon ta klơ chor ngih, Nâm bu ba ƀlê hŏ klêu êlor hao prêh.

²⁷ Ƀiălah Gâp gĭt dôl may gŭ, dôl may gŭ nsrâng, Dôl may hăn luh, dôl may hăn lăp; Nđâp tơlah may ji nuih tâm rdâng đah Gâp.

²⁸ Yorlah may ji nuih jêh tâm rdâng đah Gâp, Jêh ri nau ngơi ƀlăch ƀlêr may hŏ hao tât ta tôr Gâp, Pôri Gâp nklĕ ndar ta trôm muh may, Dơm kang thao tâm trôm mbung may. Gâp mra ƀư ăn ma may plơ̆ sĭt Tĭng trong may hŏ văch jêh.’

²⁹ Hơi Y-Hêsêkia, aơ mra jêng nau mbên ma may: Năm aơ may mra sa play kao hon êng; năm rơh bar sa play kao chăt hon bơh găr ntil êng tŭp; ƀiălah tât năm rơh pe, srih hom jêh ri rek hom, tăm tơm krăk ƀâu jêh ri sa play păng.

³⁰ Phung klaih hôm rêh bơh ngih Yuđa mra thoi đŏng hon reh tâm dâng jêh ri geh play ta klơ.

³¹ Yorlah mra geh phung hôm klen hăn luh bơh Yêrusalem, jêh ri du phung klaih jêh mra luh bơh yôk Siôn. Nau duh nđơr Brah Yêhôva ma phung tahan mra ƀư nau aơ.

³² Yor ri, Brah Yêhôva lah ma hađăch Asiri kơt aơ: ‘Păng mâu mra lăp ƀon aơ ôh, mâu mra pănh tong hăr ta nây, mâu đŏng sŏk khêl mâu lah bât pôih gay rduh lơh ƀon.

³³ Păng mra plơ̆ sĭt ta trong păng văch tât, mâu dơi lăp tâm ƀon aơ ôh.’ Brah Yêhôva lah pônây.

³⁴ Yor Gâp jêh ri yor Y-Đavit, oh mon Gâp, Gâp nơm mra king n'gang jêh ri tâm rklaih ƀon aơ.”

Y-Sênakêrip khĭt

³⁵ Măng nây, du huê tông mpăr Brah Yêhôva lơh nkhĭt du rsen pham rmưn prăm rbăn bunuyh tâm pôih tahan Asiri. Ang ôi taơ, bu kah rngăl ơm ôi jêh ri saơ lĕ phung nây jêng săk jăn khĭt jêh.

³⁶ Y-Sênakêrip, hađăch Asiri, rŭch tahan hăn sĭt jêh ri gŭ ta Ninive.

³⁷ Du nar, hađăch Sênakêrip dôl chon mon mbah brah păng tâm ngih brah Nirok, phung kon bu klâu păng jêng Y-Adramêlek jêh ri Y-Sarêser sŏk đao nkhĭt păng, jêh nây hăn du rlet n'gor Ararat. Kon păng jêng Y-Êsarhadôn chiă uănh thoi ntrok păng.